ကွန်ဂိုဒီမိုကရက်တစ်သမ္မတနိုင်ငံ (DRC) ရဲ့ ကျန်းမာရေးအာဏာပိုင်တွေက အောက်တိုဘာ ၂၇ ရက်မှာ ထုတ်ပြန်လိုက်တဲ့ အချက်အလက်တွေအရ မေလမှာ အီဘိုလာရောဂါ စဖြစ်ချိန်ကစပြီး ခုထိ အတည်ပြုလူနာ အယောက် ၁၀,၀၀၀ ကျော်သွားပါပြီ။
အောက်တိုဘာ ၂၅ ရက်အထိ စာရင်းတွေအရ ရောဂါဖြစ်ပွားသူ စုစုပေါင်း ၁၀,၀၆၀ ယောက် ရှိပြီး သူတို့ထဲက ၄,၈၈၇ ယောက် သေဆုံးခဲ့လို့ သေဆုံးမှုနှုန်းမှာ ၄၈ ဒသမ ၆ ရာခိုင်နှုန်း ရှိတယ်လို့ နောက်ဆုံးထုတ်ပြန်ချက်မှာ ဖော်ပြပါတယ်။
ဒီအာကွန်ဂိုနိုင်ငံက ပြည်နယ် ၂၆ ခုအနက် ၈ ခုထဲက ကျန်းမာရေးဇုန်ပေါင်း ၆၆ ခုအထိ ဒီကူးစက်မှု က သက်ရောက်ခဲ့ပါတယ်။
အရှေ့ပိုင်းက အစ်တူရီပြည်နယ်ဟာ ရောဂါဖြစ်ပွားမှု အများဆုံး ဗဟိုချက်နေရာအဖြစ် ဆက်ရှိနေပြီး အတည်ပြုလူနာ စုစုပေါင်းရဲ့ ၇၁ ဒသမ ၇ ရာခိုင်နှုန်းက ဒီပြည်နယ်ကလူတွေလို့ အစီရင်ခံစာထဲမှာ ဖော်ပြထားပါတယ်။
ဘွန်ဒီဘူဂျို မျိုးကွဲ အီဘိုလာဗိုင်းရပ်စ်ကြောင့် ဖြစ်နေတဲ့ ဒီရောဂါကို ဒီအာကွန်ဂိုနိုင်ငံမှာ မေ ၁၅ ရက် က တရားဝင် ကြေညာခဲ့ပါတယ်။
အဲဒီအချိန်ကစပြီး ဒီရောဂါဟာ အာဖရိကတိုက်က နိုင်ငံ ၄ ခု အပါအဝင် နိုင်ငံပေါင်း ၅ ခုဆီ ပျံ့နှံ့ ရောက်ရှိသွားခဲ့တာပါ။
ဒီနိုင်ငံတွေက ယူဂန်ဒါ၊ ကင်ညာနဲ့ နိုင်ဂျီးရီးယားတို့ ဖြစ်ကြပြီး ပြင်သစ်နိုင်ငံမှာလည်း နိုင်ငံခြားကနေ ဝင်လာသူတယောက်မှာ ရောဂါတွေ့တဲ့အကြောင်း ဖော်ပြထားပါတယ်။
ပိုအတွေ့ရများတဲ့ ဇိုင်ယာမျိုးကွဲ အီဘိုလာဗိုင်းရပ်စ်နဲ့ မတူဘဲ ဘွန်ဒီဘူဂျို မျိုးကွဲ ဗိုင်းရပ်စ်အတွက် အတည်ပြုထားတဲ့ ကာကွယ်ဆေး ဒါမှမဟုတ် သီးသန့်ကုသဆေး မရှိသေးပါဘူး။
လက်ရှိဖြစ်နေတဲ့ အီဘိုလာရောဂါဟာ ဒီအာကွန်ဂိုနိုင်ငံသမိုင်းမှာ အကြီးဆုံးနဲ့ သေဆုံးမှုအများဆုံး ဖြစ်လာခဲ့ပါတယ်။
ဒါ့အပြင် ၂၀၁၄-၂၀၁၆ ခုနှစ်က အနောက်အာဖရိကမှာ ဖြစ်ခဲ့တဲ့ ကပ်ရောဂါပြီးရင် ကမ္ဘာတဝန်းမှာ ဒုတိယအကြီးမားဆုံး အီဘိုလာရောဂါ ဖြစ်ပွားမှု ဖြစ်လာခဲ့ပါတယ်။
Source: Reuters
