အာဖဂန်နစ္စတန်နိုင်ငံ၊ မိုင်ဒန် ဝါရ်ဒက်ခ်ပြည်နယ်၊ နီးရ်ခ်ခရိုင်မှာ မမျှော်လင့်ဘဲ နှင်းကျပြီး အေးမြတဲ့ ရာသီဥတုကြောင့် သီးပင်စားပင်တွေ ပျက်စီးခဲ့လို့ အဲဒီဒေသမှာနေတဲ့ မိသားစု ၂,၀၀၀ နီးပါးအတွက် ငွေကြေးအများကြီး နစ်နာဆုံးရှုံးခဲ့တယ်လို့ အာဖဂန်ဥယျာဉ်မှူးတွေက ဧပြီ ၃၀ ရက်မှာ ပြောပါတယ်။
တရုတ်ဆီးသီးပင်နဲ့ ပန်းသီးဥယျာဉ် ၂ ခုရှိတဲ့ ဂူလာဂျန်နာက နှင်းကျလို့ သူ့မိသားစုဝင် ၁၅ ဦးစလုံးရဲ့ ဝင်ငွေတွေ ဆုံးရှုံးခဲ့ရတယ်လို့ ပြောပါတယ်။
ထိခိုက်နစ်နာခဲ့ရတဲ့ လယ်သမားတွေကို အာဖဂန်အာဏာပိုင်တွေက ကူညီပေးဖို့ကိုလည်း သူက တောင်းဆိုခဲ့ပါတယ်။
အခုနှစ် အခုအချိန်မှာ ဆီးနှင်းတွေကျတာမျိုးကို လုံးဝမကြုံဖူးဘဲ ဒီလိုအဖြစ်အပျက်မျိုးကို သူ့တသက် တခါမှ မတွေ့ဖူးဘူးလို့ ဂူလာဂျန်က ပြောပါတယ်။
ပြီးခဲ့တဲ့ ၂ ရက်အတွင်း နှင်းကျမှုကြောင့် ပန်းသီး၊ တရုတ်ဆီးသီးနဲ့ ချယ်ရီပင် ရာနဲ့ချီပြီး ပျက်စီးသွားခဲ့ကာ ဥယျာဉ်မှူးတွေက ပျက်စီးနေတဲ့ အကိုင်းအခက်အားလုံးကို ခုတ်ထစ်ခဲ့ရတယ်လို့ ဒေသခံတောင်သူတွေက ပြောပါတယ်။
ပန်းသီးနဲ့ တရုတ်ဆီးသီးပင်တွေ ပန်းပွင့်တဲ့ရာသီမှာ နှင်းကျတာဟာ ဒီပြည်နယ်က တောင်သူတွေအတွက် စိုးရိမ်စရာဖြစ်တယ်လို့ မိုင်ဒန် ဝါရ်ဒက်ခ် ပြည်နယ်ရဲ့ ပြန်ကြားရေးရုံးက ဧပြီ ၂၉ ရက်မှာ ပြောခဲ့ပါတယ်။
Source/Photo-Reuters
