နေပြည်တော်ကောင်စီနယ်မြေ၊ လယ်ဝေးမြို့နယ်က တောင်ငူ ဧလာ လေတပ်စခန်းကို ဒီနေ့ မေ ၁၀ ရက်၊ မနက် ၄ နာရီလောက်မှာ ၁၀၇ မမ ရှော့တိုက်ဒုံးတွေနဲ့ ပစ်ခတ်တိုက်ခိုက်ခဲ့လို့ ဂျက်ဖိုက်တာ ၂ စီး ပျက်စီးကာ အရာရှိအဆင့်တွေအပါအဝင် စစ်ကောင်စီတပ်ဖွဲ့ဝင် ၁၀ ဦး သေဆုံးပြီး ၈ ဦး ဒဏ်ရာရရှိတယ်လို့ Brave Warriors for Myanmar (BWM) အဖွဲ့ကနေ သိရပါတယ်။

Brave Warriors for Myanmar (BWM) အဖွဲ့ တာဝန်ရှိသူတဦးက “K-8 Hangar ၁ လုံး မီးလောင်ပျက်စီးပြီး အဆောက်အဦ ပြိုကျတာကြောင့် ဂျက်ဖိုက်တာတစင်းက အတောင်ကျိုးတယ်၊ နောက်တစင်းက အမြီးပိုင်းကျိုးသွား​တယ်လို့ တပ်တွင်းသတင်းတွေဆီကနေ သိရတယ်” လို့ DVB ကို ပြောပါတယ်။

စစ်ကောင်စီတပ်သား အရာရှိ ၂ ဦး၊ စစ်သည် ၈ ဦး သေဆုံးပြီး အရာရှိ ၃ ဦး၊ တခြားစစ်သည် ၅ ဦး ဒဏ်ရာအပြင်းအထန် ရရှိသွားတယ်လို့လည်း သူက ဆက်ပြောပါတယ်။

တောင်ငူ ဧလာ လေတပ်စခန်း တိုက်ခိုက်ခံရလို့ ပျက်စီး၊ သေဆုံး၊ ဒဏ်ရာရမှုတွေအပေါ် စစ်ကောင်စီဘက်က တစုံတရာ ထုတ်ပြန်ပြောဆိုတာ မရှိသေးသလို DVB အနေနဲ့လည်း သီးခြား အတည်မပြုနိုင်သေးပါဘူး။

သံတောင်မြောက်ပိုင်း အထူးဒေသအဖွဲ့မှ ရဲဘော်တဦးက “အဲဒီစစ်ဆင်ရေးအတွက် ၁ လကျော်ကြာ အချိန်ယူ ပြင်ဆင်ခဲ့ရတယ်။ ပစ်ခတ်ပြင်ဆင်နေချိန်မှာလည်း မိုးရွာနေတာကြောင့် ခက်ခက်ခဲခဲ ပစ်ခဲ့ရ​တယ်” လို့ ပြောပါတယ်။

အခုပစ်ခတ်တိုက်ခိုက်မှုကို Brave Warriors for Myanmar (BWM) အဖွဲ့ရဲ့ စီမံမှုနဲ့ Mountain Knights Civilian Defense Force (MKCDF) အဖွဲ့က သံတောင်မြောက်ပိုင်းအထူးဒေသအဖွဲ့၊ Fighter Sar Kae အဖွဲ့၊ စစ်ဒေသ ၃၁ ပါတီရဲဘော်တွေ ပူးပေါင်းဆောင်ရွက်ခဲ့ကြတာ ဖြစ်တယ်လို့ သိရပါတယ်။