လှည်းကူးမြို့နယ်၊ ရန်ကုန် - မန္တလေး အမြန်လမ်းပေါ်က ၀ မိုင် တိုးဂိတ်မှာ ဒီနေ့နိုဝင်ဘာ ၃ ရက် မနက်အစောပိုင်းက ကား ၅ စီးဆင့်တိုက်လို့ အမျိုးသမီး ၁ ယောက် သေဆုံးပြီး ၄ ယောက် ဒဏ်ရာရရှိခဲ့တယ်လို့ အမြန်လမ်းမီးသတ်တပ်ဖွဲ့ဆီက သိရပါတယ်။
ရန်ကုန်မြို့အဝင် တိုးဂိတ်နားမှာ ဒီနေ့မနက် ၄ နာရီကျော်က တိုးဂိတ်ဖြတ်သန်းဖို့ တန်းစီ စောင့်ဆိုင်းနေတဲ့ ကားတွေကို ခရီးသည်တင်ကား ၁ စီးက အရှိန်မထိန်းနိုင်ဘဲ ဝင်တိုက်မိခဲ့ရာက ဆင့်ကဲတိုက်မိခဲ့တာလို့ နယ်ခံလူမှုကူညီရေးအသင်းဝင်တယောက်က ပြောပါတယ်။
“ရှေ့က တန်းစီစောင့်နေတဲ့ Express ကား ၄ စီးကို နောက်ကနေ ဝင်တိုက်တာပါ။ မနက် အစောကြီးဆိုတော့ ယာဉ်မောင်းက အိပ်ငိုက်ပြီးဝင်တိုက်တာထင်တယ်။ ဝင်တိုက်တဲ့ကားကပဲ သေဆုံးတာရော ထိခိုက်တာရောရှိတာပါ”
ကား ၅ စီး ဆင့်တိုက်မိလို့ ရွှေပွင့်ဖြူ ကားပေါ်ပါ ပွင့်ဖြူမြို့နယ်နေသူ အသက် ၂၃ နှစ်အရွယ် မသင်းယမုံဟာ အခင်းဖြစ်နေရာမှာ သေဆုံးခဲ့သလို ယာဉ်မောင်းနဲ့ ယာဉ်အကူ အမျိုးသား ၂ ယောက်၊ ခရီးသည်အမျိုးသား ၂ ယောက်လည်း ထိခိုက်ဒဏ်ရာတွေရရှိသွားတာကြောင့် လှည်းကူးဆေးရုံကို ပို့ဆောင်ပေးခဲ့ကြရတယ်လို့ သိရပါတယ်။
ဒါ့အပြင် ခရီးသည်တင်ယာဉ်တိုက်မှုကြောင့် မြတ်မန္တလာထွန်း၊ နယူးရွှေမြင့်မိုရ်၊ ရွှေပွင့်ဖြူအပါအဝင် ခရီးသည်တင်ယာဉ် ၅ စီးရဲ့ ရှေ့လေကာမှန်တွေ ပျက်စီးခဲ့တယ်လို့လည်း နယ်ခံ လူမှုကူညီရေး အသင်းဆီက သိရပါတယ်။
ပြီးခဲ့တဲ့ အောက်တိုဘာ ၂၂ ရက်နေ့ကလည်း နေပြည်တော်၊ တပ်ကုန်းမြို့နယ်၊ ရန်ကုန်-မန္တလေး အမြန်လမ်းမှာ ရပ်ထားတဲ့ကားကို နောက်ကကားတစီးကဝင်တိုက်မိရာက ဝင်တိုက်တဲ့ကားပေါ်ပါသူ ၂ ယောက် သေဆုံးခဲ့ပြီး ၁၂ ယောက် ဒဏ်ရာရခဲ့တယ်လို့ မီးသတ်တပ်ဖွဲ့ရဲ့ သတင်းထုတ်ပြန်ချက်တွေအရ သိရပါတယ်။
