အာရက္ခတပ်တော်(AA)နဲ့ပူးပေါင်းတပ်တွေ ထိုးစစ်ဝင်လာနေချိန်မှာ ဧရာဝတီတိုင်း၊ သာပေါင်းမြို့နယ်က ကျေးရွာအုပ်စုအုပ်ချုပ်ရေးမှူးတွေကို စစ်ကောင်စီက လက်နက်တွေ ထုတ်ပေးနေပြီး စစ်သားအင်အားလည်းဖြည့်နေတယ်လို့ သိရပါတယ်။

AA နဲ့ ပူးပေါင်းတပ်တွေက ပုသိမ်မြို့နယ်၊ ရွှေသောင်ယံမြို့၊ မကျီးဇင်ရွာရဲစခန်းကို ဇန်နဝါရီ ၉ ရက် ညနေမှာ သိမ်းပိုက်ခဲ့ပြီးနောက် ဇန်နဝါရီ ၁၀ ရက်နေ့ကစပြီး လက်နက်တွေ ထုတ်ပေးနေတာလို့ သာပေါင်းမြို့နယ်၊ အထွေထွေအုပ်ချုပ်ရေးဦးစီးဌာနနဲ့ နီးစပ်သူတယောက်က ပြောပါတယ်။

“ဒီနေ့ ကျေးရွာအုပ်ချုပ်ရေးမှူးတယောက်တည်းကို ထုတ်ပေးတာ။ ရာအိမ်မှူး တို့မပေးဘူး။ ဘယ်လိုအမျိုးအစား ထုတ်ပေးတာမသိဘူး။ သေနတ်အရှည်တွေပါ”

သာပေါင်းမြို့နယ်၊ သဲဖြူကျေးရွာမှာလည်း စစ်တပ်ကခံစစ်ပြင်ထားပြီး စစ်သားအင်အား ထပ်ဖြည့်ထားတယ်လို့လည်း ဒေသခံတွေဆီက သိရပါတယ်။

ရခိုင်ပြည်နယ်၊ ဂွမြို့ကို AA က သိမ်းပိုက်လိုက်ချိန်မှာ ပုသိမ်မြို့နယ်၊ မကျီးဇင်ရွာမှာ စစ်တပ်က ခံစစ်ပြင်ခဲ့ပြီး အဲဒီကစစ်သားတွေ ထွက်ပြေးတာများတာကြောင့် စစ်ဆေးရေးဂိတ်ဖွင့်ပြီး ကားတွေမှာ စစ်သားပါ မပါကို စစ်ဆေးခဲ့ရတယ်လို့ ဒေသခံတွေက ပြောပါတယ်။

အခုတော့ ကြက်သွန်ကွင်း-မကျီးဇင်လမ်းပိုင်း ကြက်သွန်ကွင်းရွာမှာ စစ်ဆေးရေးဂိတ်လုပ်ထားပြီး မြို့ပေါ်မှာလည်း ပြည်သူ့စစ်တွေ ညဘက်ကင်းလှည့်နေတယ်လို့ သာပေါင်းမြို့ ဒေသခံတွေက ပြောပါတယ်။

မကျီးဇင်ကျေးရွာ ရဲစခန်းကို AA နဲ့ပူးပေါင်းတပ်တွေ တိုက်ခိုက်နေချိန် စစ်ကောင်စီက လေကြောင်းနဲ့ရေကြောင်းကနေ တိုက်ခိုက်ခဲ့လို့ ပြည်သူတွေ ထိခိုက်သေဆုံးခဲ့တယ်လို့လည်း ဒေသခံတွေဆီက သိရပါတယ်။