ရခိုင်ပြည်နယ်၊ အမ်းမြို့ရှိ စစ်ကောင်စီရဲ့ အနောက်ပိုင်းတိုင်းစစ်ဌာနချုပ် (နပခ) တိုက်ပွဲကနေ ထွက်ပြေးလာတဲ့ စစ်ကောင်စီတပ်သား ၄ ယောက်ကို ဖမ်းဆီးရမိတယ်လို့ ချင်းကာကွယ်ရေးတပ်-အရှိုထံက သိရပါတယ်။
အာရက္ခတပ်တော် (AA) က ထိုးစစ်ဆင်တိုက်ခိုက်မှုကြောင့် ထွက်ပြေးလာတဲ့ စစ်ကောင်စီ တပ်သား ၄ ယောက်ကို မကွေးတိုင်းနဲ့ ရခိုင်ပြည်နယ်စပ် CDF - Asho ရှေ့တန်း စစ်ဆင်ရေးဒေသတနေရာမှာ ဖမ်းဆီးရမိခဲ့တာဖြစ်ပြီး ခမရ ၃၇၃ နဲ့ ခမရ ၃၇၁ က တပ်သားတွေဖြစ်တယ်လို့ CDF-Asho တာဝန်ခံ ဆလိုင်းရိုးချင်းက DVB ကို ပြောပါတယ်။
“၃၇၃ က ၂ ယောက်ကတော့ အာရက္ခတပ်တော် AA က ၃၇၃ ကို သိမ်းချိန်မှာ စခန်းတွင်း ၈ ယောက်ပဲ ကျန်တော့ချိန်မှာ ကြောက်လန့်ပြီး ထွက်ပြေးလာတယ် ပြောပါတယ်။ ၃၇၁ က ၂ ယောက်ကတော့ နယ်ခြားဂိတ် ကံမြင်းကန်ဂိတ်အနီး ကြက်ရေစမ်းမှာ စစ်ကြောင်းချထားချိန် ကင်းချိန်အတွင်း ပြေးလာတယ်လို့ ထွက်ဆိုထားပါတယ်။”
အောက်တိုဘာ ၃၁ ရက်မှာ အမ်းမြို့ (နပခ)ရှိ ခမရ ၃၇၃ က ထွက်ပြေးလာတဲ့ စစ်ကောင်စီတပ်သား သက်နိုင် (ပစ - ၁၀၄၆၀၁) နဲ့ သက်နိုင်ဦး (ပစ - ၁၀၄၆၀၀) တို့ ၂ ယောက်အား ဖမ်းဆီးရမိခဲ့ပြီး နိုဝင်ဘာ ၃ ရက်မှာ ခမရ ( ၃၇၁ )၊ ကြက်ရေစမ်း နယ်ခြားဂိတ် ရှေ့တန်းစစ်ကြောင်းက ထွက်ပြေးလာတဲ့ စစ်ကောင်စီတပ်သား ရဲမွန်ဦး (ပစ - ၁၀၄၉၇၉) နဲ့ ကျော်မင်းဦး (ပစ - ၁၀၄၉၈၄) တို့ ၂ ယောက်ကို ထပ်မံဖမ်းဆီးရမိခဲ့တာပါ။
“လတ်တလောတော့ စိတ်ပိုင်းဆိုင်ရာ ပုံမှန်မဟုတ်ကြသေးတဲ့အတွက် ထိန်းသိမ်း မေးမြန်းရုံပဲ ရှိပါသေးတယ်ဗျ။ ဆက်လက် လုပ်ဆောင်ဖို့ကတော့ ဖြေကြားမှုတွေနဲ့ စုံစမ်းသိရှိရတဲ့ အခြေနေပေါ် မူတည်နေသေးတာမို့ ဆုံးဖြတ်ချက်တော့ မချရသေးပါဘူးဗျ” လို့ ဆလိုင်းရိုးချင်းက ပြောပါတယ်။
ချင်းကာကွယ်ရေးတပ် - အရှို ( CDF - Asho ) အနေနဲ့ ဖမ်းဆီးရမိတဲ့ ရန်သူ့စစ်သုံ့ပန်းတွေကို နိုင်ငံတကာစစ်ဘက်ဆိုင်ရာ ဥပဒေတွေနဲ့အညီ စနစ်တကျ ထိန်းသိမ်းထားတယ်လို့ အသိပေးထုတ်ပြန်ထားပါသေးတယ်။
AA အနေနဲ့ အမ်းမြို့ကို သိမ်းပိုက်နိုင်ဖို့ စစ်ကောင်စီတပ်စခန်းတွေကို အပြင်းအထန်ထိုးစစ်ဆင်နေပြီး စစ်ကောင်စီတပ်ဘက်က အကျအဆုံးတွေများကာ တပ်စခန်း တခုပြီးတခု လက်လွှတ်နေရပါတယ်။
