ရီးရဲလ်မက်ဒရစ်အသင်းဟာ တိုက်စစ်မှူးသစ် အမ်ဘာပေကို ပရိသတ်ပေါင်း ၈၀၀၀၀ ကျော်ရှေ့မှောက်မှာ တရားဝင်မိတ်ဆက်သွားခဲ့ပါတယ်။
ယူရိုပြိုင်ပွဲမတိုင်ခင်ကတည်းက အမ်ဘာပေကို ခေါ်ယူနိုင်ခဲ့တဲ့ မက်ဒရစ်ကလပ်ဟာ ယူရိုပြိုင်ပွဲအပြီးမှာ တရားဝင်စာချုပ် ချုပ်ဆိုပြီး အသင်းပရိသတ်တွေနဲ့ မိတ်ဆက်ခဲ့တာပါ။
အမ်ဘာပေဟာ ကျောနံပါတ် ၉ ဂျာစီဝတ်ဆင်ပြီး ဥရောပချန်ပီယံလိဂ်ဆုဖလား ၁၄ လုံးတန်းစီ ချထားတဲ့ ကွင်းထဲကို ဝင်ပြီးပရိသတ်တွေကို လက်ပြနှုတ်ဆက်ခဲ့ပါတယ်။
အမ်ဘာပေနဲ့အတူ သူရဲ့မိဘတွေလည်း ကွင်းထဲကိုဝင်ရောက်ပြီး ပရိသတ်တွေကို နှုတ်ဆက်ခဲ့ပါတယ်။
မက်ဒရစ်အသင်းဆီ ပြောင်းရွှေ့ကစားဖို့က ငယ်ဘဝအိပ်မက်ဖြစ်ပြီး အသင်းရဲ့ မျှော်မှန်းချက်တွေအတွက် အစွမ်းကုန် ပေးဆပ်ကစားသွားမယ်လို့ ကတိပေးကြောင်း အမ်ဘာပေက ပြောသွားပါတယ်။
အမ်ဘာပေဟာ မက်ဒရစ်နဲ့ ၅ နှစ်စာချုပ်ချုပ်ဆိုခဲ့ပြီး ပီအက်စ်ဂျီ မှာ တနှစ်လုပ်ခပေါင် ၂၁ ဒသမ ၄ သန်းအထိ ရရှိခဲ့ပေမဲ့ ရီးရဲလ်အသင်းမှာတော့ ပေါင် ၁၂ ဒသမ ၈ သန်းသာ ရရှိမှာ ဖြစ်ပါတယ်။
