မြို့ပေါင်း ၆၀ ကျော်နဲ့ တိုင်းစစ်ဌာနချုပ် ၂ ခု သိမ်းပိုက်နိုင်ခဲ့တဲ့ ၂၀၂၄ ခုနှစ်ဟာ တော်လှန်ရေး အင်အားစုတွေအတွက် စစ်ရေးအရ အောင်မြင်တဲ့နှစ် ဖြစ်ခဲ့ပါတယ်။ 

လာမယ့် ၂၀၂၅ မှာတော့ စစ်ကောင်စီရဲ့ ခဲယမ်းအိုးလို့ ပြောဆိုကြတဲ့ မကွေးတိုင်း၊ ပဲခူးတိုင်းတို့ အပါအဝင် ကပစ စက်ရုံတွေရှိရာ နေရာတွေမှာ တိုက်ပွဲတွေ ပိုပြင်းထန်လာဖို့ ရှိနေပါတယ်။

အာဏာသိမ်းပြီး ၄ နှစ်နီးပါး ရှိလာချိန်မှာတော့ တော်လှန်ရေးအင်အားစုတွေက မြို့ပေါင်း ၉၄ မြို့အထိ သိမ်းယူထားနိုင်ခဲ့ပါပြီ။ အဲဒီမြို့တွေထဲက မြို့ပေါင်း ၆၀ ကျော်ကိုတော့ ၂၀၂၄ ခုနှစ် တနှစ်တာအတွင်းမှာပဲ သိမ်းထားတာပါ။

ပြီးခဲ့တဲ့ ၂၀၂၃ ခုနှစ်အထိ မြို့ပေါင်း ၃၀ ကျော်ပဲ သိမ်းနိုင်ခဲ့တာဖြစ်ပြီး တနှစ်အတွင်း သိမ်းဆည်းနိုင်မှုက နှစ်ဆတက်လာတာပါ။ ဒီအခြေအနေကိုကြည့်ရင် ၂၀၂၄ ဟာ စစ်ရေးအရ အောင်မြင်မှုကြီးမားခဲ့တဲ့နှစ် ဖြစ်ခဲ့တယ်လို့ စစ်ရေးလေ့လာသူတွေနဲ့ နိုင်ငံရေးအကဲခတ်တွေက ပြောဆိုကြပါတယ်။

ဒါဟာ စံချိန်တင် စစ်အသုံးစရိတ်တွေ သုံးထားတဲ့ စစ်ကောင်စီအတွက် အရှက်ရစရာ ဖြစ်ခဲ့ရပါတယ်။ ဒါကြောင့် ၂၀၂၄ ခုနှစ်ဟာ စစ်တပ်ကို နိုင်အောင်တိုက်နိုင်ပါ့မလားဆိုတဲ့ အမြင်တွေကို ပြောင်းပြန်လှန်ပစ်လိုက်နိုင်တဲ့ နှစ်လို့ ဆိုပါတယ်။

၂၀၂၄ခုနှစ်အတွင်း စစ်ကောင်စီရဲ့ စစ်တိုင်း ၁၄ ခုရှိတဲ့အထဲက စစ်တိုင်းနှစ်ခုဖြစ်တဲ့ အရှေ့မြောက်တိုင်းစစ်ဌာနချုပ်နဲ့ အနောက်ပိုင်းတိုင်းစစ်ဌာချုပ်တို့ကို ညီနောင်မဟာမိတ် ၃ ဖွဲ့က သိမ်းနိုင်ခဲ့သလို စစ်ကောင်စီရဲ့ အဆင့်မြင့်တပ်အရာရှိကြီး တဒါဇင်ကျော်ဟာလည်း အဖမ်းခံရတာ၊ ကျဆုံးတာတွေရှိခဲ့ပါတယ်။ 

နောက်ထပ်အရေးကြီးဆုံးအချက်ကတော့ စစ်ကောင်စီရဲ့ တပ်ရင်းဌာနချုပ်ပေါင်း ၂၀၀ ကျော်လောက်အထိ ဒီတစ်နှစ်အတွင်း ဖွဲ့စည်းပုံပျက်ခဲ့တယ်လို့ CDM ဗိုလ်ကြီး ကိုလင်းထက်အောင်က ပြောပါတယ်။ 

ဒါ့ကြောင့် စစ်ကောင်စီဟာ စစ်ရေးတင်မက စိတ်ဓာတ်ရေးအရာအရပါ ကြီးကြီးမားမား အထိနာခဲ့တယ်လို့ ဆိုပါတယ်။ 

