လားရှိုး အရှေ့မြောက်တိုင်းစစ်ဌာနချုပ် (ရမခ) စခန်းသိမ်းတိုက်ပွဲအတွင်း ဖမ်းမိထားတဲ့ စစ်သုံ့ပန်းနဲ့ တပ်မိသားစုဝင်‌တွေကို ဩဂုတ် ၆ ရက်ကနေ ၁၄ ရက်အထိ ၈ ရက်အတွင်း အယောက် ၂,၀၀၀ ကျော် ပြန်လွှတ်ပေးခဲ့ကြောင်း MNDAA သတင်းရင်းမြစ်ကနေ သိရပါတယ်။

ဒဏ်ရာရစစ်သည် ၂၉၆ ယောက်ကို ဩဂုတ် ၁၄ ရက် မနက်ပိုင်းက ပြန်လွှတ်ပေးလိုက်တယ်လို့ MNDAA နဲ့ နီးစပ်သူတဦးက ပြောပါတယ်။

အရှေ့မြောက်တိုင်းစစ်ဌာနချုပ် တိုက်ပွဲအတွင်း ဖမ်းဆီးမိခဲ့တဲ့ ဒဏ်ရာရ စစ်သုံ့ပန်းတွေကို ဆေးကုသပေးပြီးနောက် MNDAA က ပြန်လွှတ်ပေးခဲ့ဝာာလို့ နောက်ထပ် သတင်းရင်းမြစ် တဦးက ပြောပါတယ်။

“စစ်သုံ့ပန်းတွေနဲ့ တပ်မိသားစုဝင်တွေကို မိုင်းရယ်အခြေစိုက် စစ်ကောင်စီတပ် ခလရ ၆၇ ဘက်ကို SSPP က ကူညီပို့ဆောင်ပေးခဲ့တာလို့ သိရတယ်။”

လူသားချင်းစာနာမှုနဲ့ နောက်ထပ် စစ်သုံ့ပန်းတွေနဲ့ တပ်မိသားစုဝင်‌တွေကို လွှတ်ပေးခဲ့ပြီး လမ်းခရီးစရိတ်တွေ ပေးခဲ့ကြောင်း၊ လားရှိုးကို သိမ်းပိုက်ပြီးနောက် စစ်သုံ့ပန်းတွေနဲ့ တပ်မိသားစုဝင်တွေကို အကြိမ်ပေါင်းများစွာ လွှတ်ပေးခဲ့ကြောင်း MNDAA က သတင်းထုတ်ပြန်ထားပါတယ်။

ဩဂုတ် ၆ ရက်ကစ MNDAA ဘက်က စစ်သုံ့ပန်းတွေနဲ့ တပ်မိသားစုဝင်တွေ စုစုပေါင်း အယောက် ၂,၀၀၀ နီးပါးကို လွှတ်ပေးဖို့ စီစဉ်ခဲ့ပြီး တပ်မိသားစုဝင် တစုစီကို ခရီးစရိတ် ပေးရုံသာမက ဘေးကင်းတဲ့နယ်မြေကို ပို့ဆောင်ပေးခဲ့တယ်လို့ ဖော်ပြထားပါတယ်။

ဩဂုတ် ၃ ရက်က လားရှိုးမြို့နဲ့ လားရှိုးအခြေစိုက် အရှေ့မြောက်တိုင်းစစ်ဌာနချုပ် (ရမခ) ကို MNDAA နဲ့ ပူးပေါင်းတပ်ဖွဲ့တွေက အပြီးသတ် သိမ်းပိုက် ထိန်းချုပ်ခဲ့တာ ဖြစ်ပါတယ်။