ရခိုင်ပြည်နယ်၊ အမ်းမြို့ကို စစ်ကူလာတဲ့ ယာဉ်တန်းကို မကွေးတိုင်း၊ ငဖဲမြို့နယ်မှာ ကြားဖြတ်ခိုက်ခဲ့လို့ စစ်ကောင်စီတပ်ဖွဲ့ဝင် ၁၄ ယောက်ထက်မနည်း သေဆုံးပြီး အများအပြား ဒဏ်ရာရခဲ့ပါတယ်။

ငဖဲမြို့နယ်မှာ ဒီဇင်ဘာ ၂၀ ရက် မနက် ၉ နာရီလောက်က စစ်ကောင်စီတပ်ဖွဲ့ဝင်တွေ လိုက်ပါလာတဲ့ ယာဉ်တန်းကို ကြားဖြတ်ခိုက်ခဲ့လို့ ဗိုလ်ကြီးအဆင့်ရှိသူ ၁ ယောက် အပါအဝင် အများအပြားဒဏ်ရာရပြီး စစ်ကောင်စီတပ်ဖွဲ့ဝင် ၁၄ ယောက် သေဆုံးတယ်လို့ အရှိုချင်းကာကွယ်ရေးတပ်(ACDF) က ဒီဇင်ဘာ ၂၁ ရက်နေ့ ညပိုင်းမှာ သတင်းထုတ်ပြန်ပါတယ်။

ရခိုင်ပြည်နယ်က အမ်းကို စစ်ကူပို့တဲ့ ရှေ့ပြေးစစ်ယာဉ်တန်းဖြစ်ပြီး ငဖဲမြို့နယ်ထဲက စပ်စီရွာနားက ဝက်စကျင်းလမ်းဆုံမှာ ကြားဖြတ်တိုက်ခဲ့တာလို့ လို့ ACDF ရဲဘော်တယောက်က ပြောပါတယ်။

ACDF ရဲ့ သတင်းနဲ့ပြန်ကြားရေးတာဝန်ခံ ဆလိုင်းခနီလေဗွေ က “သူတို့ စစ်ကူလမ်းကြောင်း လာမယ်ဆိုတာကို ကျနော်တို့ သတင်းကြိုရထားတာဖြစ်လို့ မနက်စောကတည်းက ကြိုစောင့်နေပြီး တိုက်ခဲ့တာဖြစ်ပါတယ်။ ကျနော်တို့ တိုက်ခိုက်ခဲ့တာက သူတို့ဘက်က ရှေ့ပြေးကင်းထောက် စစ်ယာဉ်တန်းကိုပါ။ အင်အားကတော့ ၃၀ ကျော်ပါမယ်ဗျ။ တိုက်ပွဲဖြစ်နေချိန်မှာ သူတို့ တပ်စွဲထားတဲ့ ရန်အောင်မြေဘုရားကုန်းကနေပြီးတော့လည်း ၆၀ မမ တွေနဲ့ ပစ်ကူပေးတယ်။ ပြီးတော့ စပ်စီဘုန်းကြီးကျောင်းမှာ ကပစ က ကောင်တွေကကလည်း ကား ၄ စီးနဲ့ စစ်ကူလာကြတယ်။ တိုက်ပွဲဖြစ်တဲ့နေရာကို သူတို့စစ်ကူက နှစ်ဖက် ညှပ်လာသလို ဖြစ်တော့ ကျနော်တို့လည်း လက်နက်ကောက်ချိန်မရတော့ဘဲ ပြန်ဆုတ်လာခဲ့ရတာပါ” လို့ DVB ကို ပြောပါတယ်။

တိုက်ပွဲအတွင်းမှာ ACDF ဘက်က ရဲဘော်တယောက် မစိုးရိမ်ရတဲ့ဒဏ်ရာရရှိခဲ့ပြီး ပြီးခဲ့တဲ့ ဒီဇင်ဘာ ၄ ရက်နေ့ကလည်း အမ်းမြို့သိမ်းတိုက်ပွဲကနေ ထွက်ပြေးလာကြတဲ့ စစ်ကောင်စီတပ်က ဗိုလ်ကြီး ၁ ယောက်အပါအဝင် တပ်ဖွဲ့ဝင် ၁၂ ယောက်ကို ACDF က အရှင်ဖမ်းဆီးရမိခဲ့ပါသေးတယ်။