မွန်ပြည်နယ်၊ ရေးမြို့နယ်၊ လမိုင်းမြို့၊ ရှင်စောပုဈေးဝင်းအတွင်းရှိ ‘ယုဇန’ အာမခံ စိန်ရွှေရတနာဆိုင်မှာ စက်တင်ဘာ ၃ ရက် မနက်ပိုင်းက ကျပ်သိန်းထောင်ချီဖိုး အနုကြမ်းစီးခံခဲ့ရကြောင်း ဒေသခံတွေထံက သိရပါတယ်။
လမိုင်းမြို့၊ ရှင်စောပုဈေးအတွင်းက ‘ယုဇန’ ရွှေဆိုင်ပိုင်ရှင်ဖြစ်သူက မနေ့ မနက် ၉ နာရီဝန်းကျင်က ဆိုင်ဖွင့်ဖို့ပြင်ဆင်နေချိန် အမည်မသိ လက်နက်ကိုင်အမျိုးသား ၄ ယောက် ဆိုင်ကယ် ၂ စီးနဲ့ အသင့်စောင့်နေကာ ရွှေအလေးချိန် ၄၀ ကျပ်သားထည့်ထားတဲ့ ရွှေပုံးတပုံးကို လုယက်ကာ သေနတ်ဖောက် ထွက်ပြေးသွားတယ်လို့ စျေးသည်တယောက်က ပြောပါတယ်။
“ရွှေပုံးလိုက်ကို မသွားတာ။ ဘယ်အချိန်တည်းက လာစောင့်နေကြလဲတော့ သေချာမသိဘူး။ ရွှေဆိုင်ပိုင်ရှင်က ဆိုင်လာဖွင့်ပြီး ပစ္စည်းတွေထုတ်နေတဲ့အချိန် ဝင်လုပြီး သေနတ် ၂ ချက်ဖောက် ထွက်ပြေးသွားကြတာ။”
လုယက်ခံခဲ့ရတဲ့ ရွှေပုံးတန်ဖိုး ခန့်မှန်းခြေမှာ ပလက်တီနမ်နဲ့ ရွှေနားကပ် အရန် ၅၀၀ ဝန်းကျင် ထည့်ထားကာ တန်ဖိုးအားဖြင့် ကျပ်သိန်းပေါင်းထောင်နဲ့ချီ ရှိနိုင်ကြောင်းနဲ့ လုယက်ထွက်ပြေးတဲ့ အမျိုးသား ၄ ယောက်အနက် ဆိုင်တွင်းဝင်လုသူ ၂ ယောက်မှာ ဆိုင်ကယ်ဦးထုပ်ဆောင်းကာ မိုးကာအင်္ကျီဝတ်ဆင်ထားကြောင်း ‘ယုဇန’ ရွှေဆိုင်ပိုင်ရှင် ဖြစ်သူထံက သိရပါတယ်။
ရေးမြို့နယ်အတွင်းမှာ စစ်တပ်အာဏာသိမ်းပြီးနောက်ပိုင်း နယ်မြေတည်ငြိမ်အေးချမ်းမှု မရှိတာကြောင့် ခိုး၊ ဆိုး၊ လု၊ နှိုက်မှု ဖြစ်စဉ် မကြာခဏ ဖြစ်ပွားနေတဲ့အပြင် အခုလို သေနတ်ပြ လုယက်တဲ့ဖြစ်စဉ်တွေလည်း မကြာခဏဖြစ်ပွားနေတာကြောင့် ဒေသခံတွေအကြား ဝေဖန်ပြောဆိုတာတွေလည်း ရှိနေပါတယ်။
ဖြစ်စဥ်နဲ့ပတ်သက်ပြီး လမိုင်းမြို့မရဲစခန်းကို DVB က ဖုန်းနဲ့ဆက်သွယ်မေးမြန်းခဲ့ပေမဲ့ ပြန်လည်ဖြေကြားခြင်း မရှိပါဘူး။
အလားတူ ပြီးခဲ့တဲ့ ၂၀၂၃ ခုနှစ် ဇွန် ၁၃ ရက် မနက်ပိုင်းကလည်း ရေးမြိုနယ်၊ ရန်ကြီးအောင်ရပ်ကွက် ဝင်းသုခ ရွှေဆိုင်ဈေးဝင်းအတွင်းရှိ ‘ရွှေလဝန်း’ ရွှေဆိုင်မှာ အမည်မသိ အမျိုးသား ၂ ယောက်က ရွှေပုံးလုယက်မှု ဖြစ်ပွားခဲ့ပါတယ်။
