ပဲခူးတိုင်း၊ မင်းလှမြို့နယ်မှာ စစ်ကောင်စီစစ်ကြောင်းတခု တိုက်ခိုက်ခံရလို့ စစ်သား ၇ ယောက်ထက်မနည်းသေဆုံးခဲ့ပြီး စစ်ကိုင်းတိုင်း၊ ရေဦးမြို့နယ်မှာတော့ စစ်ကောင်စီက ဒရုန်းနဲ့ ဗုံးကြဲလို့ ပြည်သူ ၃ ယောက် ဒဏ်ရာရသွားပါတယ်။
မင်းလှမြို့နယ်၊ ဆားချောင်းကျေးရွာနားမှာ ဩဂုတ် ၃၀ ရက်နေ့၊ နေ့လယ် ၁၂ နာရီဝန်းကျင်က ဖြစ်ပွားခဲ့တဲ့တိုက်ပွဲအတွင်း စစ်ကောင်စီတပ်သား ၇ ယောက် ထက်မနည်းသေဆုံးပြီး အများအပြား ဒဏ်ရာရရှိခဲ့ကြတယ်လို့ သာယာဝတီခရိုင် ၃၈၀၃ တပ်ရင်း (MDF - Special Force) ဆီကနေ သိရပါတယ်။
၃၈၀၃ တပ်ရင်းရဲ့ စစ်ရေးတာဝန်ခံတယောက်က “ဒီကောင်တွေစစ်ကြောင်းက အင်အားမများလှဘူး။ သူတို့ ဆားချောင်းရွာကိုဝင်တဲ့အချိန်မှာတိုက်ပွဲဖြစ်ခဲ့တာပါ။ နှစ်ဖက်အပြန်အလှန်တိုက်ပွဲကတော့ ၁ နာရီဝန်းကျင်လောက်ကြာခဲ့တယ်။ သူတို့ဘက်က နေရာမှာတင် ၇ ကောင်သေတယ်။ ဒဏ်ရာရပြီး ပြေးသွားတဲ့ကောင်တွေလည်းရှိတယ်” လို့ DVB ကို ပြောပါတယ်။
နှစ်ဖက်တိုက်ပွဲအတွင်း စစ်ကောင်စီစစ်ကြောင်းရဲ့ 6 KG Payload သယ်ဆောင်နိုင်တဲ့ တိုက်ခိုက်ရေးအမျိုးအစား DIY Multirotor ဒရုန်း ၁ စီးကိုလည်း ပစ်ချသိမ်းဆည်းနိုင်ခဲ့တယ်လို့ ဆိုပါတယ်။
အဲဒီတိုက်ပွဲအတွင်းမှာ တောင်ပိုင်းတိုင်း၊ အမှတ် ၂ စစ်ဒေသခွဲက ရဲဘော် ၁ ယောက် မစိုးရိမ်ရတဲ့ ဒဏ်ရာရရှိခဲ့တယ်လို့လည်း သိရပါတယ်။
၃၈၀၃ တပ်ရင်းရဲ့ တာဝန်ခံတယော်ကက “ဒီရွာကို အခု လလယ်လောက်ကလည်း သူတို့ဘက်က စစ်ကြောင်းတကြောင်းဝင်ပြီး ရွာသားတွေရဲ့ပစ္စည်းတွေ လုသွားရုံတင်မကဘူး၊ ရွာကအိမ်တွေကို မီးရှို့သွားကြလို့ ရွာကအိမ်ခြေ ၃ ပုံ ၁ ပုံလောက် မီးလောင်ပျက်စီးသွားခဲ့တယ်။ အိမ်ခြေ ၃၀၀ ဝန်းကျင်လောက်ပေါ့။ အဲဒီ အိမ်တွေကိုမီးရှို့ပြီးပြန်သွားတဲ့ စစ်တပ်စစ်ကြောင်းကို လမ်းကနေ ဖြတ်တိုက်တုန်းကလည်း သူတို့ဘက်က မနည်းဘူး သေခဲ့ကြသေးတယ်။ အဲ့ဒါကိုမမှတ်ဘဲ ထပ်လာတော့ ထပ်တီးလိုက်တာ ထပ်သေကုန်ကြပြန်ရောပေါ့ဗျာ” လို့ ပြောပါတယ်။
အဲဒီတိုက်ခိုက်မှုကို တောင်ပိုင်းစစ်ဒေသ၊ အမှတ် ၂ စစ်ဒေသခွဲ၊ တိုင်းစစ်ဌာန (ပဲခူး) ရဲ့ ကွပ်ကဲမှုနဲ့ သာယာဝတီခရိုင် ၃၈၀၃ တပ်ရင်း (MDF - Special Force) က တိုက်ခိုက်ခဲ့ကြတာဖြစ်တယ်လို့ သိရပါတယ်။
စစ်ကိုင်းတိုင်း၊ ရေဦးမြို့နယ်၊ မုတ်ဆီရွာကို ဩဂုတ် ၃၀ ရက် နေ့ ည ၇ နာရီလောက်မှာ စစ်တပ်က ဒရုန်းနဲ့ ဗုံးကြဲလို့ ပြည်သူ ၃ ယောက် ကျည်စထိမှန် ဒဏ်ရာရခဲ့တယ်လို့ ဒေသခံတွေဆီက သိရပါတယ်။
ဒေသခံတယောက်က “မုတ်ဆီရွာ ကားလမ်းဘေးက အိမ်ကို ချခဲ့တာဗျ။ အဲဒီအိမ်ရဲ့ အရှေ့ ကွင်းပြင်ကိုကျပြီး အိမ်ထဲမှာ နေတဲ့ ပြည်သူ ၃ ဦးကို ထိမှန်ခဲ့တယ်ဗျ။ ထိမှန်တဲ့ပြည်သူ ၃ ဦး ကတော့ အမျိုးသားတွေပါ” လို့ ပြောပါတယ်။
ရေဦးမြို့၊ တိုင်းရင်းဆေးရုံမှာ တပ်စွဲထားတဲ့ စစ်တပ်ကလွှတ်တဲ့ ဒရုန်းဖြစ်တယ်လို့ သိရပြီး ဒရုန်းပျက်ကျပေါက်ကွဲခဲ့တာဖြစ်သလို ၄၀ မမ ဗုံးသီးကို သယ်လာတာလို့ ရေဦးမြို့ ABSDF ပြည်သူ့ကာကွယ်ရေးတပ် တာဝန်ရှိသူက ပြောပါတယ်။
ရေဦးမြို့နယ်ထဲမှာ စစ်ကောင်စီက စစ်ရေးပြင်ဆင်တာတွေလုပ်နေပြီး လူငယ်တွေကို ပေါ်တာဆွဲတာတွေလည်းရှိတယ်လို့ ဒေသခံတွေဆီကနေ သိရပါတယ်။
