မကွေးတိုင်း၊ မြိုင်မြို့နယ်မှာ ဩဂုတ် ၂၁ ရက်၊ မနက် ၆ နာရီ၀န်းကျင်က စစ်ကောင်စီစစ်ကြောင်းကို တိုက်ခိုက်ခဲ့ရာ စစ်သား ၁၂ ဦးသေဆုံး၊ ၅ ဦး လက်နက်ချအညံ့ခံခဲ့ပြီး လက်နက် ၁၉ လက်နဲ့ ခဲယမ်းအမြောက်အမြား သိမ်းဆည်းရရှိခဲ့တယ်လို့ မြိုင်-ပကဖ စစ်ဆင်ရေးတာ၀န်ရှိသူတဦးက ပြောပါတယ်။
“ကိုင်းတောမရွာသစ်ရွာမှာ အခြေချပြီး တပ်စွဲနေတဲ့ကောင်တွေက သူတို့ရိက္ခာပြတ်ရင် ပတ်၀န်းကျင်ကရွာတွေကို ပတ်လုတယ်၊ ခိုးတယ်၊ တိုက်တယ်၊ မီးရှို့တယ်။ အခုလည်း အဲ့လိုလုပ်ဖို့ အဲ့ဒီရွာက ထွက်လာတဲ့ စစ်ကြောင်းကို လမ်းမှာဖြတ်တိုက်ခဲ့တာ။ ၁၂ ကောင်သေတယ်။ ၅ ကောင်ကတော့ လက်နက်ချခဲ့တယ်။”
စစ်ကောင်စီစစ်ကြောင်းကို ကြားဖြတ်တိုက်ခိုက်မှုကနေ MA1 သေနတ် ၆ လက်၊ MA2 သေနတ် ၃ လက်၊ MA3 သေနတ် ၄ လက်၊ MA4 သေနတ် ၁ လက်၊ MA11 သေနတ် ၁ လက်၊ G3 သေနတ် ၂ လက်၊ 79 မမ ၁ လက်၊ BA 100 (၆၀ မမ) ၁ လက်၊ G3 ကျည် ၁၉၂ တောင့်၊ MA ကျည် ၈၆၇ တောင့်၊ ၉ မမကျည် ၁၉၆ တောင့်၊ ၆၀ မမ အဖူး ၁ ဖူး၊ ၈၁ မမ အဖူး ၅ ဖူး၊ ၄၀ မမ အဖူး ၁၂ ဖူး၊ အီနာဂါ ၃ လုံး၊ RPG အဖူး ၃ ဖူး၊ လက်ပစ်ဗုံး ၃ လုံးတို့နဲ့အတူ အခြားဆက်စပ်ပစ္စည်းအများအပြား သိမ်းဆည်းရရှိခဲ့တယ်လို့ ဆိုပါတယ်။
မြိုင်-ပကဖ ရဲ့ တာ၀န်ခံတဦးက “တိုက်ပွဲအတွင်းကနေ ထွက်ပြေးပြီး လွတ်သွားတဲ့ ကောင်တွေလည်းရှိတယ်။ လက်နက်ချလို့ ဖမ်းမိထားတဲ့ သုံ့ပန်း ၅ ယောက်ကိုတော့ လိုအပ်တဲ့ စစ်ဆေးမှုတွေ ဆောင်ရွက်နေပါတယ်။ သုံ့ပန်းဥပဒေနဲ့အညီဘဲ ဆက်လက်ဆောက်ရွက်သွားမှာ။ ကျနော်တို့ဘက်ကတော့ စိုးရိမ်ရတဲ့ ဒဏ်ရာရတဲ့သူ မရှိပါဘူး။ ဒီပွဲမှာ ပူးပေါင်းပါ၀င်ခဲ့ကြတဲ့ တပ်ဖွဲ့အသီးသီးက ရဲဘော်အားလုံးကိုလည်း အထူးကျေးဇူးတင်ပါတယ်” လို့ ပြောပါတယ်။
အဆိုပါ တိုက်ခိုက်မှုကို မြိုင်ပကဖ၊ ပခုက္ကူခရိုင်တပ်ရင်းအမှတ် (၂၊ ၆၊ ၇) တပ်ရင်း၊ ပကဖ တပ် ပေါင်းစု အမှတ် ၁ တပ်ရင်း၊ ပခုက္ကူစုဖွဲ့မှု (Earthquake ၊ PPDF ၊ Young Force)၊ အညာမြေတပ်ပေါင်းစု၊ ကမ္မတပ်ပေါင်းစု၊ BLY တပ်ဖွဲ့၊ PKU- THURAIN၊ စင်္ကြာပြည်သူ့ကာကွယ်ရေးတပ်ဖွဲ့၊ ဝံပုလွေပြည်သူ့ကာကွယ်ရေးတပ်ဖွဲ့၊ ဂဠုန်ပြည်သူ့ကာကွယ်ရေးတပ်ဖွဲ့ (မြိုင်)၊ အလင်းတန်းပျောက်ကြားတပ်ဖွဲ့၊ PLC တပ်ပေါင်းစု၊ ဓားမင်းကြီးတပ်ဖွဲ့၊ Justice Revolution Force တို့နဲ့အတူ ဒေသတွင်း လက်နက်ကြီးငယ် ပေါင်းစုအဖွဲ့၊ ဒရုန်းတပ်ဖွဲ့တွေ စုပေါင်းတိုက်ခိုက်ခဲ့တာလို့ သိရပါတယ်။
မြိုင်မြို့နယ်က ကိုင်းတောမရဲစခန်းကိုလည်း သြဂုတ် ၃ ရက်ကနေ ၆ ရက်အထိ ပြည်သူ့ကာကွယ်ရေးတပ်ပေါင်းစုတွေက ၄ ရက်ကြာတိုက်ခိုက်ခဲ့ရပြီး ဝက်ပုတ်ကျေးရွာက စစ်ကောင်စီတပ်စခန်းကို ဩဂုတ် ၈ ရက် မနက်မှာ အပြီးတိုက်ခိုက်သိမ်းပိုက်နိုင်ခဲ့ကြပါတယ်။
