ကနေဒါနိုင်ငံ၊ ဗန်ကူဗားမြို့၊ ဗြိတိသျှကိုလမ်ဘီယာတက္ကသိုလ် ( UBC)မှာ ဒေသစံတော်ချိန် မေလ ၁၈ ရက်မွန်းလွဲပိုင်းက ကျင်းပတဲ့ မြန်မာ့အရေးဆွေးနွေးပွဲမှာ NUG အစိုးရ လူ့အခွင့်အရေး ဆိုင်ရာ ပြည်ထောင်စုဝန်ကြီး ဦးအောင်မျိုးမင်း တက်ရောက်ပြီး လက်ရှိ မြန်မာနိုင်ငံရဲ့ လူ့အခွင့်ရေး အခြေအနေတွေဆွေးနွေးခဲ့သလို စစ်ရာဇဝတ်မှုတွေကျူးလွန်နေတဲ့ မြန်မာစစ်တပ်ကို ကနေဒါ အပါအဝင် နိုင်ငံတကာအသိုက်အဝန်းက လက်နက်နဲ့ ဘဏ္ဍာရေး ပိတ်ဆို့ဒဏ်ခတ် အရေးယူမှုတွေ လုပ်ဆောင်ဖို့ တောင်းဆို တိုက်တွန်းသွားပါတယ်။
"ဒီမိုကရေစီထွန်းကားပြီး ခွဲခြားမှုကင်းရှင်းစွာဖြင့် အများပါဝင်နိုင်သော မြန်မာပြည်ကို ပုံဖော်ခြင်း (Charting Democratic and Inclusive Myanmar)" လို့အမည်ပေးထားတဲ့ လူထုတွေ့ဆုံ ဆွေးနွေးပွဲမှာ NUG ဝန်ကြီး ဦးအောင်မျိုးမင်းနဲ့အတူ မက်ဆာချူးဆက်တက္ကသိုလ်မှ နိုင်ငံရေးသိပ္ပံ ပါမောက္ခ Dr.Ardeth Maung Thawnghmung နဲ့ UBC Myanmar Initiative Fellow ဒေါက်တာ ထက်သီဟဇော်တို့လည်း ပါဝင်တက်ရောက် ဆွေးနွေးခဲ့ကြပါတယ်။
အဆိုပါ လူထုတွေ့ဆုံဆွေးနွေးပွဲကို ကနေဒါနိုင်ငံရောက် မြန်မာတိုင်းရင်းသားအင်အားစုတွေ သုတေသီတွေ၊ ကျောင်းသူကျောင်းသားတွေနဲ့ မြန်မာ့အရေး စိတ်ပါဝင်စားသူတွေ တက်ရောက်ခဲ့ကြပြီး အပြန်အလှန် မေးမြန်းဆွေးနွေးခဲ့ကြ ပါတယ်။
အမျိုးသားညီညွတ်ရေးအစိုးရ (NUG) ပြည်ထောင်စုဝန်ကြီး ဦးအောင်မျိုးမင်းဟာ ကနေဒါနိုင်ငံ မြို့တော် အော်တဝါကို ဆက်လက်သွားရောက်ဖို့ရှိပြီး ကနေဒါနိုင်ငံခြားရေးဌာနက တာဝန်ရှိသူတွေနဲ့တွေ့ဆုံကာ မြန်မာ့အရေး ဆွေးနွေးဖို့ ရှိနေပါတယ်။
Photo-DVB
