မကွေးတိုင်း၊ ထီးလင်းမြို့နယ်ရှိ စစ်ကောင်စီတပ်တွေအတွက် လိုအပ်နေတဲ့ လက်နက်ခဲယမ်းနဲ့ စားနပ်ရိက္ခာတွေကို ဒီဇင်ဘာ ၁၉ ရက် ညနေ ၃ နာရီလောက်မှာ လေယာဉ်နဲ့ ထောက်ပံ့ပေးသွားတယ်လို့ ဒေသခံတွေထံက သိရတယ်။
ထီးလင်းမြို့ဟာ ချင်းပြည်နယ်နဲ့ ထိစပ်နေပြီး မကွေးတိုင်း၊ ဂန့်ဂေါခရိုင်အတွင်းမှာတည်ရှိတာ ဖြစ်ပြီး PDF တွေက ရိက္ခာလမ်းကြောင်းဖြတ်ထားတာ ၆ လလောက်ရှိပြီဖြစ်လို့ စစ်ကောင်စီ တပ်တွေ ရိက္ခာပြတ်လပ်လာတာဖြစ်ပါတယ်။
မျက်မြင်သက်သေ ဒေသခံထီးလင်း PDF တယောက်က “ ၂ ရက်ကို လာချတာဗျာ။ လေယာဉ်က တောင်ပံကလည်း အကြီးကြီးပဲ။ ငမန်းကြီးလိုပဲ။ ပထမကတော့ လေယာဉ်နဲ့ ဗုံးလာကြဲချတာလားလို့ ထင်နေတာ။ နောက်ပိုင်းတော့ လေယာဉ်ပေါ်ကနေ အထုပ်တွေကြဲချသွားတာ”လို့ ပြောပါတယ်။
ထီးလင်းမြို့ကို PDF တပ်တွေက ရိက္ခာလမ်းကြောင်း ဖြတ်တောက်ထားတာ ၆ လကျော်ရှိနေပြီး ထီးလင်းမြို့တွင်းက စစ်ကောင်စီတပ်တွေ အလင်းဝင်ရောက်သူတွေ အများအပြား ရှိလာတယ်လို့ ဒေသခံ ပြည်သူ့ကာကွယ်ရေးတပ်က ပြောပါတယ်။
ထီးလင်း PDF ခေါင်းဆောင်တယောက်က “သူတို့ရိက္ခာပျက်နေပြီဗျ။ သူတို့ ဟိုတလောက ပြည်သူ့ကာကွယ်ရေးတပ်ဖွဲ့တဖွဲ့ထံ ငွေကျပ် သိန်း ၁၀၀၊ သေနတ် ၂ လက်။ ကျည် ၁၅၀၀နဲ့ အလင်းဝင်တာရှိတယ်။ အလင်းဝင်တဲ့သူတွေ ပြောပြချက်အရကတော့ အတွင်းထဲမှာ ရိက္ခာပြတ်နေပြီဆိုတာသိထားရတယ်လေ။ အဲလိုရိက္ခာပြတ်နေလို့ အခုလိုလေယာဉ်နဲ့ ရိက္ခာချတာ ဖြစ်မယ်။ ဒီနေ့လည်း ယောဒေသ ဆောမြို့နယ်၊ ကျောက်ထု ၃၆၈ အမြောက်တပ်ထဲကို Y - 8 နဲ့ ၃ ပတ်ပတ်ကာ လေထီးနဲ့ အထုပ်တွေချပေးခဲ့တယ်လို့ ကျနော်တို့မဟာမိတ်အဖွဲ့တွေထံက သိထားရတယ်။ စစ်တပ်ကတော့ တပ်ပျက်နေပြီ” လို့ ပြောပါတယ်။
ထီးလင်းမြို့နယ် ဒေသခံပြည်သူတွေကတော့ မိုးကုန်ပြီး မိုးစပါးရိတ်သိမ်းချိန်ဖြစ်နေတာကြောင့် ဒေသခံပြည်သူ့ကာကွယ်ရေးတပ်နဲ့ စစ်ကောင်စီတပ်တွေ တိုက်ပွဲဖြစ်ပွားမှာကို စိုးရိမ်နေကြ ပါတယ်။
