ရန်ကုန်၊ အလုံမြို့နယ်မှာ ထိုးသွင်းဒဏ်ရာ ၁၇ ချက်နဲ့ သတ်ဖြတ်ခံထားရတဲ့ အမျိုးသမီး ရုပ်အလောင်းကို စက်တင်ဘာ ၂၈ ရက် ဒီနေ့မနက် ၆ နာရီလောက်က တွေ့ရှိခဲ့တယ်လို့ မြို့ခံတွေကပြောပြီး သတ်တဲ့သူကို လေဆိပ်မှာ ဖမ်းမိထားပြီလို့ ရဲတပ်ဖွဲ့နဲ့ နီးစပ်သူဆီက သိရပါတယ်။
အလောင်းကို ဆင်မင်းရပ်ကွက်၊ စက်တွင်းလမ်း၊ တိုက်အမှတ် ၄၀ ရဲ့ ၄ လွှာနဲ့ ၅ လွှာကြား လှေကားမှာ တွေ့ရတာဖြစ်ပြီး သေဆုံးနေသူဟာ စစ်ကိုင်းတိုင်း၊ ဆားလင်းကြီးမြို့နယ်က အသက် ၂၂ နှစ်အရွယ် အသားလတ်လတ် ပိန်ပိန်ပါးပါး ပေါင်ချိန် ၁၀၀ ဝန်းကျင်ရှိတဲ့ မစုစုငြိမ်း ဖြစ်ပြီး အဲဒီတိုက်ရဲ့ ၆ လွှာ အခန်းမှာ သူငယ်ချင်းအမျိုးသမီး ၄ ယောက်နဲ့အတူ စုပေါင်းနေထိုင်သူဖြစ်ပါတယ်။
ရပ်ကွက်နေသူတယောက်က “သူက ဆားလင်းကြီးကနေလာတာ။ ဘယ်သူသတ်တယ်လို့တော့ အတိအကျ မသိသေးဘူး။ သေဆုံးနေတာက ပက်လက်ပါပဲ။ ဓားနဲ့အထိုးခံထားရတာက လည်ပင်းမှာ ၁ ချက်၊ နံရိုးဘက်မှာ ၁ ချက်၊ ရင်ဘတ်မှာ ၇ ချက်လောက်၊ လက်မှာ ၂ ချက်၊ ကျောကုန်းမှာ ၆ ချက်လောက်ရှိတယ်” လို့ ပြောပါတယ်။
သူ့ရဲ့ လက်ဖျံ၊ လည်ပင်းတည့်တည့်၊ ရင်ညွှန့်နဲ့ ကျောဘက်တို့မှာ ချွန်ထက်တဲ့ထိုးသွင်းဒဏ်ရာ ၁၇ ချက်ထက်မနည်းနဲ့ သေဆုံးနေတာဖြစ်ပြီး သေဆုံးသူအနီးက သွေးအိုင်ထဲမှာ ယောကျာ်းစီး ရှူးဖိနပ် ခြေရာနဲ့ ၄ လွှာအတက်မှာ ခေါက်ထီးတလက်ကျကျန်ခဲ့တာကို တွေ့ရပါတယ်။
ရဲတပ်ဖွဲ့နဲ့ နီးစပ်သူတယောက်က “တရားခံက မိထားပြီး။ စစ်နေတုန်းပါ။ ဂျပန်ကနေ လေယာဉ်နဲ့လာပြီး လာသတ်တာ။ အခု ဂျပန်ပြန်မယ့်အချိန် လေဆိပ်မှာ မိထားတာ။ အသေးစိတ်တော့ စစ်နေတုန်းပါ” လို့ ပြောပါတယ်။
အလုံမြို့မရဲတပ်ဖွဲ့ဝင်တွေ လာရောက်စစ်ဆေးချက်အရ အသတ်ခံရချိန်ဟာ မနက်အစောပိုင်း ၄ နာရီနဲ့ ၅ နာရီအကြားဖြစ်တဲ့အပြင် လူသတ်မှုကျူးလွန်သူကို မိထားပြီလို့ သိရပြီး သေဆုံးရုပ်အလောင်းကို သံဝေဂလူမှုကူညီရေးအသင်းယာဉ်နဲ့ ရန်ကုန်ဆေးရုံကြီးကို PR 025 အမှတ်နဲ့ ပို့ဆောင် ပေးထားပါတယ်။
