အပူပိုင်းမုန်တိုင်း ဘာရယ်လ်က အမေရိကန်ပြည်ထောင်စု၊ တက္ကဆက်ပြည်နယ် အရှေ့တောင်ပိုင်းကို ဇူလိုင် ၈ ရက်က ဝင်ရောက်တိုက်ခတ်ခဲ့လို့ အပျက်အစီးများခဲ့ပြီး ဒေသခံ ၂ ဒသမ ၇ သန်းလောက် လျှပ်စစ်မီး ပြတ်တောက်သွားခဲ့တယ်လို့ ယာယီအုပ်ချုပ်ရေးမှူး ဒန် ပက်ထရစ်ခ်က ပြောပါတယ်။
အလုပ်သမား အယောက် ၁၁,၅၀၀ ရောက်လာပြီး ဓာတ်အားပြန်ရဖို့ ကျယ်ကျယ်ပြန့်ပြန့် ကြိုးပမ်းဆောင်ရွက်နေတယ်လို့ ပက်ထရစ်က ပြောပါတယ်။
လျှပ်စစ်ဓာတ်အားပြန်ရဖို့ ရက်ပေါင်းများစွာ အချိန်ယူ ဆောင်ရွက်ရမယ်လို့လည်း သူက ဆက်ပြောပါတယ်။
မုန်တိုင်းကြောင့် တက္ကဆက်အရှေ့တောင်ပိုင်းမှာ လေပြင်းတွေတိုက်ပြီး မိုးသည်းသည်းထန်ထန် ရွာခဲ့တာမှာ လူ ၃ ဦးထက်မနည်း သေဆုံးပြီး အဝေးပြေးလမ်းတွေ ရေလျှံခဲ့ပါတယ်။
ရေနံအတင်အချ ဆိပ်ကမ်းတွေ ပိတ်ခဲ့ရပြီး လေယာဉ်ခရီးစဉ်ပေါင်း ၁,၃၀၀ ကျော်ကို ဖျက်သိမ်းခဲ့ရပါတယ်။
အရေးပေါ်တုံ့ပြန်ရေးဝန်ထမ်း ၂,၅၀၀ ကျော်ကို ပြည်နယ်အနှံ့ တပ်ဖြန့်ချထားတယ်လို့ တက္ကဆက်ပြည်နယ် အရေးပေါ်စီမံခန့်ခွဲမှုဌာန အကြီးအကဲ နင်းမ်ကစ်ဒ်က ပြောပါတယ်။
Source-Reuters
