ရန်ကုန်မြို့တ‌နေရာမှာ စက်တင်ဘာ ၄ ရက်က ဖိရင်ကြွမယ် ထိရင်ချမယ်၊ China: Back Off From Myanmar ဆိုတဲ့ ခေါင်းစဉ်နဲ့ ဆန္ဒပြပွဲတခုကို ရန်ကုန်တော်လှန်ညီနောင် ၄ ဖွဲ့က ပြုလုပ်ခဲ့ပါတယ်။

Mayangone Democratic Front (MDF)၊  Owl Community၊ Linn Yaung Ni Youth Organization (LYNYO) နဲ့  Kyimyindaing Networks (KMD18) အဖွဲ့ ၄ ဖွဲ့က ပြုလုပ်ခဲ့တာပါ။

စစ်အာဏာရှင်ကို တိုက်ပွဲဝင်နေတဲ့ တော်လှန်ရေးဟာ မြန်မာနိုင်ငံသားတွေရဲ့ သွေးတွေ၊ ‌ချွေးတွေကို အရင်းအနှီးလုပ်ပြီး ချီတက်ခဲ့တာဖြစ်ပြီး မြန်မာနိုင်ငံရဲ့အနာဂတ်ကို မြန်မာနိုင်ငံသားတွေသာ ပိုင်ဆိုင်တာကြောင့် အာဏာရှင်မရှိတော့မဲ့ အနာဂတ်ဖန်တီးရာမှာ တရုတ်နိုင်ငံအနေနဲ့ ဖိနှိပ်မှုတွေ၊ အနိုင်ကျင့်မှုတွေ၊ နှောင့်ယှက်မှုတွေ မလုပ်ဖို့ ဆန္ဒထုတ်ဖော်ပြသခဲ့တာ ဖြစ်ပါတယ်။

ရန်ကုန်တော်လှန်ညီနောင် ၄ ဖွဲ့၊ သတင်းနဲ့ပြန်ကြားရေး တာဝန်ရှိသူက “တရုတ်ရဲ့ TNLA ဆီ ပို့တဲ့ ခြိမ်းခြောက်စာအပေါ် ရန်ကုန်တော်လှန်ညီနောင် ၄ ဖွဲ့အနေနဲ့ ပြည်သူ့ကိုယ်စား သဘောထား တုံ့ပြန်တဲ့အနေနဲ့ ‘အာဏာဖီဆန် တော်လှန်ပုန်ကန်’ တဲ့အနေနဲ့ လုပ်တာပါ” လို့ ပြောပါတယ်။

ဒီလှုပ်ရှားမှုဟာ မတရားတဲ့ အမိန့်အာဏာဟူသမျှ တာဝန်အရ ဖီဆန်နေကြတဲ့ ပြည်သူတွေရဲ့ ရင်တွင်းစကားကို တရုတ်အစိုးရနဲ့ သက်ဆိုင်သူတွေကို အသိ‌ပေးဖို့ ရည်ရွယ်တယ်လို့ သိရပါတယ်။

ရန်ကုန်တော်လှန်ညီနောင် ၄ ဖွဲ့ရဲ့ ထုတ်ပြန်ရေးစာမျက်နှာတွေမှာ မြန်မာနိုင်ငံထဲက ဘယ်တိုင်းရင်းသားကိုဖိဖိ၊ ဘယ်တိုင်းရင်းသားကိုထိထိ မြန်မာနိုင်ငံသားအားလုံး “ဖိရင်ကြွမယ် ထိရင်ချမယ်”၊ “If we burn, you burn with us” လို့လည်း ရေးသားဖော်ပြထားပါတယ်။