မွန်ပြည်နယ်နဲ့ ကရင်ပြည်နယ်အစပ်မှာ စစ်ကောင်စီအခြေစိုက်တပ်တွေကို ဇွန် ၂၆၊ ၂၇၊ ၂၈ နဲ့ ဇူလိုင် ၁ ရက်နေ့တွေမှာ တော်လှန်ရေးပူးပေါင်းတပ်ဖွဲ့တွေက ဒရုန်းနဲ့ တိုက်ခိုက်ခဲ့တာကြောင့် ဗိုလ်မှူးတဦး အပါအဝင် ၂၁ ဦး သေဆုံးပြီး အများအပြား ဒဏ်ရာရရှိခဲ့တယ်လို့ ဂဠုန်စစ်ကြောင်းအဖွဲ့က ပြောပါတယ်။

ကျိုက်မရောမြို့နယ်၊ တရနာကျေးရွာမှာ တပ်စွဲထားတဲ့ စစ်ကောင်စီတပ်တွေကို တော်လှန်ရေးတပ်ဖွဲ့တွေက ဇူလိုင် ၁ ရက် ညနေ ၄ နာရီကနေ ၅ နာရီအတွင်း ဒရုန်းနဲ့ ဗုံးသီး ၉ လုံးချ တိုက်ခိုက်ခဲ့တာကြောင့် စစ်ကောင်စီတပ်သား ၁၆ ဦး သေဆုံးပြီး အများအပြား ဒဏ်ရာရရှိခဲ့ပါတယ်။

ဂဠုန်စစ်ကြောင်း ဒရုန်းအဖွဲ့တာဝန်ခံက “ကျနော်တို့ မဟာမိတ်တွေနဲ့ ပူးပေါင်းပြီး ဓမ္မသရွာနားက တရာနာရွာမှာ တပ်စွဲထားတဲ့ စစ်တပ်ကို ၄ နာရီမှာ ဒရုန်းနဲ့ ၄ လုံးချပြီး ၄ နာရီ ၄၂ မိနစ်မှာ ဒရုန်းနဲ့ ၅ လုံးချတယ်။ စစ်တပ်ဘက်က ၁၆ ဦးသေတယ်။ ဒဏ်ရာရတဲ့ စာရင်းကတော့ အတိအကျ မသိရသေးပေမဲ့ ဒဏ်ရာရတဲ့လူများတယ် ဆိုပြီးတော့ ကြားပါတယ်။ စစ်တပ်ဘက်ကနေ ၁၂၀ မမ ၄ လုံးနဲ့ ရွာတွေဘက်ကို ပစ်ခတ်ခဲ့ပေမဲ့ ရော်ဘာခြံတွေထဲကျတော့ ပြည်သူ အထိအခိုက်တော့ မရှိခဲ့ဘူး” လို့ ပြောပါတယ်။

ကရင်ပြည်နယ်၊ ကော့ကရိတ်မြို့နယ်၊ ကျုံဒိုးမြို့ စံပယ်ဂူဘုန်းကြီးကျောင်းမှာ အင်အား ၅၀ ကျော်နဲ့ တပ်စွဲထားတဲ့ စစ်ကောင်စီတပ်သားတွေကို ဇွန် ၂၆၊ ၂၇၊ ၂၈ ရက်တို့မှာ ၃ ရက်ဆက် ဒရုန်းနဲ့ ဗုံးသီးချ တိုက်ခိုက်ခဲ့တာကြောင့် ခလရ ၃၂ ဦးဆောင် ဗိုလ်မှူးမျိုးကြည်နဲ့ တပ်ကြပ်ကြီးတဦး အပါအဝင် စစ်ကောင်စီတပ်သား ၅ ဦး သေဆုံးပြီး ၂ ဦး ဒဏ်ရာရရှိခဲ့ပါတယ်။

ဂဠုန်စစ်ကြောင်း ဒရုန်းအဖွဲ့တာဝန်ခံက “စံပယ်ဂူဘုန်းကြီးကျောင်းမှာ အင်အား ၅၀ နဲ့ တပ်စွဲထားတဲ့တပ်ကို ၃ ရက်ဆက် ဒရုန်းနဲ့တိုက်တာ။ ခလရ ၃၂ ဗိုလ်မှူးမျိုးကြည် အပါအဝင် ၅ ဦးသေတယ်။ သူတို့ဗိုလ်မှူး သေသွားလို့ စစ်တပ်က လက်နက်ကြီးတွေ လေယာဉ်တွေနဲ့ ဗုံးကြဲတိုက်ခိုက်ခဲ့တယ်” လို့ ပြောပါတယ်။

