ထိုင်းမြောက်ပိုင်း၊ ချင်းမိုင်ခရိုင်၊ ဆန်ဆိုင်းမြို့ထဲမှာ ထိုင်းဘတ် ၁၀ သန်းကျော်တန်ဖိုးရှိ  E-စီးကရက်တွေ  ဖမ်းဆီးရမိတယ်လို့  မန်နေဂျာအွန်လိုင်းထိုင်းသတင်းမှာ ဖော်ပြပါတယ်။ 

အွန်လိုင်းပေါ်ကနေ E-စီးကရက်တွေရောင်းချနေတာကို ၃ လကြာစုံစမ်းပြီး ဆန်ဆိုင်းမြို့ ပါဖိုင်ရပ်ကွက် ကလျာဗျူးအိမ်ရာရှိ  အိမ်တအိမ်ကို  ပြီးခဲ့တဲ့ရက်ပိုင်းက သွားရောက်စစ်ဆေး ဖမ်းဆီးခဲ့တယ်လို့  ထိုင်းအမျိုးသားရဲတပ်ဖွဲ့  ဒုရဲချုပ် နိလန်းဒွန်း လိုမ်ဆီက ဩဂုတ် ၁၉  ရက်သတင်းစာရှင်းပွဲမှာ ပြောပါတယ်။ 

ဒီမတိုင်ခင်ရှေ့က yaivapeth.com အမည်ရှိ ဝက်ဘ်ဆိုက်ဒ်ကနေ E-စီးကရက်တွေ ကြော်ငြာရောင်းချနေတာကို  ထိုင်းနိုင်ငံသုံးစွဲသူများကာကွယ်ရေးတပ်ဖွဲ့ဝင်တွေ တွေ့ရှိခဲ့တယ်။ E-စီးကရက်သုံးစွဲရောင်းချမှုကို ထိုင်းဥပဒေက တားမြစ်ထားတာကြောင့်  အရေးယူဖို့အတွက် သက်ဆိုင်ရာက ဝယ်ယူသူအယောင်ဆောင်ပြီး စုံစမ်းခဲ့တယ်။ စီးကရက် ဝယ်လိုသူတွေဟာ ဝက်ဘ်ဆိုက်ကညွှန်းတဲ့ LINE  အုပ်စုထဲအရင်ဝယ်ရပြီး အွန်လိုင်းကနေမှာယူရတာလို့ ဆိုပါ တယ်။

စီးကရက်ဂိုဒေါင် ချင်းမိုင်မှာရှိကြောင်း သိရတဲ့နောက် တာဝန်ရှိသူတွေက သွားရောက် ဖမ်းဆီးရာမှာ အဆိုပါအိမ်မှာ ပါဆယ်ပစ္စည်းပို့ကုမ္ပဏီလုပ်ငန်းအယောင်ပြလုပ်ကိုင်ကြောင်း၊  အရွယ်အစားအမျိုးမျိုး၊ ပုံစံအမျိုးမျိုး၊ အနံ့အရသာအမျိုးမျိုးရှိ E-စီးကရက်ပေါင်း ၃၁၇၉၀ တောင့်ကို သိမ်းဆည်းရရှိတယ်၊ တန်ဖိုးအားဖြင့် ဘတ် ၁၀ သန်းကျော်ရှိတယ်လို့ ဆိုပါတယ်။ 

နိုင်းဆလန်ယူအမည်ရှိ ထိုင်းအမျိုးသားက ပိုင်ရှင်ဖြစ်ကြောင်း ပြောဆိုပြီး အဲဒီစီးကရက်တွေကို တရုတ်နိုင်ငံကနေ မှာယူတင်သွင်းတယ်၊ ဒီလိုလုပ်တာ ၄  နှစ်ရှိပြီ ၊ လစဉ်လည်ပတ်ငွေ ဘတ် ၁၀ သန်းခန့်ရှိတယ်၊  ထိုင်းမြောက်ပိုင်းက လူငယ်တွေအများဆုံးမှာယူတယ်လို့ ဖွင့်ဟ ဝန်ခံတယ်လို့ ဆိုပါတယ်။

E-စီးကရက်တွေကို နိုင်ငံတချို့က တရားဝင်သုံးစွဲရောင်းချခွင့်ပြုပေမဲ့ ထိုင်းနိုင်ငံအနေနဲ့တော့ ခွင့်မပြုကြောင်း၊ E-စီးကရက်ကို လူငယ်တွေ မူလတန်းဆင့်ကလေးတွေပါ သုံးစွဲနေ တာတွေ့ရတယ်၊ ဒါဟာ ကျန်းမာရေးအတွက် လွန်စွာအန္တရာယ်များတဲ့အတွက် သုံးစွဲတာ၊ တင်သွင်းတာ၊ ရောင်းချတာ ခွင့်မပြုဘူး၊ မနှစ်ကလည်း ဘတ်သန်းပေါင်း ၁၀၀ ကျော်တန်ဖိုးရှိ E-စီးကရက်တွေ ဘူးပေါင်း ၁ သိန်းကျော်ဖမ်းဆီးခဲ့ပြီး  တရားခံ ၁၈ ဦးကို အရေးယူအပြစ်ပေးခဲ့ တယ်လို့  ဒုရဲချုပ်က ပြောသွားပါတယ်။

ထိုင်းနိုင်ငံမှာ E-စီးကရက်ရောင်းဝယ်ပါက  ပမာဏပေါ်မူတည်ပြီ  ၃ နှစ်ထက်မပိုတဲ့ ထောင်ဒဏ် ဒါမှမဟုတ် ဘတ် ၆၀၀ ,၀၀၀ ထက်မပိုတဲ့ငွေဒဏ် ဒါမှမဟုတ် ထောင်ဒဏ်ရော ငွေဒဏ်ပါ နှစ်မျိုးလုံးကချခံရမှာဖြစ်ပါတယ်။ 

Source-  MGR Online