စစ်ကောင်စီအနေနဲ့ အခုလိုမျိုး မြို့တွေ၊ တိုင်းစစ်ဌာနချုပ်တွေ၊ တပ်ရင်းဌာနချုပ်တွေ အများအပြားကို စွန့်လွှတ်ထားရပေမဲ့ ပြန်ပြီးထိုးစစ်ဆင်နိုင်မယ့် အခြေအနေ အလားလာ ရှိမနေသလို၊ တော်လှန်ရေးအင်အားစုတွေက သိမ်းပြီးမြို့နယ်တွေကို ကောင်းကောင်း ထိန်းချုပ်ထားနိုင်တာကလည်း အရေးကြီးတဲ့အချက် ဖြစ်တယ်လို့ နိုင်ငံရေး လေ့လာသုံးသပ်သူ ဉီးသန်းစိုးနိုင်က ပြောပါတယ်။

၂၀၂၄ ရဲ့ အောင်မြင်မှုတွေကို ကြည့်ရင် လာမယ့် ၂၀၂၅ ဟာ အဆုံးအဖြတ်ဖြစ်လာဖို့ မျှော်လင့်လို့ရတယ်လို့ လေ့လာသူတွေက ဆိုကြပါတယ်။ အထူးသဖြင့် စစ်ကောင်စီတပ်တွေရဲ့ လက်ရှိ အနေအထားဟာ တကယ်တိုက်ရင် တကယ်ကျတဲ့ အခြေအနေ ဖြစ်နေပြီလို့ CDM ဗိုလ်ကြီး ကိုဇင်ယော်ကပြောပါတယ်။

လက်ရှိမှာတော့ ရခိုင်ပြည်နယ်မှာ မြို့နယ်အားလုံးနီးပါးကို အာရက္ခတပ်တော်က သိမ်းပိုက်နိုင်ခဲ့သလို အနောက်ပိုင်းတိုင်း စစ်ဌာနချုပ်ကိုပါ ထိန်းချုပ်နိုင်ခဲ့ပါတယ်။ ချ

င်းပြည်နယ်မှာဆိုရင်လည်း မြို့နယ်အများစုကို တော်လှန်ရေး အင်အားစုတွေက ထိန်းချုပ်သွားနိုင်တဲ့အခြေအနေပါ။ ဒီအခြေအနေတွေကြောင့် တဆက်တည်း ရှိနေတဲ့ မကွေး၊ စစ်ကိုင်းနဲ့ ပဲခူးတို့ကို စစ်လမ်းကြောင်း ပွင့်သွားခဲ့ပါတယ်။ 

ဒါကြောင့် ဒီဒေသတွေမှာ တိုက်ပွဲတွေ ပြင်းထန်လာနိုင်သလို ကပစစက်ရုံတွေ အများအပြားတည်ရှိတဲ့နေရာမို့ လာမယ့် ၂၀၂၅အတွက် အရေးကြီးတယ်လို့ ဆိုကြပါတယ်။ စစ်ကောင်စီတပ်မှာ ကာကွယ်ရေးပစ္စည်းစက်ရုံပေါင်း ၂၅ ခုရှိတာဖြစ်ပြီး အများစုက မကွေးတိုင်းထဲမှာရှိနေတာ ဖြစ်ပါတယ်။ 

လက်ရှိမှာတော့ စစ်ကောင်စီအသုံးပြုနေတဲ့ လက်နက်ခဲယမ်းတွေကို ကြည့်ရင် အသစ်ထုတ်ထားတာတွေ ဖြစ်တာကြောင့် ချက်ချင်းထုတ်ချက်ချင်း သုံးအခြေအနေကို ရောက်နေတာကိုတွေ့ရတယ်လို့ CDM ဗိုလ်ကြီး ကိုလင်းထက်အောင်က ဆိုပါတယ်။ 

ဒါကြောင့် ကပစစက်ရုံတွေကို ခြိမ်းခြောက်နိုင်ရင်တော့ တော်လှန်ရေးအတွက် အားသာချက်တွေ အများကြီး ရလာလိမ့်မယ်လို့လည်း ဆိုပါတယ်။

ဒါ့အပြင် တိုက်ပွဲတွေမရှိသေးတဲ့ ဧရာဝတီတိုင်းအပါအဝင် တခြားဒေသတွေမှာလည်း တိုက်ပွဲတွေ ပြင်းထန်လာဖို့ ရှိနေတယ်လို့ လေ့လာသူတွေက ပြောဆိုကြပါတယ်။

တဖက်မှာတော့ စစ်ကောင်စီက ရွေးကောက်ပွဲနဲ့ ထွက်ပေါက်ရှာဖို့ ကြိုးစားနေသလို ငြိမ်းချမ်းရေးဆွေးနွေးဖို့ ဖိတ်ခေါ်နေတာတွေလည်း ရှိပါတယ်။