မန္တလေးတိုင်း၊ တောင်သာမြို့နယ်မှာ ပျူစောထီးစခန်း ၁ ခုကို နိုဝင်ဘာ ၁ ရက်နေ့ မနက်မှာ တိုက်ခိုက်သိမ်းပိုက်ခဲ့ပြီး လက်နက်ခဲယမ်းတွေ သိမ်းဆည်းရရှိခဲ့တယ်လို့ ပြည်သူ့လွတ်မြောက်ရေး တပ်မတော် အမှတ် ၈၁၅ တပ်ဖွဲ့ဆီကနေ သိရပါတယ်။

အမှတ် ၈၁၅ တပ်ဖွဲ့ရဲ့ ပြန်ကြားရေးတာဝန်ခံတယောက်က “တောင်သာမြို့နယ်ထဲက တလိုင်းရပ်ရွာ။ သူတို့ဒေသအခေါ်ကတော့ ရွာသစ်ရွာပေါ့။ အဲဒီမှာရှိတဲ့ ပျူစောထီးအထိုင်စခန်းကို တိုက်ခိုက်သိမ်းပိုက်နိုင်ခဲ့တာပါ။ လက်နက်ခဲယမ်းတချို့လည်း သိမ်းဆည်းရရှိခဲ့ပါတယ်” လို့ ပြောပါတယ်။

စခန်းသိမ်းတိုက်ပွဲအတွင်း ပျူစောထီးအထိုင်စခန်းကနေ ကာဘိုင်သေနတ် ၁ လက်၊ ရှော့ဂန်း ၁ လက်၊ ၇.၆၂ ကျည် ၁၉၅ တောင့်၊ ကာဘိုင်ကျည် ၆၅ တောင့်၊ ရှော့ဂန်းကျည် ၃၇ တောင့်၊ MG1 လက်ပစ်ဗုံး ၁ လုံး၊ ကျည်ကာ ၁ ထည်၊ ငွေ ၁ သိန်းကျော်နဲ့ စစ်ယူနီဖောင်းအများအပြား သိမ်းဆည်းရရှိခဲ့တယ်လို့ ဆိုပါတယ်။

အမှတ် ၈၁၅ တပ်ဖွဲ့ရဲ့ တာဝန်ခံတယောက်က “တိုက်ခိုက်ချိန်က နာရီဝက်လောက်ပဲ ကြာတယ်ဗျ။ သူတို့စခန်းကကောင်တွေ ဒဏ်ရာရပြီး ထွက်ပြေးသွားကြတယ်။ စခန်းထဲကပစ္စည်းတွဝ၀င်သိမ်းတော့ အလောင်းတွေတော့မတွေ့ဘူး။ သွေးကွက်တချို့တော့ တွေ့ခဲ့ရတယ်” လို့ DVB ကို ပြောပါတယ်။

ပြည်သူ့လွတ်မြောက်ရေးတပ်မတော် အမှတ် ၈၁၅ တပ်ဖွဲ့ (အနောက်မြောက်စစ်ဒေသ) က  တော်လှန်ရေးတပ်ဖွဲ့ဝင်တွေက ဝင်ရောက်တိုက်ခိုက်ခဲ့​ကြတာဖြစ်ပြီး ဒဏ်ရာရရှိသူမရှိဘဲ ပြန်လည် ဆုတ်ခွာလာနိုင်ခဲ့ကြတယ်လို့ သိရပါတယ်။