ပို့ကုန်ရငွေမသွင်းတာကြောင့် အမည်ပျက်စာရင်းသွင်းခဲ့တဲ့ ကုမ္ပဏီတွေထဲကနေ ဦးတေဇပိုင် ကုမ္ပဏီအပါအဝင် ၁၇ ခုကို စာရင်းက ပြန်ဖျက်လိုက်ပြီလို့ စစ်အာဏာရှင်ဩဇာခံ ဗဟိုဘဏ်က ဧပြီ ၂၇ ရက်မှာ ထုတ်ပြန်ပါတယ်။
၂ဝ၂ဝ ပြည့်နှစ်အတွင်း ပို့ကုန်တင်ပို့ခဲ့ပြီး ပို့ကုန်ရငွေပြန်လည်မဝင်ရောက်တဲ့ ကုမ္ပဏီတွေထဲက အမေရိကန်ဒေါ်လာ ၅ သိန်းနဲ့အထက်ရှိတဲ့ ကုမ္ပဏီ ၂၈ ခု၊ ၂ဝ၂၁ ခုနှစ်အတွင်း ပို့ကုန်တင်ပို့ခဲ့ပြီး ပို့ကုန်ရငွေ ပြန်လည်မဝင်ရောက်တဲ့ ကုမ္ပဏီတွေထဲက အမေရိကန်ဒေါ်လာ ၅ သိန်းနဲ့ အထက်ရှိတဲ့ ကုမ္ပဏီ ၅၅ ခု၊ ၂ဝ၁၆ ခုနှစ်ကနေ ၂ဝ၂ဝ ပြည့်နှစ်အတွင်း ပို့ကုန်တင်ပို့ခဲ့ပြီး ပို့ကုန်ရငွေ ပြန်မဝင်တဲ့ ကုမ္ပဏီ ၁၉၇ ခု၊ ၂၀၂၁ ခုနှစ် ဇန်နဝါရီ ၁ ရက်ကနေ ၂၀၂၅ ခုနှစ်၊ မတ် ၃၁ ရက်တွင်း ပို့ကုန်တင်ပို့ခဲ့ပြီး ပို့ကုန်ရငွေ ပြန်လည်မဝင်ရောက်တဲ့ ကုမ္ပဏီ ၂၈၇ ခုတို့ကို အမည်ပျက်စာရင်းသွင်းပြီး တာဝန်ရှိသူတွေကို မြန်မာပြည် ဝင်/ထွက်ခွင့် တားဆီးခဲ့တယ်လို့ ဆိုပါတယ်။
အဲဒီ ကုမ္ပဏီတွေထဲက ၂၉ ခုဟာ ပို့ကုန်ရငွေတွေ အပြည့်အဝပြန်ပေးပြီးဖြစ်တာကြောင့် ၂၀၂၅ ခုနှစ်၊ ဒီဇင်ဘာ ၃၁ ရက်မှာ ကုမ္ပဏီနဲ့ ဒါရိုက်တာအဖွဲ့ဝင်တို့အပေါ် အမည်ပျက်စာရင်းသွင်းတာနဲ့ မြန်မာပြည် ဝင်/ထွက်ခွင့်တားဆီးတာကနေ ပယ်ဖျက်ခဲ့ပြီးဖြစ်တယ်လို့ ဆိုပါတယ်။
အခုအခါမှာတော့ ဦးတေဇရဲ့ ထူး ကုမ္ပဏီအပါအဝင် ၁၇ ကိုလည်း ပို့ကုန်ရငွေတွေ အပြည့်အဝ ပြန်ပေးပြီးဖြစ်တာကြောင့် ကုမ္ပဏီနဲ့ ဒါရိုက်တာအဖွဲ့ဝင်တို့အပေါ် အမည်ပျက်စာရင်း သွင်းတာနဲ့ မြန်မာပြည် ဝင်/ထွက်ခွင့်တားဆီးတာကနေ ပယ်ဖျက်ခဲ့ပြီးဖြစ်တယ်လို့ ဆိုပါတယ်။
