မန္တလေးမြို့၊ ချမ်းအေးသာစံမြို့နယ်၊ ပြည်ကြီးမျက်မှန်ရပ်ကွက်မှာ အွန်လိုင်းငွေလိမ်လုပ်ငန်း (ကျားဖြန့်) လုပ်ကိုင်နေတဲ့ တရုတ်နိုင်ငံသား ၄ ယောက်နဲ့ မြန်မာနိုင်ငံသား ၁၇ ယောက်တို့ကို သြဂုတ် ၁၈ ရက် ညနေပိုင်းက ဖမ်းဆီးရမိခဲ့ကြောင်း စစ်ကောင်စီက ထုတ်ပြန်ပါတယ်။
ချမ်းအေးသာစံမြို့နယ်၊ ပြည်ကြီးမျက်မှန်ရပ်ကွက်၊ ၂၇ လမ်း၊ ၆၅ လမ်းနဲ့ ၆၆ လမ်းကြားရှိ နေအိမ်တအိမ်အတွင်း ဩဂုတ် ၁၈ ရက် ညနေ ၄ နာရီခွဲလောက်က အွန်လိုင်းအသုံးပြု ငွေလိမ်လုပ်ငန်း လုပ်ကိုင်နေသူတွေကို ဆက်စပ်ပစ္စည်းတွေနဲ့အတူ ဖမ်းဆီးရမိခဲ့တာလို့ လုံခြုံရေးအဖွဲ့နဲ့ နီးစပ်သူတဦးက ပြောပါတယ်။
“တရုတ်နိုင်ငံသား အမျိုးသား ၃ ဦးနဲ့ အမျိုးသမီးတဦးပါ။ မြန်မာနိုင်ငံသားက အမျိုးသား ၁၀ ဦးနဲ့ အိမ်ရှင်အပါအဝင် အမျိုးသမီး ၇ ဦးပါ။ လောလောဆယ်တော့ အီလက်ထရောနစ် ဆက်သွယ်ရေးပုဒ်မ ၃၃(က)/၃၈ နဲ့ ချမ်းအေးသာစံမြို့နယ် အမှတ် ၃ နယ်မြေရဲစခန်းမှာ အမှုဖွင့် ဖမ်းဆီးထားပါတယ်။”
စစ်ကောင်စီ လုံခြုံရေးတပ်ဖွဲ့ဝင်တွေဟာ သြဂုတ် ၁၈ ရက် ညနေ ၄ နာရီခွဲက ချမ်းအေးသာစံမြို့နယ်၊ ပြည်ကြီးမျက်မှန်ရပ်ကွက်က အသက် ၅၉ နှစ်အရွယ်ရှိ ဒေါ်စန္ဒာရဲ့ နေအိမ်ကို သတင်းအရ ဝင်ရောက်ရှာဖွေခဲ့ရာက နေအိမ်အတွင်း အွန်လိုင်း အသုံးပြု ငွေလိမ်လုပ်ငန်း လုပ်ကိုင်နေသူ တရုတ်နိုင်ငံသား အသက် ၂၈ နှစ်အရွယ် Yanlong အပါအဝင် အမျိုးသား ၃ ဦးနဲ့ အမျိုးသမီးတဦး၊ ရှမ်းပြည်နယ် (မြောက်ပိုင်း)၊ လောက်ကိုင်မြို့နယ်၊ ထွမ်ဆန်းရွာနေ အသက် ၂၀ နှစ်အရွယ် ရဲမြင့် အပါအဝင် အမျိုးသား ၁၀ ဦးနဲ့ အမျိုးသမီး ၆ ဦးတို့ကို လုပ်ငန်းလုပ်ရာမှာ အသုံးပြုတဲ့ ကွန်ပျူတာ ၄ စုံ၊ လက်ပ်တော့ ၂ လုံး၊ 5BB Broad Band တံဆိပ်ပါ Wifi စက် ၁ လုံး၊ Ruijie Regee တံဆိပ်ပါ Wifi ထပ်ဆင့်လွှင့်စက် ၃ လုံးနဲ့ တခြား ဆက်စပ်ပစ္စည်းတွေနဲ့အတူ ဖမ်းဆီးရမိခဲ့ကြောင်း သိရပါတယ်။
အလားတူ ပြီးခဲ့တဲ့ သြဂုတ် ၁၃ ရက် နေ့လယ်ပိုင်းကလည်း ပြည်မြို့နယ်၊ ရွာဘဲနယ်မြေ၊ ရွှေတချောင်းလမ်းနဲ့ ပြည်ရတနာလမ်းထောင့်ရှိ Lucky 7 ဂိမ်းစင်တာ လောင်းကစားရုံကို စစ်ကောင်စီအဖွဲ့က ဝင်ရောက်ဖမ်းဆီးခဲ့ရာ ဆိုင်တွင်းရှိ အမျိုးသား ၂၆ ဦးနဲ့ အမျိုးသမီး ၁၅ ဦးတို့ကို တွေ့ရှိ ဖမ်းဆီးခဲ့ကြောင်း သိရပါတယ်။
