တောင်ကိုရီးယားဟာ မြောက်ကိုရီးယားရဲ့ ပဲ့ထိန်းဒုံးကျည်တည်ဆောက်မှုကို ကန့်သတ်ဖို့အတွက် လောင်စာဆီခဲသုံး ဒုံးကျည်တွေ ထုတ်လုပ်ရာမှာ လိုအပ်တဲ့ ပစ္စည်းတွေအပေါ် ပို့ကုန်ထိန်းချုပ်မှုအသစ်ကို အောက်တိုဘာ ၃၁ ရက်မှာ ကြေညာခဲ့ပါတယ်။
ပို့ကုန်ထိန်းချုပ်မှုထဲမှာ မြောက်ကိုရီးယားအနေနဲ့ ကိုယ်ပိုင်ထုတ်လုပ်ဖို့ အခက်တွေ့နေတဲ့ ဒုံးကျည်ကိုယ်ထည်တွေနဲ့ အပူခံပြွန်တွေလို ပစ္စည်းအမျိုးအစား ၁၅ ခု အကျုံးဝင်မှာဖြစ်ပြီး နိုင်ငံခြားရေးဝန်ကြီးဌာနက ထုတ်ပြန်ချက်မှာ ဖော်ပြထားပြီး လက်ရှိ နိုင်ငံတကာ ပို့ကုန်ထိန်းချုပ်မှုတွေကို အားဖြည့်လုပ်ဆောင်ခြင်းကနေ မြောက်ကိုရီးယားကို ပစ်မှတ်ထား ပိတ်ဆို့အရေးယူမှုတွေကို တင်းကျပ်နိုင်မယ်လို့ မျှော်မှန်းထားပါတယ်။
မြောက်ကိုရီးယားရဲ့ ကြာသပတေးနေ့က တိုက်ချင်းပစ်ဒုံးကျည် (ICBM) ကို ပစ်လွှတ်ခဲ့တဲ့ လုပ်ရပ်ကို တောင်ကိုရီးယားစစ်တပ်က “ဥပဒေမဲ့လုပ်ရပ်နဲ့ မဆင်မခြင် ရန်စခြင်း” လို့ ဖော်ပြခဲ့ပါတယ်။
အမေရိကန်နဲ့ တောင်ကိုရီးယား လေတပ်တို့ဟာ မြောက်ကိုရီးယားရဲ့ ဒုံးကျည်ပစ်လွှတ်မှုကို တုံ့ပြန်တဲ့အနေနဲ့ အောက်တိုဘာ ၃၁ ရက်က ပူးတွဲလေကြောင်းလေ့ကျင့်မှု ပြုလုပ်ခဲ့ကြောင်း တောင်ကိုရီးယားစစ်တပ်က ပြောကြားခဲ့ပါတယ်။
တောင်ကိုရီးယား ပူးတွဲစစ်ဦးစီးချုပ်များ (JCS) က ထုတ်ပြန်တဲ့ ဗီဒီယိုဖိုင်ထဲမှာ တောင်ကိုရီးယားရဲ့ KF-16 တိုက်လေယာဉ်တွေနဲ့ အမေရိကန်ရဲ့ F-16 တိုက်လေယာဉ်တွေ ပျံသန်းနေတာကို မြင်တွေ့ရပါတယ်။
မြောက်ကိုရီးယားဟာ ကြာသပတေးနေ့က တိုက်ချင်းပစ်ဒုံးကျည်တစင်း စမ်းသပ်ပစ်လွှတ်ခဲ့ပြီး ကမ္ဘာ့အင်အားအကြီးဆုံး ဗျူဟာမြောက်လက်နက်လို့ ခေါ်ဆိုတဲ့ ဒုံးကျည်ကို အဆင့်မြှင့်တင်ခဲ့ပါတယ်။
ကြာသပတေးနေ့ အစောပိုင်းက ပစ်လွှတ်မှုဟာ မြောက်ကိုရီးယားရဲ့ ပစ်လွှတ်ခဲ့ဖူးသမျှ ဒုံးကျည်တွေထဲမှာ ပျံသန်းချိန် ၈၇ မိနစ်နဲ့ အရှည်ဆုံး ပဲ့ထိန်းဒုံးကျည် စမ်းသပ်မှု ဖြစ်တယ်လို့ တောင်ကိုရီးယားက ပြောပါတယ်။
Source-Reuters
