ခေးခို ဖူဂျီမိုရိဟာ ဇူလိုင် ၂၈ ရက်မှာ ပီရူးသမ္မတအဖြစ် စတင်တာဝန်ထမ်းဆောင်ခဲ့ပြီး နိုင်ငံအတွင်း ရာဇဝတ်မှုနဲ့ ငွေညှစ်မှုလှိုင်းကို ထိန်းချုပ်ဖို့ အရေးပေါ်ဇုန်တွေက လုံခြုံရေးလုပ်ငန်းတွေကို လက်နက်ကိုင်တပ်ဖွဲ့တွေက ဦးဆောင်မယ်လို့ ကြေညာပါတယ်။

ကွယ်လွန်သူ သမ္မတဟောင်း အယ်လ်ဘာတို ဖူဂျီမိုရိရဲ့ အသက် ၅၁ နှစ်အရွယ် သမီးဖြစ်ပြီး တိုက်ရိုက်မဲပေးစနစ်နဲ့ သမ္မတအဖြစ် ရွေးကောက်တင်မြှောက်ခံရတဲ့ ပထမဆုံး အမျိုးသမီးဖြစ်တဲ့ ခေးခို ဖူဂျီမိုရိဟာ အောက်လွှတ်တော်ရှေ့မှောက်မှာ ကျမ်းသစ္စာ ကျိန်ဆိုခဲ့တာပါ။

အပြင်းအထန် ယှဉ်ပြိုင်ခဲ့ရတဲ့ ရွေးကောက်ပွဲအပြီးမှာ ပြန်လည်သင့်မြတ်ရေးကို တောင်းဆိုခဲ့ပါတယ်။

သူ့အောင်ပွဲဟာ ပြီးခဲ့တဲ့ ဆယ်စုနှစ်သုံးခုအတွင်း ပီရူးမှာ ဩဇာအရှိဆုံးနဲ့ သဘောထားကွဲလွဲမှုအရှိဆုံး နိုင်ငံရေးမင်းဆက် ပြန်ရောက်လာတဲ့ အမှတ်အသားလည်း ဖြစ်ပါတယ်။

အဂတိလိုက်စားမှု ဒါမှမဟုတ် အာဏာအလွဲသုံးစားမှု စွပ်စွဲချက်တွေကြောင့် ခေါင်းဆောင်တွေ ရာထူးကနေ ဖယ်ရှားလို့ ဒါမှမဟုတ် နုတ်ထွက်လို့ ဖြစ်လာတဲ့ နိုင်ငံရေးအကျပ်အတည်းကြားမှာ ဖူဂျီမိုရိဟာ ၂၀၁၆ ခုနှစ် ဇူလိုင်လကစပြီး ၉ ယောက်မြောက် နိုင်ငံ့အကြီးအကဲ ဖြစ်လာတာပါ။

သူဟာ ယာယီသမ္မတ ဟိုဆေး ဘယ်လ်ကာဇာရဲ့ နေရာကို အစားထိုးခဲ့ပါတယ်။

သမ္မတသစ်ဟာ ရာဇ၀တ်မှုတိုက်ဖျက်ရေး ဥပဒေတွေနဲ့ ဒေသတွင်း စီးပွားရေးရဲ့ အဓိကကဏ္ဍတွေကို ထိခိုက်ခဲ့ပြီးသား အယ်လ်နီညို ရာသီဥတုဖြစ်စဉ်ရဲ့ အကျိုးသက်ရောက်မှုတွေကို လျှော့ချဖို့ အစီအမံတွေ ပြဋ္ဌာန်းရေး ဥပဒေပြုအာဏာတွေကို တောင်းဆိုမယ်လို့လည်း ကြေညာခဲ့ပါတယ်။

ယှဉ်ပြိုင်နိုင်စွမ်းကို မြှင့်တင်ဖို့နဲ့ အာရှဈေးကွက်တွေကို ပစ်မှတ်ထားဖို့ ပီရူး၊ ချီလီ၊ ကိုလံဘီယာနဲ့ မက္ကဆီကိုတို့အကြား စီးပွားရေးနဲ့ ကုန်သွယ်ရေး ပေါင်းစည်းမှုအတွက် ယန္တရားတခုဖြစ်တဲ့ ပစိဖိတ် မဟာမိတ်အဖွဲ့ကို မြှင့်တင်ဖို့ ကြိုးပမ်းသွားမယ်လို့လည်း သူက ထပ်ပြောပါတယ်။

ဖူဂျီမိုရိ အာဏာရလာခြင်းက လက်တင်အမေရိကရဲ့ လက်ယာယိမ်းမှုကို တိုးချဲ့ပေးခဲ့ပြီး အာဂျင်တီးနားနိုင်ငံက ဂျာဗီယာ မီလီ၊ ချီလီနိုင်ငံက ဟိုဆေး အန်တိုနီယို ကက်စ်၊ အီကွေဒေါနိုင်ငံက ဒန်နီရယ် နိုဘိုအာနဲ့ ဘိုလီးဗီးယားနိုင်ငံက ရိုဒရီဂို ပါဇ် တို့လို ရှေးရိုးစွဲခေါင်းဆောင်တွေနဲ့ ပူးပေါင်းခဲ့ပါတယ်။

Source: Reuters