တနင်္သာရီမြို့နယ်ရှိ စစ်ကောင်စီတပ်ရင်း၊ တပ်စခန်းနဲ့ တံတားစစ်ဆေးရေးဂိတ်တို့မှာ တပြိုင်နက်တည်း တိုက်ခိုက်ခံရပြီး ထိခိုက်သေဆုံးသူတွေ ရှိခဲ့တယ်လို့ မြိတ်ခရိုင် ပြည်သူ့ကာကွယ်ရေး ပူးပေါင်းစစ်ကြောင်း ၂ ပြန်ကြားရေးတာဝန်ခံက ပြောပါတယ်။

သြဂုတ် ၂၄ ရက် မနက် ၈ နာရီခွဲလောက်က အောက်ကင်းရွာအခြေစိုက် ခမရ ၅၅၇ တပ်ရင်းကို ဒေသတွင်း တော်လှန်ရေး ပူးပေါင်းတပ်ဖွဲ့တွေက သွားရောက်တိုက်ခိုက်ခဲ့ကြပြီး အပြန်အလှန် ပစ်ခတ်တိုက်ခိုက်မှု ဖြစ်ခဲ့တယ်လို့ သိရပါတယ်။

မြိတ်ခရိုင် စစ်ကြောင်း ၂ ပြန်ကြားရေးတာဝန်ခံ ကိုမျိုးကြီးက “မိနစ် ၃ဝ လောက်ကြာတယ်။ ၅၅၇ တပ်က လက်နက်ကြီးတွေ အမြောက်အမြား ပြန်ပစ်လို့ ပြန်ဆုတ်ခွာခဲ့ရတယ်။ ရဲဘော်တွေ ထိခိုက်မှုမရှိပါဘူး” လို့ ပြောပါတယ်။

ဒီတိုက်ခိုက်မှုအပြီး မနက် ၉ နာရီမှာ တနင်္သာရီမြို့ဝင် တံတားစစ်ဆေးရေးဂိတ်နဲ့ ဗိုလ်ချုပ်ကြေးရုပ်အရှေ့ တောင်ပေါ်ရှိ စစ်ကောင်စီတပ်စခန်းတို့ကို တော်လှန်ရေး ပူးပေါင်းတပ်ဖွဲ့က တိုက်ခိုက်ခဲ့သလို ညနေ ၃ နာရီခွဲလောက်မှာလည်း ထပ်မံတိုက်ခိုက်ခဲ့ပါတယ်။

အဆိုပါ ၃ နေရာစလုံးကို တနေ့တည်းအတွင်း တိုက်ခိုက်ခဲ့ကြပြီး စစ်ကောင်စီဘက်က ၅ ယောက် ထိခိုက်မှုရှိကာ အရာရှိ ဗိုလ်တယောက် သေဆုံးခဲ့ကြောင်း မြေပြင်သတင်းပေးပို့ချက်အရ သိရတယ်လို့ ဆိုပါတယ်။

မြိတ်ခရိုင်စစ်ကြောင်း ၂ ပြန်ကြားရေးတာဝန်ခံ ကိုမျိုးကြီးက “စနိုက်ပါနဲ့ သွားချောင်းပစ်လို့ ပစ်မှတ်ကို အတိအကျ ပစ်နိုင်ခဲ့တယ်လို့ မြေပြင်ရဲဘော်နဲ့ စစ်ကြောင်းမှူးတွေက အတည်ပြုပေးပါတယ်။ သေတာက တဦးတည်းပါ။ သေတဲ့တယောက်က တံတားဂိတ်ကပါ။ အရာရှိ ဗိုလ်တဦးလို့ပြောတယ်” လို့ ပြောပါတယ်။

အဆိုပါ စစ်ကောင်စီတပ်စခန်းတွေ သွားရောက်တိုက်ခိုက်မှုကို မြိတ်ခရိုင် ပြည်သူ့ကာကွယ်ရေး ပူးပေါင်းစစ်ကြောင်း ၁ နဲ့ ၂ တို့က ပူးပေါင်းလုပ်ဆောင်ခဲ့တာလို့ ဆိုပါတယ်။

မြိတ်-တနင်္သာရီ ပြည်ထောင်စုကားလမ်းပိုင်းမှာ သြဂုတ် ဒုတိယအပတ်လောက်ကစပြီး စစ်ကောင်စီဘက်က သာလွန်အင်အားနဲ့ စစ်ကြောင်းထိုးလာတာကြောင့် တမုတ်ချုံးကျေးရွာဘက်မှာ ထိတွေ့တိုက်ပွဲ အပြင်းအထန်ဖြစ်ခဲ့ပြီး ကားလမ်းပိုင်းကို ယာယီပိတ်လိုက်ရကြောင်း ဒေသခံပြည်သူတွေဆီက သိရပါတယ်။

