ရန်ကုန်မှာ ကြက်သွန်နီစျေးနှုန်းက တပိဿာကို ကျပ် ၂၂,၀၀၀ ကနေ ၂၃,၀၀၀ အထိဖြစ်လာချိန် မုန့်ဟင်းခါးဆိုင်တချို့ မုန့်ဟင်းခါးထဲ ကြက်သွန်နီ မထည့်နိုင်တော့ဘူးလို့ ရောင်းချသူတွေဆီက သိရပါတယ်။
အရင်က မုန့်ဟင်းခါးထဲ ကြက်သွန်နီလှိုင်လှိုင်ထည့်နိုင်ခဲ့ပေမဲ့ ကြက်သွန်နီစျေးက တပိဿာကို ကျပ် ၂၀,၀၀၀ ကျော် လာပြီးနောက် မထည့်နိုင်တော့ဘူးလို့ တောင်ဒဂုံမြို့နယ်မှာ မုန့်ဟင်းခါးရောင်းချသူ တယောက်က ပြောပါတယ်။
"မုန့်ဖတ် ၁ ပိဿာဆို ကြက်သွန်နီ ၃၀ သား ထည့်ရတယ်။ ကျနော်တို့က တနေ့ ၁၀ ပိဿာ ရောင်းတာဆိုတော့ ကြက်သွန်နီက ၃ ပိဿာ ၂ ပိဿာခွဲ လောက်ထည့်ရတယ် အခုစျေးနဲ့ဆို ၆၀,၀၀၀ ကျော်လောက် ကုန်တယ်။ အမြတ်က အဲဒီလောက်ကျန်တာ မဟုတ်တော့ ကြက်သွန်နီ ထည့်မချက်တော့ဘဲ အဲဒီနေရာမှာ ငှက်ပျောအူကို ပိုထည့်ချက်တယ်။”
တနေ့ မုန့်ဖတ် ၅ ပိဿာ ရောင်းချတဲ့ဆိုင်တွေအနေနဲ့လည်း ကြက်သွန်နီစျေး ၂၀,၀၀၀ ဖြစ်ကတည်းက ကြက်သွန်နီကို လုံးဝထည့်မချက်ဘဲ ရောင်းချကြတယ်လို့ မြောက်ဥက္ကလာပမှာ မုန့်ဟင်းခါးရောင်းချသူ တယောက်က ပြောပါတယ်။
"ညီမတို့က မုန့်ဖတ် ၁ ပိဿာကို ကြက်သွန်နီ ၂၀ သား ပဲထည့်တာ။ ဒါတောင် ၅ ပိဿာ ဆို ၂၀,၀၀၀ လောက်ကုန်တယ်။ အဲဒီတော့ပါသလောက်ထည့်ချက်သေးတယ်။ အခု ၂၀,၀၀၀ ကျော်လာတဲ့ချိန်မှာ လုံးဝ ထည့်မချက်ဖြစ်တော့ဘူး ဒါကို စားသုံးသူတွေကလည်း နားလည်တယ်။”
ကြက်သွန်နီစျေးအပြင် မုန့်ဟင်းခါးစားသုံးရာမှာ ထည့်စားကြတဲ့ နံနံပင်မှာလည်း ၁ ပိဿာကို ကျပ် ၃၀,၀၀၀ ကျော်လာတယ်လို့ သူက ဆိုပါတယ်။
လတ်တလော ကြက်သွန်နီစျေးတက်နေတာပတ်သတ်ပြီး ဒီနေ့ ဘုရင့်နောင်ကုန်စည်ဒိုင်မှာ စျေးနှုန်း ညှိနှိုင်းအစည်းအဝေးရှိတယ်လို့ ပွဲရုံမန်နေဂျာ တယောက်က ပြောပါတယ်။
"ကြက်သွန်နီစျေးက တနေရာနဲ့ တနေရာ မတူဘူး ၁ ပိဿာကို ၂၂,၀၀၀ ရောင်းတဲ့ မြို့နယ်ရှိတယ်။ တပိဿာကို ၂၃,၀၀၀ ရောင်းတယ်။ တချို့ မြို့နယ်တွေဆို ၁ ပိဿာကို ၂၅,၀၀၀ ခွဲအထိ ရောင်းတာတောင်ရှိတယ်။ ဒါကြောင့် ဒီနေ့ ကြက်သွန်စျေးတွေကို ပြန်ပြီးညှိနှိူင်းဖို့ ဘုရင့်နောင် ကုန်စည်ဒိုင်မှာ အစည်းအဝေးရှိတယ်။”
အောက်တိုဘာလကတည်း ၁ ပိဿာကို ကျပ် ၁၄,၀၀၀ ကနေ ၁၆,၀၀၀ ဖြစ်ခဲ့တဲ့ကြက်သွန်နီစျေးမှာ နိုဝင်ဘာလအတွင်းမှာ ၁ ပိဿာ ကို ကျပ် ၂၂၀,၀၀၀ ကနေ ၂၃,၀၀၀ အထိဖြစ်လာတာပါ။
စစ်တပ် အာဏာမသိမ်းခင် ၂၀၂၀ နိုဝင်ဘာလက ကြက်သွန်စျေးက အလုံးသန့် ၁ ပိဿာကို ကျပ် ၆၇၅ ကျပ်ပဲရှိတဲ့ ကြက်သွန်နီစျေးဟာ အာဏာသိမ်းပြီးနောက် အဆ ၄၀ အထိမြင့်တက်လာတာ ဖြစ်ပါတယ်။
