ထိုင်းမြောက်ပိုင်း ချင်းမိုင်ခရိုင်၊ မဲ့တိုင်မြို့နယ်ထဲမှာ မြန်မာနယ်စပ်ဘက်ကနေ သယ်ဆောင်လာတဲ့ စိတ်ကြွဆေး ၁၄,၆၀၀,၀၀၀ ဖမ်းဆီးရမိတယ်လို့ ထိုင်းသတင်းတွေမှာ ဖော်ပြပါတယ်။
နယ်စပ်ဘက်ကနေ မူးယစ်ဆေးဝါး အချီကြီး ဝင်ရောက်လာဖို့ရှိကြောင်း ကြိုတင်သတင်းရထားတဲ့အတွက် ထိုင်းစစ်တပ်၊ နယ်မြေခံရဲနဲ့ မူးယစ်နှိမ်နင်းရေး ရဲတပ်ဖွဲ့ဝင်တွေပါတဲ့ ပူးပေါင်းအဖွဲ့ဟာ ဧပြီ ၂၀ ရက် မနက်စောစောက ချင်းဒေါင်းမြို့နယ် ကဲန်ပန်းတောဝ်းကျေးရွာအုပ်စုထဲမှာ ဂိတ်ချပြီးစောင့်ကြည့်နေခဲ့တာပါ။
စောင့်ကြပ်စစ်ဆေးစဉ် ကား ၃ စီး ဝင်ရောက်လာပေမဲ့ စစ်ဆေးရေးဂိတ်ရှိတဲ့လမ်းကို ရှောင်ကွင်းပြီး တခြားလမ်းကနေ ကွေ့ပတ်မောင်းသွားတာကြောင့် ကားနဲ့ အနောက်ကနေ လိုက်ဖမ်းခဲ့တယ်လို့ တာဝန်ရှိသူတဦးက သတင်းထောက်တွေကို ပြောပါတယ်။
မနက် ၁ နာရီခွဲလောက်မှာ အဲဒီကားတွေကို မဲ့တိုင်မြို့နယ် ပန်ကဝမ့်အုပ်စု အင်းထခင်ကျေးရွာထဲမှာ မီလာပြီး ယာဉ်မောင်းတဦးကိုပဲ ဖမ်းမိခဲ့ကာ ကျန် ၂ ဦးကတော့ ကားကိုပစ်ပြီး ထွက်ပြေးသွားတယ်လို့ ဆိုပါတယ်။
ကား ၃ စီးအနက် တစီးမှာ လမ်းပြကားဖြစ်ပြီး နောက်ကား ၂ စီးမှာတော့ မြွေရေခွံအိတ် စုစုပေါင်း ၇၃ အိတ်၊ တအိတ်ကို စိတ်ကြွဆေး ၂ သိန်းစီပါတာကြောင့် စုစုပေါင်း စိတ်ကြွဆေး ၁၄,၆၀၀,၀၀၀ ဖမ်းမိတာလို့ ဆိုပါတယ်။
ဒီမတိုင်ခင်ရှေ့ ဧပြီ ၁၉ ရက် ညနေ ၃ နာရီခွဲလောက်ကလည်း လမ်းပွန်းခရိုင် မဲ့ထား စစ်ဆေးရေးဂိတ်မှာ အိမ်စီး စလွန်းကားတစီးပေါ်ကနေ 999 နဲ့ Y1 အမှတ်တံဆိပ် စိတ်ကြွဆေးပြား ၆ သန်း ဖမ်းမိခဲ့ပါတယ်။
အသက် ၅၃ နှစ်ရွယ် ယာဉ်မောင်းကို စစ်ဆေးချက်အရ သူဟာ အဆိုပါစိတ်ကြွဆေးတွေကို နယ်စပ် ဝိန်းဟိုင်မြို့နယ်ကနေ သယ်လာပြီး မဲ့တိုင်မြို့နယ်ရှိ အိမ်တအိမ်မှာ အရင်လာထားသွားတာလို့ သိရပါတယ်။
တာဝန်ရှိသူတွေက အဆိုပါအိမ်ကို သွားရောက်စစ်ဆေးရာမှာ နောက်ထပ် စိတ်ကြွဆေးပြား ၂ သန်း ၄ သိန်းနဲ့ အိုက်စ်မူးယစ်ဆေး ၄ ကီလိုဂရမ်ကို ဖမ်းမိခဲ့တယ်လို့ တာဝန်ရှိသူက ပြောသွားပါတယ်။
Source- Maesaipress / Chiangmai News
