ထိုင်းနိုင်ငံ ဘန်ကောက် လတ်ဖရော့တ်နဲ့ ရမ်းခမ်းဟိုင်နယ်မြေထဲမှာ ဘတ် ၃ သန်းကျော် တန်ဖိုးရှိ E-စီးကရက်ဘူး ၁၀,၀၀၀ ကျော် ဖမ်းဆီးရမိတယ်လို့ ထိုင်းပီဘီအက်စ်သတင်းမှာ ဖော်ပြပါတယ်။
အဆိုပါနယ်မြေတွင်း စာသင်ကျောင်း၊ တက္ကသိုလ်နဲ့ လူနေထူထပ်ရပ်ကွက်အနီးတဝိုက်မှာ E- စီးကရက်ဘူးတွေ ရောင်းချနေကြောင်း တိုင်ကြားချက်ရတဲ့အတွက် ဝန်ကြီးများရုံး၊ စားသုံးသူများ ကာကွယ်ရေးဌာနနဲ့ နယ်မြေရဲတပ်ဖွဲ့ဝင်တွေ ပူးပေါင်းပြီး သွားရောက်စစ်ဆေး ဖမ်းဆီးခဲ့တယ်လို့ ဝန်ကြီးများရုံး ပြောရေးဆိုခွင့်ရှိသူ နန်းဖုန်းဖိတ် ချွန်းလအစ်က ဧပြီ ၁၉ ရက်မနက် သတင်းစာရှင်းပွဲမှာ ပြောပါတယ်။
လတ်ဖရော့တ်နဲ့ ရမ်ခမ်းဟိုင်နယ်မြေရှိ ဈေးဆိုင် ၅ ဆိုင်ကနေ ရိုးရိုးနဲ့ ချစ်စရာကာတွန်းရုပ်မျိုးစုံ၊ အရောင်အသွေးစုံ E- စီးကရက်ဘူးပေါင်း ၁၀,၀၀၀ ကျော် သိမ်းဆည်းရမိပြီး တန်ဖိုး ဘတ် ၃ သန်းကျော်ရှိတယ်လို့ ဆိုပါတယ်။
အများဆုံးသိမ်းဆည်းရမိတဲ့ဆိုင်မှာ ပုဂ္ဂလိကတက္ကသိုလ်ကျောင်းအနီးမှာ တည်ရှိပြီး အဲဒီဆိုင်ကနေ E- စီးကရက်ဘူးပါ အိတ်ပေါင်း ၁၀ အိတ် သိမ်းဆည်းရမိကြောင်း၊ ဈေးရောင်းသူမှာ အသက် ၂၂ နှစ်နဲ့ ၂၃ နှစ်အရွယ် လူငယ် ၂ ဦးဖြစ်ပြီး သူတို့ကတော့ ဆိုင်ရှင်မဟုတ်ဘဲ အရောင်းဝန်ထမ်းသာဖြစ်တယ်၊ ဆိုင်ရှင် ဘယ်သူဆိုတာ မသိဘဲ ရောင်းရငွေတွေ ဘဏ်ကိုလွှဲပေးရတယ်၊ တနေ့ကို ဘတ် ၁၀,၀၀၀ ကျော်ဖိုး ရောင်းရတယ်၊ အသက် ၂၀ အောက် လူငယ်တွေကိုတော့ ရောင်းမပေးဘူးလို့ ပြောပါတယ်။
အဆိုပါ ဈေးဆိုင် ၅ ဆိုင်မှာ မိမိကိုယ်မိမိ ဆိုင်ပိုင်ရှင်လို့ ဝန်ခံပြောဆိုသူမှာ တဦးတည်းသာရှိပြီး ကျန် ၄ ဆိုင်မှာ အရောင်းဝန်ထမ်းတွေလို့ ဆိုပါတယ်။
ထိုင်းနိုင်ငံ စားသုံးသူများကာကွယ်ရေး ဥပဒေအရ E- စီးကရက်ရောင်းချပါက ထောင်ဒဏ် ၃ နှစ်ထက်မပို ဒဏ်ငွေ ဘတ် ၆ သိန်းထက်မပို ဒါမှမဟုတ် နှစ်မျိုးလုံး ကျခံရမယ်လို့ ဆိုပါတယ်။
ထိုင်းနိုင်ငံမှာ E- စီးကရက် ရောင်းဝယ်သုံးစွဲတာကို တားမြစ်ထားပြီး လက်ဝယ်ထားရှိ ဖမ်းမိပါက တဘူးကို ဘတ် ၈,၀၀၀ ထိ ဒဏ်ငွေပေးဆောင်ရတယ်လို့ ဖမ်းဆီးရမိ သတင်းတွေအရ သိရပါတယ်။
