ရုရှားသမ္မတ ဗလာဒီမာပူတင်ဟာ ဒီတပတ်ထဲ ဗီယက်နမ်နိုင်ငံ ဟနွိုင်းမြို့ကို လာရောက်လည်ပတ်မှာ ဖြစ်တယ်လို့ ရိုက်တာသတင်းက ဖော်ပြပါတယ်။
ဆွစ်ဇာလန်မှာ ကျင်းပတဲ့ ယူကရိန်း ငြိမ်းချမ်းရေးဆွေးနွေးပွဲကို ဗီယက်နမ်က လက်ရှောင်ခဲ့သလို အဲဒီမတိုင်မီ ရုရှားမှာကျင်းပတဲ့ BRICS အစည်းအဝေးကိုကျတော့ ဒုတိယနိုင်ငံခြားရေးဝန်ကြီး စေလွှတ်ခဲ့ပါတယ်။
ပြီးခဲ့တဲ့လကမှ သမ္မတသက်တမ်း ၅ ကြိမ်မြောက် ကျမ်းကျိန်ထားတဲ့ ပူတင်ဟာ ဗီယက်နမ်သမ္မတသစ် တူလမ် အပါအဝင် ခေါင်းဆောင်တွေနဲ့ ဗုဒ္ဓဟူး၊ ကြာသပတေး ၂ ရက်ကြာ ခရီးစဉ်အတွင်း တွေ့ဆုံသွားမှာဖြစ်ပါတယ်။
ဗီယက်နမ်ရဲ့ အဓိကကုန်သွယ်ဘက်နိုင်ငံ ဖြစ်သလို ပြီးခဲ့တဲ့နှစ်ကမှ ဆက်ဆံရေး အဆင့်မြှင့်ထားတဲ့ အမေရိကန်ကတော့ ဒီခရီးစဉ်ကို ပြင်းပြင်းထန်ထန် ဝေဖန်ခဲ့ပါတယ်။
ဘယ်နိုင်ငံကမှ ပူတင်ရဲ့ ရန်လိုတဲ့စစ်ပွဲကို ထောက်ခံအားပေးဖို့ စင်မြင့်တရပ် မဖြစ်သင့်သလို ရက်စက်ကြမ်းကြုတ်မှုတွေကို ပုံမှန်လို ခွင့်ပြုမပေးသင့်ပါဘူးလို့ ဟနွိုင်းမြို့မှာရှိတဲ့ အမေရိကန်သံရုံးက ထုတ်ပြန်ပါတယ်။
သည်ဟိတ်ဂ် အခြေစိုက် အပြည်ပြည်ဆိုင်ရာ ရာဇဝတ်မှုတရားရုံး (ICC) က ပူတင်ကို စစ်ရာဇဝတ်မှုနဲ့ ဝရမ်းထုတ်ထားပါတယ်။ ဒါပေမဲ့ ရုရှားရော ဗီယက်နမ်သာမကဘဲ အမေရိကန်ကိုယ်တိုင်က ICC အဖွဲ့ဝင် မဟုတ်ပါဘူး။
Source - Reuters
