မကွေးတိုင်း၊ ပခုက္ကူမြို့မရဲစခန်းကနေ ၂ ကြိမ်မြောက် ထွက်ပြေးလာတဲ့ ရဲတပ်သားတယောက်ဟာ ခဲယမ်းတချို့နဲ့အတူ အောက်တိုဘာ ၉ ရက်မှာ အလင်းဝင်လာ​တယ်လို့ Earthquake People's Defence Force ဆီကနေ သိရပါတယ်။

Earthquake People`s Defence Force ရဲ့ ပြန်ကြားရေးတာဝန်ခံက “အရင်တခေါက်က သေနတ်ယူပြီး ထွက်ပြေးလာတာကို သူ့စခန်းကသိသွားလို့ အချုပ်ထဲ ထည့်ထားတာ ခံခဲ့ရတယ်။ အခုပြန်လွတ်တဲ့အချိန် ကျနော်တို့ဆီ ပြန်ချိတ်ပြီး အလင်းဝင်လာတာပါ။ ပထမအကြိမ် ထွက်ပြေးလို့ မိသွားတုန်းတော့ သူ့အထက်အရရှိတွေက သူနဲ့ သူ့မိသားစုကို ဖိနှိပ်ချုပ်ချယ်တာတွေ အများကြီး ခံခဲ့ရတယ်လို့သိရတယ်” လို့ ပြောပါတယ်။

ပခုက္ကူမြို့မရဲစခန်းကနေ ထွက်ပြေးလာကာ အလင်းဝင်လာတဲ့သူဟာ ရဲဝန်ထမ်းလုပ်သက် ၇ နှစ်ရှိပြီး ပခုက္ကူမြို့မရဲစခန်းမှာ တာဝန်ကျတာ ၆ လနီးပါးရှိပြီဖြစ်တဲ့ အသက် ၃၁ နှစ်အရွယ် ရဲတပ်သား အောင်ဗိုလ်မင်း၊ ကိုယ်ပိုင်အမှတ်၂၈၀၆၁၇ ဖြစ်ပြီး အူဇီအမျိုးအစားကျည်ဘောက် ၂ ခုနဲ့ ၉ မမ ကျည် ၁၀၀ တို့ကို ယူဆောင်ပြီး အလင်းဝင်ရောက်လာတာဖြစ်တယ်လို့ ဆိုပါတယ်။

Earthquake People`s Defence Force ရဲ့ တာဝန်ခံတယောက်က “အလင်းဝင်ရောက်လာတဲ့သူ အားလုံးကို နွေးနွေးထွေးထွေး ကြိုဆိုပါတယ်။ ထိုက်သင့်တဲ့ ဆုကြေးငွေတွေကို ချီးမြှင့်ပြီးတော့လည်း လုံခြုံတဲ့နေရာကို ပို့ဆောင်ပေးပါတယ်။ အလင်းဝင်လာသူ အားလုံးအတွက် အစစအရာရာ တာဝန်ယူတဲ့အတွက် စစ်ကောင်စီ အောက်ကနေ ထွက်ပြီး အလင်းဝင်လာချင်ကြသူတွေအားလုံး ကျနော်တို့ဆီကို အချိန်မရွေး ဆက်သွယ်ပြီး အလင်းဝင်ရောက်ကြဖို့ ဖိတ်ခေါ်လိုပါတယ်” လို့ ပြောပါတယ်။

ပခုက္ကူမြို့နယ်မှာ  ဧပြီ ၅ ရက်ကနေ စက်တင်ဘာ ၂၃ ရက်အထိ စစ်ကောင်စီတပ်သား၊ ရဲတပ်ဖွဲ့ဝင်နဲ့ ပြည်သူ့စစ်တပ်ဖွဲ့ဝင် ၆ ယောက် အလင်းဝင်လာခဲ့ကြတယ်လို့ Earthquake People's Defence Force ကနေ သိရပါတယ်။