ချင်းပြည်နယ်၊ ဖလမ်းမြို့အခြေစိုက် စစ်ကောင်စီတပ်က ဒုတပ်ကြပ်အဆင့်ရှိသူတဦးဟာ လက်နက်ခဲယမ်းတွေနဲ့အတူ ဇူလိုင် ၃ ရက်မှာ Chin National Defense Force (CNDF) ထံ အလင်းဝင်ရောက်လာ ပါတယ်။
CNDF တာဝန်ခံတဦးက “ဖလမ်းမြို့မှာ အခြေစိုက်တဲ့ ခလရ ၂၆၈ တပ်ရင်းက ဒုတပ်ကြပ် မိုးဇက်ဟာ လက်နက်ခဲယမ်းတွေနဲ့အတူ ကျနော်တို့တပ်ဖွဲ့ဆီမှာ အလင်းဝင်ခဲ့တာပါ” လို့ DVB ကို ပြောပြပါတယ်။
အလင်းဝင်လာတဲ့ ဒုတပ်ကြပ် မိုးဇက်ဟာ MA 4 သေနတ် ၁ လက်၊ ကျည်ဘောက် ၄ ခု၊ ကျည်ဆန်အတောင့် ၁၂၀၊ 40 မမ ဗုံးသီး ၁၄ လုံးတို့နဲ့အတူ အလင်းဝင်ရောက်လာခဲ့တာလို့ သိရပါတယ်။
CNDF ပြောရေးဆိုခွင့်ရှိသူတဦးက“သူ့ကို ဆုကြေးငွေ သိန်း ၈၀ ချီးမြှင့်ပေးအပ်ခဲ့ပြီးတော့ လွတ်မြောက်နယ်မြေတခုဆီကို ပို့ဆောင်ပေးထားပါတယ်” လို့ ပြောပါတယ်။
ပြည်သူ့ဘက်ကို ရပ်တည်ပူးပေါင်းပြီးလိုကြတဲ့ စစ်ကောင်စီတပ်သားတွေအနေနဲ့လည်း CNO/CNDF တို့နဲ့ အမြန်ဆုံး ဆက်သွယ်ချိတ်ဆက်ပြီး အလင်းဝင်ရောက်ကြဖို့ CNO/CNDF က ဖိတ်ခေါ်ထားပါတယ်။
ပြီးခဲ့တဲ့ ၂၀၂၃ ခုနှစ်၊ သြဂုတ်လထဲမှာ ဖလမ်းမြို့က စစ်ကောင်စီတပ်ရင်းဌာနချုပ် ခလရ ၂၆၈ တပ်ရင်းကို ချင်းအမျိုးသားတပ်ဦး/ချင်းအမျိုးသားတပ်မတော် (CNF/CNA) ပူးပေါင်းအဖွဲ့တွေ ဝင်ရောက်တိုက်ခိုက်ခဲ့လို့ စစ်ကောင်စီတပ်သားတွေ အများအပြား သေဆုံးပြီး လက်နက်ခဲယမ်းတွေလည်း သိမ်းဆည်းရရှိခဲ့ပါတယ်။
