ရန်ကုန်တိုင်းအတွင်း မြို့နယ်တွေမှာ လျှပ်စစ်ဓာတ်အားကော်ပိုရေးရှင်းက ဖြန့်ချိတဲ့ သတ်မှတ်ချက်အတိုင်း လျှပ်စစ်မီး မရတဲ့အပြင် မီးအားပါ လျော့နည်းလာနေတာကြောင့် မီးအားမြှင့်စက်တွေ ပြန်သုံးနေရပြီလို့ မြို့ခံတွေက ပြောပါတယ်။
ဇန်နဝါရီ ၅ ရက်ကစပြီး တနေ့ ၁၆ နာရီ မီးဖြတ်ကာ အုပ်စု ၃ ခုကို အလှည့်ကျ ၄ နာရီ ၂ ကြိမ် မီးပေးမယ်လို့ ထုတ်ပြန်ခဲ့ပေမဲ့ လျှပ်စစ်မီးပေးပြီး နာရီဝက်ကျော်နဲ့ မီးမပြတ်ခင် နာရီဝက်လောက်သာ ဟန်ပြလာနေတယ်လို့ မရမ်းကုန်းမြို့ခံတယောက်က ပြောပါတယ်။
“နေ့လယ် ၁ နာရီပေးမယ့် မီးက ၁ နာရီခွဲကျော်လောက်ဆို ပြန်ပြတ်သွားတယ်။ ညနေ ၄ နာရီမခွဲခင်လောက် ပြန်ရတယ်။ တကယ်က ဆက်တိုက် ၄ နာရီရရမှာ။ ဒါဆို ၁ နာရီစွန်းစွန်းပဲ ပေးတယ်။ တနေ့ ၁၆ နာရီထက်ကို ပိုပြတ်နေတယ်။”
မြောက်ဒဂုံမြို့နယ်ဘက်မှာတော့ မီးအားအဝင် ၂၂၀ ဗို့ထက် နည်းပါးလာတာကြောင့် ထမင်းပေါင်းအိုးတည်ရင် ၂ နာရီလောက် တည်နေရတယ်လို့ အိမ်ရှင်မတယောက်က ပြောပါတယ်။
“အမေစုလက်ထက်ကဆို ဘာ voltage change (မီးအားမြှင့်စက်) မှ မလိုဘူး။ ထမင်းအိုး ဆန် ၄ လုံးပဲတည်တာ၊ အခု ၂ နာရီလောက်ကို ကြာတယ်။ မီးလာလည်း ပိုးစုန်းကြူးလောက်လေးပဲ။ မီးသွေးနဲ့တည်တာကမှ ပိုမြန်တယ်။”
မြန်မာတနိုင်ငံလုံးရဲ့ လျှပ်စစ်ဓာတ်အားလိုအပ်ချက်ဖြစ်တဲ့ တနေ့တာအတွက် မဂ္ဂါဝပ် ၄,၄၀၀ ဝန်းကျင်ကို သက်ဆိုင်ရာ ဓာတ်အားဓာတ်ရုံတွေကနေ တနေ့တာ လျှပ်စစ်ဓာတ်အား မဂ္ဂါဝပ် ၂,၂၀၀ လောက် ထုတ်လုပ်နိုင်တယ်လို့ စစ်ကောင်စီ လျှပ်စစ်စွမ်းအားဝန်ကြီးဌာနက ထုတ်ပြန်ခဲ့ပေမဲ့ ဇန်နဝါရီ ၅ ရက် စာရင်းမှာတော့ တနေ့တာအတွက် မဂ္ဂါဝပ် ၁,၇၀၀ ကျော်သာ ထုတ်လုပ်နိုင်တာ တွေ့ရပါတယ်။
