ယူကရိန်းနိုင်ငံ ဥရောပသမဂ္ဂ (EU) အဖွဲ့ဝင်ဖြစ်ရေး ပထမအဆင့် တရားဝင်ဆွေးနွေးမှုတွေကို ဇွန်လ ၁၅ ရက်မှာ စတင်လိုက်ပါတယ်။
ဗစ်တာအော်ဘန် ဟန်ဂေရီဝန်ကြီးချုပ် တာဝန်ယူစဉ်က ကန့်ကွက်နေခဲ့တာကြောင့် ဒီလုပ်ငန်းစဉ်ဟာ မူလကထက် ၂ နှစ်လောက် နောက်ကျသွားခဲ့တာပါ။
ဒါပေမဲ့ ဟန်ဂေရီဝန်ကြီးချုပ်သစ် ပီတာမာဂျာက ယူကရိန်းရောက် ဟန်ဂေရီလူနည်းစုတွေရဲ့ အခွင့်အရေးနဲ့ပတ်သက်ပြီး ယူကရိန်းနဲ့ သဘောတူညီမှုရခဲ့တဲ့အတွက် ဒီကန့်ကွက်မှုကို ရုပ်သိမ်းပေးခဲ့ပါတယ်။
ပြင်သစ်နိုင်ငံမှာကျင်းပတဲ့ G7 ထိပ်သီးဆွေးနွေးပွဲကို တက်ရောက်နေတဲ့ ဥရောပကောင်စီဥက္ကဋ္ဌ အန်တိုနီယိုကော်စတာ ကတော့ ဒါဟာ ယူကရိန်းရဲ့ အနာဂတ်အတွက် သမိုင်းဝင်ခြေလှမ်း ဖြစ်တယ်လို့ ဆိုပါတယ်။
ဥရောပကော်မရှင်ဥက္ကဋ္ဌ အာဆူလာဗွန်ဒါလိုင်ယန်ကလည်း အကျင့်ပျက်ခြစားမှုတိုက်ဖျက်ရေးနဲ့ တရားဥပဒေစိုးမိုးရေးကိစ္စတွေမှာ ယူကရိန်းရဲ့ ပြုပြင်ပြောင်းလဲမှုတွေကို ချီးကျူးခဲ့ပါတယ်။
မော်လ်ဒိုဗာနိုင်ငံ ချီစီနောမြို့ကို ရောက်ရှိနေတဲ့ ယူကရိန်းသမ္မတ ဇလန်းစကီးက ဥရောပရဲ့ တိုးတက်မှုကို ရပ်တန့်လို့မရဘူးဆိုတာ ဒီဖြစ်ရပ်က ရှင်းလင်းတဲ့ သတင်းစကားပါး လိုက်တာလို့ ပြောပါတယ်။
EU အဖွဲ့ဝင်ဖြစ်ရေး လုပ်ငန်းစဉ်တွေကို အပိုင်း ၆ ပိုင်းခွဲပြီး အဆင့်လိုက် ဆွေးနွေးသွားကြမှာ ဖြစ်ပါတယ်။ ဒါပေမဲ့ အဖွဲ့ဝင်အဖြစ် အပြည့်အဝပါဝင်နိုင်ဖို့ကတော့ ယူကရိန်းနိုင်ငံမှာ စစ်ပွဲဖြစ်ပွားနေချိန်မှာ ဖြစ်နိုင်ခြေ မရှိဘဲ နှစ်နဲ့ချီ ကြာမြင့်နိုင်တယ်လို့ သိရပါတယ်။
Source: Reuters
