မွန်ပြည်နယ်၊ ရေးမြို့နယ်၊ လမိုင်းမြို့နယ်ရှိ ကုလားကုတ်ကျွန်းမှာရှိတဲ့ ငါးဖမ်းစက်လှေနဲ့ ခရီးသည်တင်လှေတို့ကို စစ်‌ကောင်စီတပ်က ညဘက်သွားလာခွင့်ကန့်သတ်ထားတယ်လို့ ဒေသခံတွေက ပြောပါတယ်။

ကုလားကုတ်ကျွန်းမှာတပ်စွဲထားတဲ့ ပင်လယ်ရေကြောင်းကာကွယ်ရေးအမြောက်တပ်ကို မေ ၃ ရက်နေ့က တော်လှန်ရေးပူးပေါင်းတပ်တွေ ဝင်ရောက်တိုက်ခိုက်သိမ်းပိုက်ဖျက်ဆီးပြီးနောက် ကုလားကုတ်ကျွန်းပေါ်က စစ်ကောင်စီတပ်တွေ ထပ်မံတိုက်ခိုက်ခံရမှာစိုးရိမ်လို့ စစ်ကောင်စီက စက်လှေတွေကို ညဘက်သွားလာခွင့်ကန့်သတ်ခဲ့တာပါ။

ငါးဖမ်းလှေနဲ့ခရီးသည်လှေအပါအဝင် ဘယ်လှေမဆို ည ၆ နာရီမှ မနက် ၆ နာရီအတွင်း ညမထွက်ရအမိန့် စစ်ကောင်စီတပ်ကထုတ်ခဲ့ပြီး မလိုက်နာဘဲ ထွက်တဲ့လှေတွေကို ပစ်ခတ်ဖမ်းဆီးသွားမယ်လို့ အသိပေးခဲ့တယ်လို့ ဒေသခံတဦးက ပြောပါတယ်။

ကုလားကုတ်ကျွန်းမှာနေထိုင်သူတဦးက"PDF တွေက ပင်လယ်ထဲက မဖြစ်နိုင်တဲ့စခန်းကို ဝင်တိုက်ပြီး ရအောင်ဖောက်ထုတ်သွားတော့ ကြောက်ပြီးပိတ်လိုက်တာဟုတ်မယ်။ ညဘက်ဆို ဘယ်လှေမှကိုပေးမထွက်တာ။ နေ့ဘက်ဆိုရင်တောင် မှတ်ပုံတင်ကအစ အသေစစ်နေတာ။ ညဘက်ထွက်ရင် ပစ်ရမယ်ဆိုပြီး ပြောထားတယ် " လို့ ပြောပါတယ်။

နေ့ဘက်တွေမှာ ထွက်တဲ့လှေတွေအနေနဲ့ဘယ်နေရာသွားသွား စစ်သင်္ဘောဆီသွားပြီး မှတ်ပုံတင်ပြကာ သတင်းပို့ရပြီး ညဘက်မဖြစ်မနေသွားရတဲ့လှေတွေအနေနဲ့ ပိုက်ဆံပေးရသလို သူတို့သတ်မှတ်ထားတဲ့ အချက်ပြမီးကိုသာတပ်ဆင်ရတယ်လို့ ‌ငါးဖမ်းလှေသမားတဦးက ပြောပါတယ်။

စစ်ကောင်စီရေကြောင်းအမြောက်တပ်စခန်းကို တော်လှန်ရေးတပ်ဖွဲ့တွေ ဝင်ရောက် တိုက်ခိုက်နိုင်တာဟာ ငါးဖမ်းလှေတွေနဲ့ ချိတ်ဆက်မှုရှိနိုင်တယ်ဆိုပြီး စစ်ကောင်စီတပ်သားတွေက မေ ၈ ရက်မှာ ကုလားကုတ်ကျွန်းပေါ်ရှိ ငါးဖမ်းစက်လှေသမားတွေကို အစည်းအဝေး‌ခေါ် မေးမြန်းပြီးမှတ်ပုံတင်တွေ စစ်ဆေးခဲ့ပါတယ်။

ကုလားကုတ်ကျွန်းပင်လယ်ရေကြောင်းကာကွယ်ရေးတပ်ကို မေ ၃ ရက်နေ့မှာ တပင်ရွှေထီးစစ်ကြောင်းက ဝင်ရောက်တိုက်ခိုက်ခဲ့ပြီး တိုက်ပွဲအတွင်း စစ်ကောင်စီတပ်သား ၂ ဦးသေဆုံးပြီး ၂ ဦးအရှင်ဖမ်းမိကာ လက်နက်ခဲယမ်းတွေရရှိခဲ့သလို စခန်းကိုလည်း မီးရှို့ဖျက်ဆီးခဲ့တယ်လို့ တပင်ရွှေထီးစစ်ကြောင်းထံက သိရပါတယ်။