မကွေးတိုင်း၊ ဆောမြို့နယ်ထဲကို ဇွန် ၉ ရက် မနက်ပိုင်းမှာ စစ်အာဏာရှင် တပ်စစ်ကြောင်းတွေ အင်အား အလုံးအရင်းနဲ့ ထပ်မံဝင်​ရောက်လာတာကြောင့် ဒေသခံတွေကို ကြိုတင် သတိပေး ထားတယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ယောအလင်းတန်းအဖွဲ့ရဲ့​ပြောရေးဆိုခွင့်ရှိသူ ကိုအောင်ကြီးက “စစ်တပ်စစ်ကြောင်းတွေက လောင်းရှည်ဘက်ကနေ ဆောနယ်ထဲကို ဆော-လောင်းရှည်လမ်းအတိုင်း စစ်ကြောင်း ၂ ခုခွဲပြီးဝင် လာနေတယ်။ ပထမရှေ့ပွိုင့်စစ်ကြောင်းမှာက ခိုးလာတဲ့ဆိုင်ကယ်တွေနဲ့ ဘေးတွဲဆိုင်ကယ်တွေ သုံးပြီး အင်အား ၁၀၀ လောက်ပါတယ်။ ဒုတိယစစ်ကြောင်းကလည်း လောင်းရှည်ကနေပဲ ချောဆွဲ လာတဲ့ ဖောကား ၄ စီး၊ ကားသေး ၄ စီးနဲ့ ခန့်မှန်းအင်အား ၃၀၀ လောက်ပါလာတယ်” လို့ ပြောပါတယ်။

ဆော-လောင်းရှည်လမ်းပိုင်းပေါ်က တောင်ဘို့ကြီး၊ သီးကုန်းကျေးရွာတွေနဲ့ အနီးအနား ကျေးရွာတွေ က ပြည်သူတွေအနေနဲ့သတိနဲ့ထိုင်ကြဖို့အပြင် ဒေသခံတွေအနေနဲ့ အဆိုပါလမ်းပိုင်းကို ယာယီ ရှောင်ရှား သွားလာကြဖို့ တိုက်တွန်းထားတယ်လို့လည်း ဆိုပါတယ်။

ဆောမြို့နယ် ပကဖ တာဝန်ခံက “ဆောမြို့ပေါ်မှာလည်း ပြီးခဲ့တဲ့ ၂ ရက်နေ့ကတည်းက ကန်ပက်လက် ဘက်ကနေ အင်အား ၁၅၀ ဝန်းကျင်လောက်နဲ့ ပြန်ဆင်းလာတဲ့စစ်ကြောင်းက ဆောမြို့ပေါ်မှာ အဖွဲ့​ ၄ ဖွဲ့ခွဲအထိုင်ချပြီး စစ်ရှောင်ပြည်သူတွေရဲ့ လူမရှိကြတဲ့အိမ်တွေထဲကိုဖေါက်ထွင်းပစ္စည်းတွေခိုးရင်းနဲ့ အခု လောင်းရှည်ဘက်က ဆင်းလာတဲ့အဖွဲ့တွေကိုစောင့်နေကြတာဖြစ်နိုင်တယ်။ အရင်အင်အား ၁၅၀ လောက်ရယ် အခုလာကြတဲ့ အင်အား ၄၀၀ လောက်နဲ့ပေါင်းပြီး သူတို့ရဲ့ ရက် ၁၀၀ စီမံချက် အရ ဆောမြို့နယ်ကို အပြည့်အဝထိန်းချုပ်နိုင်ဖို့အတွက် အင်အားတွေအလုံးအရင်းပေါင်းပြီး ရွာတွေ ဘက်ကို စစ်ကြောင်းတွေထိုးနိုင်တယ်လို့ ယူဆရတယ်”လို့ ပြောပါတယ်။

ဇွန် ၄ ရက်၊ မနက်ပိုင်းမှာလည်း စစ်တပ်လက်အောက်ခံ မကွေးလေတပ်ကနေတက်လာတဲ့ Y12 လေယာဉ်နဲ့ ဆောမြို့ပေါ်ကို ထောက်ပံ့ရေးအထုပ် ၂၄ ထုတ်ကို ၁၀ ကြိမ်ထက်မနည်း ချထားပေး ခဲ့တယ်လို့  သူကဆက်ပြောပါတယ်။

ပြီးခဲ့တဲ့လ တတိယပတ်အတွင်း ဆောမြို့နယ်ထဲကို စစ်တပ်ဘက်က စစ်ကြောင်းထိုးဝင်ရောက်စဥ် ကလည်း တပြင်းကျေးရွာက ကျောင်းထိုင်ဆရာတော် တပါး၊ အထက်တန်းပြ ရူပဗေဒ ဘာသာရပ်သင် CDM ကျောင်းဆရာ ဦးမျိုးမင်းကျော်၊ အမျိုးသား ၂ ယောက်၊ အမျိုးသမီး တယောက်တို့အပြင် ရွာသာကျေးရွာသား တယောက်တို့ကို အကြောင်းမဲ့ သတ်ဖြတ်သွားခဲ့ ပါသေးတယ်။