မကွေးတိုင်းအတွင်း စစ်မှုထမ်းဥပဒေနဲ့ စစ်ကောင်စီတပ်မှာ စစ်မှုထမ်းခဲ့ရသူ ၂ ယောက် လက်နက်ခဲယမ်းတွေနဲ့အတူ အလင်းဝင်ရောက်လာတယ်လို့ နို၀င်ဘာ ၁၀ ရက်မှာ မကွေးအရှေ့ခြမ်းဗိဿနိုးနယ်မြေ ပြည်သူ့ကာကွယ်ရေးတပ်တော် (ကြိုးကြာနီတပ်ရင်း ၇) ကနေ သတင်းထုတ်ပြန်ပါတယ်။
ကြိုးကြာနီတပ်ရင်း ၇ ရဲ့ ပြန်ကြားရေးတာ၀န်ခံတယောက်က “အလင်းဝင်လာသူ ၂ ဦးလုံးက တပ်သားသစ်အဖြစ် အဓမ္မစုဆောင်းခံခဲ့ကြရသူတွေ ဖြစ်ပါတယ်။ စစ်တပ်က သူတို့ကိုပေးထားတဲ့ လက်နက်ခဲယမ်းတွေ ယူဆောင်ပြီး ကျနော်တို့တပ်ရင်းဆီကို အလင်းဝင်ရောက်လာခဲ့တာပါ” လို့ ပြောပါတယ်။
အလင်းဝင်ရောက်လာကြတဲ့ စစ်ကောင်စီတပ်ဖွဲ့၀င် ၂ ယောက်တို့ဟာ MA11 သေနတ် ၂ လက်၊ ကျည်ဘောက် ၆ ခု၊ ၅ ဒသမ ၅၆ ကျည်အတောင့် ၂၀၀ နီးပါးအပါအ၀င် လက်ပစ်ဗုံး ၁ လုံးနဲ့ ၁၄ နင်းမိုင်း ၁ လုံးတို့နဲ့အတူ အလင်းဝင်ရောက်လာခဲ့ကြတာဖြစ် ပါတယ်။
ကြိုးကြာနီတပ်ရင်း ၇ ရဲ့ တာဝန်ခံတယောက်က “လုံခြုံရေးကြောင့် သူတို့နာမည်တွေကို ထုတ်ဖော်မပြောပြတာကို နားလည်ပေးပါ။ စစ်တပ်ထဲမှာ သူတို့ တာဝန်ထမ်းဆောင်ခဲ့ကြတုန်းက တွေ့ကြုံခဲ့ရတဲ့ အတွေ့အကြုံတွေ၊ အဖြစ်အပျက်တွေ၊ ခံစားချက်တွေကို မေးမြန်းပြီး ဆက်လက်ထုတ်ပြန်ပေးသွားမှာပါ”လို့ DVB ကို ပြောပါတယ်။
အဆိုပါ အလင်းဝင်လာသူ ၂ ယောက်ကို ကြိုးကြာနီတပ်ရင်း ၇ က တာ၀န်ယူစောင့်ရှောက်ထားပြီး လုံခြုံတဲ့နေရာကို ပို့ဆောင်ထားကာ ဂုဏ်ပြုဆုငွေ ပေးအပ်ဖို့အတွက်ကိုလည်း စီစဥ်ဆောင်ရွက်နေတယ်လို့ သိရပါတယ်။
အာဏာသိမ်း စစ်ကောင်စီတပ်လက်အောက်မှာ တာဝန်ထမ်းဆောင်နေကြတဲ့ စစ်ကောင်စီတပ်ဖွဲ့ဝင်တွေအနေနဲ့လည်း နီးစပ်ရာပြည်သူ့ကာကွယ်ရေးတပ်ဖွဲ့တွေနဲ့ အမြန်ဆုံး ချိတ်ဆက်ပြီး ပြည်သူ့ရင်ခွင်ခိုလှုံကြဖို့ တိုက်တွန်းထားတယ်လို့ သိရပါတယ်။
