မြောက်ကိုရီးယားဟာ ကိုဗစ်-၁၉ ကပ်ရောဂါကြောင့် နယ်စပ်ထိန်းချုပ်မှုတွေကို ဖြေလျှော့ပေးပြီးနောက် တရုတ်နဲ့ ကုန်သွယ်မှု တိုးလာခဲ့တာကြောင့် ၃ နှစ်ဆက်တိုက် စီးပွားရေးကျဆင်းခဲ့ပြီးနောက် ၂၀၂၃ ခုနှစ်မှာ ပြည်တွင်း အသားတင်ထုတ်လုပ်မှုတန်ဖိုး (GDP) က ၃ ဒသမ ၁ ရာခိုင်နှုန်းလောက်အထိ သိသိသာသာ တိုးတက်လာခဲ့ကြောင်း ဇူလိုင် ၂၆ ရက်က တောင်ကိုရီးယား ဗဟိုဘဏ်ရဲ့ ခန့်မှန်းချက်အရ သိရပါတယ်။
ဒါဟာ ၂၀၁၆ ခုနှစ်နောက်ပိုင်း အကြီးမားဆုံး ရာခိုင်နှုန်း တိုးလာတာဖြစ်တယ်လို့ ကိုရီးယားဘဏ် (BOK) က ပြောကြားခဲ့ပါတယ်။
၂၀၂၃ ခုနှစ်ရဲ့ စီးပွားရေးမှာ စက်မှုကဏ္ဍက ၃၀ ဒသမ ၇ ရာခိုင်နှုန်း၊ စိုက်ပျိုးရေးကဏ္ဍမှာ ၂၂ ဒသမ ၀ ရာခိုင်နှုန်းနဲ့ ဆောက်လုပ်ရေးကဏ္ဍမှာ ၁၁ ဒသမ ၀ ရာခိုင်နှုန်း အသီးသီး ရှိနေတယ်လို့ ဆိုပါတယ်။
မြောက်ကိုရီးယားရဲ့ စီးပွားရေးဟာ ကိုဗစ် ကန့်သတ်ချက်တွေနဲ့ ကုလသမဂ္ဂရဲ့ ပိတ်ဆို့မှုတွေကြားမှာ ၂၀၂၀၊ ၂၀၂၁ နဲ့ ၂၀၂၂ ခုနှစ်တို့မှာ ၃ နှစ်ဆက်တိုက် ကျဆင်းခဲ့တာပါ။
၂၀၂၃ ခုနှစ်မှာတော့ တရုတ်နိုင်ငံနဲ့ မြောက်ကိုရီးယားရဲ့ ကုန်သွယ်မှုဟာ စုစုပေါင်း ကုန်သွယ်မှုပမာဏရဲ့ ၉၈ ဒသမ ၃ ရာခိုင်နှုန်းရှိကြောင်း BOK က ဖော်ပြခဲ့ပါတယ်။
ကိုရီးယားဘဏ် (BOK) ဟာ ၁၉၉၁ ခုနှစ်က စတင်ပြီး မြောက်ကိုရီးယားရဲ့ စီးပွားရေး ခန့်မှန်းချက်တွေကို ထုတ်ပြန်ခဲ့တာဖြစ်ပြီး ထောက်လှမ်းရေးအချက်အလက်တွေ၊ နိုင်ငံခြားကုန်သွယ် အေဂျင်စီတွေ အပါအဝင် ရင်းမြစ်အမျိုးမျိုးက အချက်အလက်တွေနဲ့ တောင်ကိုရီးယားရဲ့ ပေါင်းစည်းရေးဝန်ကြီးဌာနက အချက်အလက်တွေကို အခြေခံထားတာ ဖြစ်ပါတယ်။
Source-Reuters
