ရှမ်းပြည်နယ်တောင်ပိုင်း၊ မိုင်းကိုင်မြို့နယ်ရှိ ရှမ်းပြည်တိုးတက်ရေးပါတီ(SSPP) တပ်စခန်းငယ် ၂ ခုနဲ့ ကျေးရွာအုပ်ချုပ်ရေး တာဝန်ရှိသူရဲ့ နေအိမ်ကို ရှမ်းပြည်ပြန်လည်ထူထောင်ရေးကောင်စီ (RCSS) တပ်ဖွဲ့က ဝင်ရောက်ဖျက်ဆီးသွားတယ်လို့ SSPP က သတင်းထုတ်ပြန်ပါတယ်။
ရှမ်းပြည်တပ်မတော် RCSS ဘက်က အင်အား ၁၀၀ ကျော်နဲ့ စစ်ကြောင်း ၃ ကြောင်းခွဲကာ နိုဝင်ဘာ ၂၅ ရက် မနက်ပိုင်းမှာ ဝင်ရောက်တိုက်ခိုက်ခဲ့တဲ့အပြင် ဒေသခံပြည်သူတယောက် အပါအဝင် SSPP တပ်ဖွဲ့ဝင် ၈ ယောက်ကို ဖမ်းဆီးခေါ်ဆောင်သွားပြီး ကျေးရွာကော်မတီဝင် တယောက်ကိုလည်း ပစ်ခတ်သတ်ဖြတ်ကာ နေအိမ်ကိုပါ မီးရှို့ဖျက်ဆီးသွားကြောင်း ထုတ်ပြန်ချက်မှာ ဖော်ပြထားပါတယ်။
RCSS စစ်ကြောင်း ၂ ကြောင်းဟာ မိုင်းကိုင်မြို့နယ် ပန်ပွဲကျေးရွာအနီးက SSPP တပ်စခန်းငယ် ၂ ခုကို ဝင်ရောက်တိုက်ခိုက်ပြီးနောက် SSPP တပ်သား ၄ ယောက်ကို ဖမ်းဆီးသွားကာ စခန်းမှာသုံးစွဲနေတဲ့ ဆိုင်ကယ် ၄ စီး၊ ကားတစီးအပါအဝင် စခန်းတွေကို မီးရှို့ဖျက်ဆီးသွားတယ်လို့ ထည့်သွင်းရေးသားထား ပါတယ်။
ကျန်ရှိတဲ့ RCSS စစ်ကြောင်းတကြောင်းမှာ ပန်ပွဲကျေးရွာရှိ ရွာကော်မတီဝင်တယောက်ရဲ့ နေအိမ်ကို လက်နက်ကြီး၊ လက်နက်ငယ်တွေနဲ့ ပစ်ခတ်တိုက်ခိုက်ပြီး နေအိမ်တွင်းရှိ အဖိုးတန် ရွှေငွေ၊ ပစ္စည်းတွေယူဆောင်ကာ အိမ်ရှင်ဖြစ်သူ ဦးကန်ခမ်းကို သတ်ဖြတ်ပြီး နေအိမ်ကိုလည်း မီးရှို့ဖျက်ဆီးခဲ့ကြောင်း RCSS က ထုတ်ပြန်ထားတာပါ။
ဒါ့အပြင် ပန်ပွဲကျေးရွာထဲက SSPP တပ်ဖွဲ့ဝင် ၃ ယောက်နဲ့ ဒေသခံပြည်သူ တယောက်တို့ကို ထပ်မံဖမ်းဆီး သွားကြောင်း သိရပါတယ်။
လက်ရှိ ကာလမှာ ရှမ်းလက်နက်ကိုင်တပ် ၂ ဖွဲ့ အပစ်ရပ်ပြီး ပေါင်းစည်းဖို့အတွက် နှစ်ဖက်တပ်နဲ့ တွေ့ဆုံညှိနှိုင်းနေတဲ့ ကာလမှာ RCSS က အခုလိုဝင်ရောက်တိုက်ခိုက်တာဖြစ်တယ်လို့ SSPP က ထုတ်ပြန်ထားပါတယ်။
