ပြီးခဲ့တဲ့တပတ်အတွင်း တောင်ပိုင်းစစ်ဒေသက စစ်ကောင်စီနဲ့ တော်လှန်ရေးပူးပေါင်းအဖွဲ့တွေရဲ့ တိုက်ပွဲတွေမှာ စစ်ကောင်စီဘက်က ၂၈ ယောက်သေဆံးခဲ့တယ်လို့ ပြည်သူ့ကာကွယ်ရေး တပ်မတော် (PDF)၊ တောင်ပိုင်းစစ်ဒေသက ထုတ်ပြန်ပါတယ်။

၂၀၂၅ ခုနှစ် ဇန်နဝါရီ ၁၁ ရက်ကနေ ၁၇ ရက်နေ့အထိ စစ်ရေးသတင်းအကျဉ်းချုပ်ကို ဒီနေ့ထုတ်ပြန်လာတာဖြစ်ပြီး PDF၊ KNU-KNLA၊ တခြားတော်လှန်ရေးပူးပေါင်းအဖွဲ့တွေနဲ့ စစ်ကောင်စီတပ်တို့ ဖြစ်ပွားခဲ့တဲေတိုက်ပွဲတွေအတွင်း စစ်ကောင်စီတပ်သား ၂၈ ယောက် သေဆုံး၊ ၄၅ ယောက်နဲ့အထက် ဒဏ်ရာရခဲ့တယ်လို့ ဆိုပါတယ်။

ဒီတပတ်ထဲမှာ ကော့ကရိတ်-အာရှလမ်းက အောင်ဇေယျစစ်ကြောင်းရဲ့ ယာယီတပ်စခန်းငယ် တခုကိုလည်း တော်လှန်ရေးပူးပေါင်းတပ်ဖွဲ့က ဝင်ရောက်တိုက်ခိုက်သိမ်းပိုက်ခဲ့ပါတယ်။

တိုက်ပွဲတွေကနေ လက်နက်ငယ် ၁၁ လက်၊ လက်နက်ကြီး ၁ လက်၊ မိုင်းနဲ့ ခဲယမ်းမျိုးစုံ၊ တခြား စစ်ဘက်သုံးပစ္စည်းတချို့ကိုလည်း သိမ်းဆည်းရမိခဲ့ပြီး မြေပြင်မှာအထိနာနေတဲ့ အကြမ်းဖက် စစ်ကောင်စီတပ်ဟာ အရပ်သားပစ်မှတ်တွေကိုပါမချန် ရည်ရွယ်ချက်ရှိရှိနဲ့ လေကြောင်းတိုက်ခိုက်မှုကို ပိုသုံးလာတယ်လို့လည်း ထုတ်ပြန်ပါတယ်။

ပြီးခဲ့တဲ့ ဒီဇင်ဘာလကတိုက်ပွဲတွေမှာတော့ စစ်ကောင်စီတပ်သား ၁၅၁ ယောက် သေဆုံး၊ ၈၉ ယောက် ဒဏ်ရာရခဲ့တယ်လို့ အတည်ပြုနိုင်ပြီး ပူးပေါင်းတပ်ဖွဲ့ဆီကို အလင်းဝင်ရောက်လာတဲ့ စစ်ကောင်စီတပ်သား ၅ ယောက်ကိုလည်း ကောင်းကောင်းမွန်မွန်ကြိုဆို စောင့်ရှောက်ထားတယ်လို့ ထုတ်ပြန်ပါတယ်။