ရခိုင်ပြည်နယ်၊ မောင်တောမြို့နယ်က စစ်ကောင်စီရဲ့ နယ်ခြားစောင့်တပ်စခန်းက ရဲတပ်ဖွဲ့ဝင် ၂ ဦးဟာ စစ်ကိုင်းတိုင်းက PDF တပ်ဖွဲ့တခုဖြစ်တဲ့ Generation Z Army တပ်ဖွဲ့ဆီကို ဇူလိုင် ၇ ရက်မှာ သေနတ် ၂ လက်နဲ့အတူ အလင်းဝင်ရောက်လာခဲ့တယ်လို့ သိရပါတယ်။
အလင်းဝင်ရောက်လာတဲ့ မောင်တောနယ်ခြားစောင့်စခန်းက မြန်မာနိုင်ငံရဲတပ်ဖွဲ့ဝင် တပ်သားအဆင့်ရှိသူ ၂ ဦးဟာ ဇူလိုင် ၇ ရက်မှာ စစ်ကိုင်းတိုင်းအတွင်းက Generation Z Army တပ်ဖွဲ့ အခြေစိုက်တဲ့ တပ်စခန်းကို ချောမောစွာ ရောက်ရှိလာတယ်လို့ Generation Z Army ရဲ့ တာဝန်ခံတဦးက ပြောပါတယ်။
“ ၂ ယောက်စလုံး ရဲတပ်ဖွဲ့ဝင် တပ်သားအဆင့်တွေပါ။ ပြီးခဲ့တဲ့ မေလလောက်ကတည်းက သူတို့ ၂ ယောက်က အလင်းဝင်ဖို့ ဆက်သွယ်လာတာပါ။ သူတို့တွေ အလင်းဝင်နိုင်ဖို့အတွက် ရက္ခိုင့်တပ်တော် (AA) ဆီကို အကူအညီတောင်းပြီး ဒီဘက်ရောက်အောင် အဆင့်ဆင့် ခေါ်ယူခဲ့ရတာဖြစ်လို့ အချိန်ကြန့်ကြာသွားခဲ့တာပါ။”
အလင်းဝင်ရောက်လာတဲ့ ရဲတပ်သား ၂ ဦးဟာ MA 11 သေနတ် ၁ လက်၊ G3 သေနတ် ၁ လက် အပါအဝင် ကျည်အတောင့် ၂၂၀ တို့နဲ့အတူ အလင်းဝင်ရောက်လာခဲ့တာဖြစ်တယ်လို့ သိရပါတယ်။
Generation Z Army တပ်ဖွဲ့ရဲ့ ပြောရေးဆိုခွင့်ရှိသူတဦးက “တဦးကို သိန်း ၂၀ စီ ဆုကြေးငွေ ချီးမြှင့်ထားပါတယ်။ သူတို့တွေရဲ့ ဆန္ဒအရ ကျနော်တို့အဖွဲ့နဲ့အတူ စစ်အာဏာရှင်ကို ပူးပေါင်းတိုက်ခိုက်သွားမယ်ဆိုလို့ လိုအပ်တဲ့ သင်ကြားမှုတွေ ဆက်လက်ပြုလုပ်ပေးနေပါတယ်” လို့ ပြောပါတယ်။
Generation Z Army တပ်ဖွဲ့အနေနဲ့ မြန်မာနိုင်ငံအတွင်းက စစ်ကောင်စီလက်အောက်ခံ တပ်စခန်းတွေက မည်သူမဆို အလင်းဝင်ရောက်လိုပါက လက်ခံကြိုဆိုသွားမှာဖြစ်ပြီး လုံခြုံစိတ်ချမှု ရှိအောင်လည်း စီစဉ်ဆောင်ရွက်ပေးသွားမှာဖြစ်တယ်လို့ သိရပါတယ်။