စစ်ကောင်စီတပ်က ဗိုလ်မှူးမျိုးကြည် သေဆုံးပြီးနောက် ဇွန် ၂၈ ရက် နေ့လယ်ပိုင်းက ၆၀ မမ၊ မစ်ဇိုင်းဒုံး၊ Mi35 နဲ့ အနီးနားရှိ ကျေးရွာထဲနဲ့ ဘုရားတောင်ဘုရားကုန်းကို ပစ်ခတ်ခဲ့တာကြောင့် အရပ်သားပြည်သူတဦး ထိခိုက်ဒဏ်ရာရရှိခဲ့ပြီး ပြည်သူပိုင်ကား ၂ စီး ပျက်စီးခဲ့တယ်လို့ ဒေသခံတဦးက ပြောပါတယ်။

“စစ်တပ်တပ်စွဲထားတဲ့ စံပယ်ဂူဘုန်းကြီးကျောင်းကို PDF တွေက သွားပစ်တာ။ စစ်တပ်က အထိနာသွားလို့ ဟုတ်မယ်၊ ရဟတ်ယာဉ်နဲ့ မယ်တရို၊ ကော့ဒူး၊ ကော့ပနာ ရွာတွေကို လိုက်ပတ်ကြဲသလို လက်နက်ကြီးတွေနဲ့ပစ်ခတ်လို့ ပြည်သူတဦး ဒဏ်ရာရတယ်။ စိုးရိမ်စရာတော့ မရှိဘူး။ နေအိမ်တလုံးနဲ့ ကား ၂ စီးလည်း ထိခိုက်ပျက်စီးတယ်။ ခုထိလည်း လက်နက်ကြီးတွေ ပစ်နေတုန်းပဲ။”

တိုက်ခိုက်မှုကို ဂဠုန်စစ်ကြောင်း ဒရုန်းအဖွဲ့၊ ကျားဖြူစစ်ကြောင်း တပ်ခွဲ ၃ ဒရုန်းအဖွဲ့၊ မွန်ပြည်သစ်ပါတီ (စစ်အာဏာရှင်တိုက်ဖျက်ရေးအဖွဲ့) NMSP-AD နဲ့ Lion Battalion အဖွဲ့ တို့က ပူးပေါင်းဆောင်ရွက်ခဲ့ပါတယ်။

ကျားဖြူတပ်ခွဲ ၃ ဒရုန်းတပ်ဖွဲ့နဲ့ ဂဠုန်စစ်ကြောင်း ဒရုန်းအဖွဲ့တို့ဟာ မွန်-ကရင်အစပ်မှာ ဒရုန်းမစ်ရှင်တွေ ဆက်တိုက်ဖော်ဆောင်နေရတဲ့အတွက် ဒရုန်းဘက်ထရီတွေ error ဖြစ်ပြီး စစ်ဆင်ရေးတွေ ဆက်လက်ဖော်ဆောင်ဖို့ အခက်အခဲ ဖြစ်နေတဲ့အတွက် ဘက်ထရီ အကူအညီတွေ လိုအပ်နေတယ်လို့ ဂဠုန်စစ်ကြောင်း ဒရုန်းအဖွဲ့တာဝန်ခံက ပြောပါတယ်။

ပြီးခဲ့တဲ့ ဇန်နဝါရီ ၂၁ ရက်ကလည်း ကျိုက်မရောမြို့နယ်၊ ကျွန်းကုန်းပိုင်းမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို မွန်ပြည်သစ်ပါတီ (စစ်အာဏာရှင်တိုက်ဖျက်ရေးအဖွဲ့) NMSP-AD အဖွဲ့က လက်နက်ကြီးငယ်တွေနဲ့ သွားရောက်တိုက်ခိုက်ခဲ့တာကြောင့် စစ်ကောင်စီတပ်သားတွေ ထိခိုက်သေဆုံးမှု ရှိခဲ့ပါတယ်။

မွန်-ကရင်အစပ်မှာ တော်လှန်ရေးတပ်ဖွဲ့တွေက စစ်ကောင်စီအခြေစိုက် စခန်းတွေကို ဒရုန်းနဲ့ တိုက်ခိုက်နေတဲ့အပြင် စစ်ကောင်စီဘက်ကလည်း တန်ပြန်အနေနဲ့ ဒရုန်းတွေနဲ့ ပြန်လည်တိုက်ခိုက်နေတာကြောင့် စစ်ရေးတင်းမာမှုတွေ ဖြစ်ပေါ်နေပါတယ်။