ရန်ကုန်၊ မြောက်ဥက္ကလာပမြို့နယ်၊ ရွှေပေါက်ကံမြို့သစ်မှာ EPC က စက်ရုံတွေကို လျှပ်စစ်မီး ခိုးရောင်းစားပြီး ရပ်ကွက်ကို တနေ့ ၁ နာရီ၊ နာရီဝက်သာ မီးပေးတာကြောင့် ပြည်သူတွေ ဒုက္ခရောက်ရတယ်လို့ မြို့ခံတွေဆီက သိရပါတယ်။
ရွှေပေါက်ကံမြို့မှာ EPC က ရပ်ကွက်ထဲကို မီးပေးရာမှာ မိမိစိတ်တိုင်းကျ ပေးချင်တဲ့အချိန် ပေးပြီး အလှည့်ကျ မီးပေးတဲ့ အချိန်ထဲမှာ ၂ နာရီ ၃ နာရီကို မီးဖြတ်ကာ စက်ရုံတွေကို မီးခိုးရောင်းစားနေတယ်လို့ ၂၂ ရပ်ကွက်နေသူတဦးက DVB ကို ပြောပါတယ်။
“မီးက အရင်က အလှည့်ကျလာတာ၊ အခု မနက် ၉ နာရီ လာတယ်၊ ၁၀ မိနစ်လောက်လာပြီး ပျက်သွားတယ်၊ နေ့လယ် ၁၂ နာရီခွဲ ပြန်လာတယ်၊ ၁ နာရီဆို ပြန်ပျက်တယ်၊ နာရီဝက်လောက်ပဲပေးတယ်၊ လျှပ်စစ်နဲ့ပတ်သက်တဲ့အလုပ်တွေ ဘာမှလုပ်လို့မရဘူး။”
ညနေ ၅ နာရီ ပြန်လာရမယ့်အချိန်တွေမှာ ၁၅ မိနစ်လောက်သာ မီးလာပြီး ည ၁၀ နာရီအထိ မီးမပေးလို့ အထည်ချုပ်စက်ရုံသမားတွေ ထမင်းဝယ်စားရပြီး အပိုငွေကုန်ကျမှုတွေရှိတယ်လို့ ရှင်ဆောင်း အထည်ချုပ်အလုပ်သမားတဦးက DVB ကို ပြောပါတယ်။
“ညနေ ၅ နာရီဆို မီးပေးရမယ့်အချိန်မှာ မီးမပေးဘူး၊ ၅ မိနစ်လောက်လာပြီး ၃ နာရီလောက် ပျက်တယ်၊ ရတဲ့လစာနဲ့ မီးပျက်လို့ ထမင်းဝယ်စားရတဲ့စရိတ်က မကာမိဘူး၊ ရပ်ကွက်ထဲမှာ မီးပျက်နေတဲ့အချိန် စက်ရုံတွေမှာ မီးလာနေတယ်၊ စက်ရုံတွေကို EPC က မီးခိုးပေးနေတယ်ဆိုတာ သိသာတယ်။”
မီးလာချိန်မမှန်ပေမဲ့ မီးပျက်ရမယ့်အချိန်ကို ကြိုတင်မီးဖျက်တာမျိုး ရှိတဲ့အပြင် တနေ့ကို နာရီဝက် တနာရီသာ မီးလာတဲ့အချိန်တွေလည်း ရှိတယ်လို့ လုပ်ငန်းရှင်တဦးက သုံးသပ်ပြောဆိုပါတယ်။
“ရွှေပေါက်ကံ EPC က ဘယ်လိုပုံစံမျိုးလဲဆိုတော့ လူထုကို စောက်ဂရုစိုက်စရာမလိုဘူး၊ ရပ်ကွက်ထဲကို မီးဖြတ်မယ်၊ စက်ရုံကို ၃ နာရီ ၂ နာရီ ရောင်းစားမယ်၊ သိချင်တဲ့သူက ဖုန်းဆက်မေးရင် အဆိုတော်ဗျူဟာကိစ္စ သိလား ဆိုပြီး ခြိမ်းခြောက်တယ်၊ မပေးရင် မပေးနဲ့၊ ပေးတဲ့ပုံစံ အလှည့်ပေးတဲ့ အချိန်ထဲက စက်ရုံတွေ ခိုးမရောင်းသင့်ဘူး။”
မင်္ဂလာဒုံစက်မှုဇုန်၊ ရွှေပေါက်ကံစက်မှုဇုန် စတဲ့ စက်မှုဇုန်တွေ ပါဝင်ပြီး စက်ရုံတွေကို မီးခိုးရောင်းတဲ့ကိစ္စကို ပြည်သူတချို့ မကျေမနပ်ဖြစ်နေတယ်လို့ ဒေသခံတွေဆီက သိရပါတယ်။
ရွှေပေါက်ကံမြို့ EPC က ရပ်ကွက်နဲ့ ကျေးရွာတွေကို အရင်က လျှပ်စစ်မီးကို မနက် ၉ နာရီမှ နေ့လယ် ၁ နာရီ၊ ညနေ ၅ နာရီမှ မနက် ၆ နာရီအထိ အလှည့်ကျပေးရာမှ မတ်လကစတင်ပြီး တရက်ကို နာရီဝက် တနာရီသာ ပေးတော့တာ ဖြစ်ပါတယ်။
