ယူကရိန်းသမ္မတ ဗိုလိုဒီမာ ဇလန်းစကီးကို အမျိုးသားလုံခြုံရေးအစောင့်တပ်ဖွဲ့ဝင် ၂ ဦးက လုပ်ကြံဖို့ ကြိုးစားခဲ့တယ်လို့ ဖော်ထုတ်နိုင်ခဲ့ပြီးနောက် ၂ ရက်အကြာမှာ အဆိုပါအဖွဲ့ရဲ့ အကြီးအကဲကိုပါ ရာထူးက ဖယ်ရှားလိုက်ပါတယ်။
အမျိုးသားအစောင့်တပ်ဆိုတာ ရဲတပ်ဖွဲ့တမျိုးဖြစ်ပြီး ပြည်ထဲရေးဌာနလက်အောက်ခံ အဖွဲ့အစည်း ဖြစ်ပါတယ်။
အမျိုးသားအစောင့်တပ်ဖွဲ့က ဗိုလ်မှူးကြီးအဆင့်ရှိသူ ၂ ဦးဟာ ဇလန်းစကီးနဲ့ တခြား ထိပ်တန်းတာဝန်ရှိသူတွေကို လုပ်ကြံဖို့ ကြိုးစားခဲ့တယ်လို့ ယူကရိန်းထောက်လှမ်းရေး (SBU) က စွပ်စွဲခဲ့ပါတယ်။
ဒီလုပ်ကြံမှုဟာ ရုရှားသမ္မတ ဗလာဒီမာပူတင်ရဲ့ နောက်ထပ် ၆ နှစ်သက်တမ်း ကျမ်းကျိန်ပွဲအတွက် လက်ဆောင်အဖြစ် ရည်ရွယ်ခဲ့တယ်လို့လည်း SBU က ထုတ်ပြန်ပါတယ်။
ဒီပုဂ္ဂိုလ် ၂ ဦးကို ရုရှားထောက်လှမ်းရေး (FSB) က စုဆောင်းခဲ့တာဖြစ်ပြီး လျှို့ဝှက်သတင်းအချက်အလက်တွေ မော်စကိုကို ပေးပို့နေသူတွေလည်း ဖြစ်တယ်လို့ ဆိုပါတယ်။
ရုရှားကျူးကျော်လာချိန်မှာ တိမ်းရှောင်ဖို့ အခွင့်အရေးကို ပယ်ချခဲ့ပြီး အညံ့မခံဘဲ တွန်းလှန်ဖို့လမ်းကို ရွေးခဲ့တဲ့ ယူကရိန်းသမ္မတဟာ စစ်ပွဲမှာ အဓိကအကျဆုံး ပုဂ္ဂိုလ်တဦး ဖြစ်ပါတယ်။
Source/Photo-Reuters
