မွန်ပြည်နယ်၊ သထုံမြို့နယ်က ရဲစခန်းတခုနဲ့ စစ်ကောင်စီတပ်ရင်းတခု၊ ဘီးလင်းမြို့နယ်က စစ်ကောင်စီတပ်ရင်းတခုတို့ကို ဧပြီ ၂၇ ရက်နေ့မှာ တော်လှန်ရေးပူးပေါင်းတပ်ဖွဲ့တွေက ဒရုန်းနဲ့ တိုက်ခိုက်ခဲ့တယ်လို့ သထုံပြည်သူ့ကာကွယ်ရေးတပ်ဖွဲ့(TPDF) နဲ့ ဒေသခံတွေက ပြောပါတယ်။
သထုံမြို့နယ်က အင်အား ၃၀ လောက်ရှိတဲ့ သိမ်ဆိပ်နယ်မြေရဲစခန်း၊ ဝင်းပကျေးရွာက အင်အား ၇၀ လောက်ရှိတဲ့ ခမရ ၉ နဲ့ ဘီလင်းမြို့နယ်၊ ဇီးဝန်းရွာက အင်အား ၅၀ လောက်ရှိတဲ့ အမတ ၃၁၄ တို့ကို တော်လှန်ရေးပူးပေါင်းတပ်တွေက ဧပြီ ၂၇ ရက် မနက် ၉ နာရီခွဲကနေ ၁၁ နာရီအထိ ဒရုန်းနဲ့ တပြိုင်တည်း တိုက်ခိုက်ခဲ့ပါတယ်။
သထုံမြို့နယ်၊ သုဝဏ္ဏဝတီမြို့၊ သိမ်ဆိပ်ရပ်ကွက်မှာရှိတဲ့ သိမ်ဆိပ်နယ်မြေရဲစခန်းကို မနက် ၉ နာရီခွဲလောက်မှာ နယ်မြေခံတော်လှန်ရေးတပ်ဖွဲ့က ဒရုန်းဗုံးသီး ၃ လုံးနဲ့ ပစ်ချတိုက်ခိုက်ခဲ့တာလို့ ရဲစခန်းနဲ့နီးစပ်သူတယောက်က ပြောပါတယ်။
“မနက်က PDF တွေဒရုန်းနဲ့ဗုံးလာချတာ၊ စခန်းမှူးရုံးခန်းပေါ်ကို ၁ လုံး၊ ဘန်ကာပေါ်ကို ၁ လုံးနဲ့ စခန်းနဲ့ ဘန်ကာကြားကို ၁ လုံးပေါက်ကွဲခဲ့တာ။ လူထိခိုက်မှုတော့မရှိပါဘူး” လို့ ပြောပါတယ်။
အဲဒီတိုက်ခိုက်မှုအပြီး ဒရုန်းဟာ ရဲစခန်းရဲ့ အရှေ့တောင်ဘက်ကို ပျံသန်းသွားတုန်း လက်နက်ငယ်တွေနဲ့ ပစ်ခတ်ခံရပြီး ပျက်ကျဆုံးရှုံးခဲ့တယ်လို့ သထုံပြည်သူ့ကာကွယ်ရေး တပ်ဖွဲ့(TPDF) တာဝန်ရှိသူတဦးက ပြောပါတယ်။
“သိမ်ဆိပ်ရဲစခန်း၊ ခမရ ၉ နဲ့ အမတ ၃၁၄ ကို တပြိုင်တည်းဒရုန်းနဲ့တိုက်တာ။ ထိခိုက်ကျဆုံးမှုရှိပေမယ့် ဆက်လက်စုံစမ်းစစ်ဆေးနေတုန်းပါပဲ။ သိမ်ဆိပ်ရဲစခန်း တိုက်ခိုက်တဲ့အချိန်မှာ စစ်ကောင်စီဘက်က စက်လက်တွေ လက်နက်ငယ်တွေနဲ့ပြန်ပစ်တော့ ဒရုန်းတစီးပျက်ကျပြီး ဆုံးရှုံးခဲ့တယ်။ တိုက်ခိုက်ခံရပြီးတော့ သိမ်ဆိပ်ရဲစခန်းဝင်းထဲ လူဝင်လူထွက်ပိတ်လိုက်တယ်” လို့ ပြောပါတယ်။
တိုက်ခိုက်ခံရပြီးနောက် အမတ ၃၁၄ နဲ့ ခမရ ၉ တို့က လက်နက်ကြီးတွေနဲ့ ရွာတွေဘက်ကို ဆက်တိုက်ပစ်ခတ်နေတယ်လို့ ရွှေရောင်ပြရွာသားတဦးကပြောပါတယ်။
“သူတို့အခု လက်နက်ကြီးတွေနဲ့ ရွာတွေကိုပစ်နေတာ။ အနီးနားပတ်ဝန်းကျင်တွေမှာ ကျရောက်ပေါက်ကွဲပေမယ့် ထိခိုက်မှုတော့ ခုထိမရှိသေးဘူး” လို့ ပြောပါတယ်။
အဲဒီ တိုက်ခိုက်မှုကို KNU/KNLA တပ်မဟာ ၁ တပ်ရင်း ၂၊ PDF တပ်ရင်း၂ Drone တပ်ဖွဲ့၊ တပ်မဟာ Drone တပ်ဖွဲ့နဲ့ သထုံမြို့နယ် ပြည်သူ့ကာကွယ်ရေး တော်လှန်ရေးတပ်ဖွဲ့ TPDF (P2-7805 တပ်ခွဲ ၁) တို့က ပူးပေါင်းဆောင်ရွက်ခဲ့ပါတယ်။
ပြီးခဲ့တဲ့ မတ် ၁၉ ရက်နေ့ မနက်ပိုင်းကလည်း သထုံမြို့နယ်၊ ကျိုက်က္ကော်မြို့က ရထားလမ်း ပြုပြင်နေတဲ့အဖွဲ့ ဒရုန်းနဲ့ တိုက်ခိုက်ခံခဲ့ရသေးတယ်လို့ သိရပါတယ်။