အဲဒီတိုက်ပွဲတွေမှာ စစ်ကောင်စီစစ်ကြောင်းဘက်က ၄ ယောက်သေဆုံး၊ ၉ ယောက် ဒဏ်ရာရပြီး တော်လှန်ရေးတပ်ဖွဲ့ဘက်က ၂ ယောက် ဒဏ်ရာရခဲ့တယ်လို့ သြဂုတ် ၁၁ ရက်က မြိတ်ခရိုင် ပူးပေါင်းစစ်ကြောင်း ၂ ရဲ့ ထုတ်ပြန်ချက်မှာ ဖော်ပြထားပါတယ်။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ ရှိမ်းမကားကျေးရွာ ရဲစခန်းကို တော်လှန်ရေးတပ်တွေက ဩဂုတ် ၂၅ ရက် မနက်အစောပိုင်းမှာ စီးနင်းဝင်ရောက်တိုက်ခိုက်ရာ စစ်ကောင်စီက လေယာဉ်နဲ့ ဗုံးကြဲတိုက်ခိုက်ပြီး စစ်ကူပေးခဲ့ရတယ်လို့ ဒေသခံတွေက ပြောပါတယ်။

ဒေသခံဈေးသည်တယောက်က “မနက်ခင်း အစောပိုင်း ၅ နာရီလောက်က ရဲစခန်းကို ပြည်သူ့ကာကွယ်ရေးတပ်က ဝင်ရောက်ပစ်ခတ်တာဗျ။ လက်နက်ငယ်အသံ ပစ်တဲ့အသံ ကြားလိုက်တယ်။ လေယာဉ်နဲ့ လာပစ်တဲ့အချိန်က ၈ နာရီလောက်မှာ လေယာဉ်နဲ့ ဗုံးသီး ၂ လုံးချ တိုက်ခိုက်သွားတယ်။ ချတဲ့နေရာကတော့ အတိအကျ မသိဘူးအစ်ကို။ ပေါက်ကွဲတဲ့ အသံကတော့ ၂ ခါ ကြားလိုက်ရတယ်။ အထိအခိုက်ကတော့ ဘာမှ သတင်းမကြားရသေးဘူး” လို့ ပြောပါတယ်။

ရှိမ်းမကားကျေးရွာဟာ ဝက်လက်မြို့နယ် အရှေ့ခြမ်း၊ ဧရာဝတီမြစ်ကမ်း‌ဘေးမှာ တည်ရှိပြီး စဥ့်ကူး၊ မတ္တရာ၊ ဝက်လက်၊ စစ်ကိုင်း စတဲ့ မြို့နယ် ၄ ခု နယ်အစပ်မှာရှိတဲ့ ကျေးရွာတရွာဖြစ်သလို စစ်ကောင်စီက အခိုင်အမာ တပ်စွဲနေထိုင်တဲ့ နယ်မြေခံရဲစခန်းတခု ဖြစ်တယ်လို့ သိရပါတယ်။

ဗိုလ်ကျားကြီးတပ်ဖွဲ့ ခေါင်းဆောင် ဗိုလ်ကျားကြီးက “အလစ်ဝင်တိုက်ခဲ့တာဗျ။ နယ်ကျွံလာပြီး ကင်းလှည့်တဲ့ စစ်(-)တကောင်ကတော့ ပစ်နိုင်ခဲ့တယ်။ တိုက်ပွဲ ပြင်းထန်မယ့်အချိန်ကို စစ်တပ်က လေယာဉ်နဲ့ပစ်လို့ တပ် နောက်ပြန်ဆုတ်ထားတယ်” လို့ ပြောပါတယ်။

ရှိန်းမကားကျေးရွာရဲစခန်းက စစ်သားတွေဟာ ၂၀၂၃ ခု ဇူလိုင် ၁၄ ရက် ညမှာ သောက်စားမူးယစ်ပြီး ရွာမြောက်ဘက်ကို လက်နက်ကြီး၊ လက်နက်ငယ်၊ စက်သေနတ်တွေနဲ့ ရမ်းသန်းပစ်ခတ်ခဲ့ပြီး စည်ပင်သာယာစျေးနဲ့ လူနေအိမ်တွေကိုလည်း မီးရှို့ခဲ့တယ်လို့ သိရပါတယ်။