မွန်ပြည်နယ်၊ ရေးမြို့နယ် ကိုးမိုင်ကျေးရွာအနီးမှာရှိတဲ့ ခလရ ၂၉၉ တပ်ရင်းနဲ့ မလွှဲတောင် စစ်ဆေးရေးဂိတ်ကို တော်လှန်ရေးပူးပေါင်းတပ်တွေက ဝင်ရောက်တိုက်ခိုက်ခဲ့တာကြောင့် စစ်ဗိုလ် ၁ ဦး အပါအဝင် ၆ ဦး သေဆုံးခဲ့ပြီး ၃၀ ကျော် ဒဏ်ရာရရှိခဲ့တယ်လို့ မွန်ပြည်တော်လှန်ရေးတပ် (MSRF) က ဧပြီ ၁၇ ရက်က ထုတ်ပြန်ခဲ့ပါတယ်။
ရေးမြို့နယ်၊ ကိုးမိုင်ကျေးရွာအနီး အင်အား ၆၀ ခန့်ရှိတဲ့ ခလရ ၂၉၉ ကို ဧပြီ ၁၂ ရက်နေ့ မနက် ၈ နာရီကျော်မှာ တော်လှန်ရေးပူးပေါင်းတပ်တွေက လက်နက်ကြီး၊ ဒရုန်းတွေနဲ့ပစ်ပြီး ချေမှုန်းရေးတပ်တွေက ဝင်ရောက်တိုက်ခိုက်ခဲ့ပါတယ်။
ခလရ ၂၉၉ ကို ဝင်တိုက်နေတဲ့အချိန် မနက် ၁၀ နာရီလောက်မှာ ဒရုန်းတပ်က အင်အား ၇၀ ကျော်ရှိ ရေး-ထားဝယ် လမ်းမပေါ်မှ မလွဲတောင်စစ်ဆေးရေးဂိတ်ကို ဒရုန်းဗုံးသီး ၁၅ လုံးချပြီး တိုက်ခိုက်ခဲ့ပါတယ်။
ခလရ ၂၉၉ နဲ့ မလွှဲတောင်ဂိတ်တိုက်ခိုက်မှုမှာ စစ်ကောင်စီဘက်မှ ဗိုလ် ၁ ဦးအပါအဝင် ၆ ယောက်သေဆုံးပြီး ၃၀ ကျော်ဒဏ်ရာရရှိကာ တော်လှန်ရေးပူးပေါင်းတပ်ဘက်မှာလည်း ၁ ဦးကျပြီး ၂ ဦး ဒဏ်ရာရရှိခဲ့ပါတယ်။
MSRF ပြန်ကြားရေးတာဝန်ခံ နဲလ်နဂါး(နိုင်နဂါး) က “ကျနော်တို့က မနက်အစောကြီး ဝင်တိုက်ဖို့ စီစဉ်ထားပေမယ့် အရမ်းမှောင်ပြီး လမ်းပျောက်မှာဆိုးလို့ မိုးလင်းမှဝင်တိုက်ခဲ့တာ။ ခလရ ၂၉၉ ကို တိုက်နေတဲ့အချိန်မှာပဲ ဒရုန်းအဖွဲ့က မလွှဲတောင်ဂိတ်ကို ဝင်တိုက်တာ။ ကျနော်တို့ ကျည်ဆန်အနေအထားရရော လက်နက်အနေအထားအရကြောင့်ပါ ၁၀ နာရီ ၄၅ လောက်မှာ ပြန်ဆုတ်ခွာခဲ့ရတယ်" လို့ ပြောပါတယ်။
ရေးမြို့ ခလရ ၂၉၉ နဲ့ မလွှဲတောင်စစ်ဆေးရေးဂိတ်မှာ ရေး-ထားဝယ်ကားလမ်းမပေါ်မှာရှိတာကြောင့် ရေး-ထားဝယ်လမ်းပိုင်းကို တော်လှန်ရေးအဖွဲ့က အပြည့်အဝ စိုးမိုးနိုင်ဖို့နဲ့ မြို့သိမ်းတိုက်ပွဲမစမီ အနီးနားမှာရှိတဲ့တပ်တွေကို သိမ်းပိုက်နိုင်ဖို့အတွက် တိုက်ခိုက်ခဲ့တာလို့ ဆိုပါတယ်။
တိုက်ပွဲအတွင်း စစ်ကောင်စီဘက်က ဂျက်လေယာဉ် ၃ စီး၊ ရဟတ်ယာဉ် တစီးတို့နဲ့ ပစ်ခတ်တိုက်ခိုက်ခဲ့သလို ကလော့ရွာအခြေစိုက် အမတ ၃၁၆ ကလည်း လက်နက်ကြီးတွေနဲ့ ပစ်ကူပေးခဲ့တာကြောင့် ကိုးမိုင်ကျေးရွာရှိ ဘုန်းကြီးကျောင်းနဲ့ နေအိမ် ၂ လုံး ပျက်စီးခဲ့ပါတယ်။
အဲဒီတိုက်ပွဲကြောင့် ကိုးမိုင်ရွာအပါအဝင် အနီးအနားကျေးရွာတွေက ဒေသခံတွေ စစ်ဘေးတိမ်းရှောင်ခဲ့ရပြီး ဧပြီ ၁၅ ရက်မှ နေရပ်ပြန်နိုင်ခဲ့တယ်လို့ ဒေသခံတဦးက ပြောပါတယ်။
စစ်ကောင်စီက မလွှဲတောင်စစ်ဆေးရေးဂိတ်ကို ဧပြီ ၁၁ ရက်ကစပြီး မြေသယ်ကားတွေနဲ့ အင်အားဖြည့်တင်းနေတယ်လို့ မွန်ပြည်တော်လှန်ရေးတပ် (MSRF) က ပြောပါတယ်။
တိုက်ခိုက်မှုကို မွန်ပြည်တော်လှန်ရေးတပ် (MSRF)၊ ပြည်သူ့ကာကွယ်ရေးတပ်မတော် ဒေါနစစ်ကြောင်း၊ မြန်မာနိုင်ငံလုံးဆိုင်ရာ ကျောင်းသားတပ်မတော် ABSDF တပ်ရင်း - (၁)၊ ကံပေါက်ဒေသ ပြည်သူ့ကာကွယ်ရေးအဖွဲ့ (KBDF) - ဒေါနတပ်ခွဲ(၄)၊ ထားဝယ်ကာကွယ်ရေးအဖွဲ့ (DDT) - ဒေါနတပ်ခွဲ (၇)၊ ဝေဟင်ဒေါနတပ်ခွဲ (၆)၊ ထားဝယ် တပ်ရင်း(၁)၊ ရေးသိမ်းငှက်၊ Ye Defense Force(YDF)၊ ရေးပြောက်ကျားတပ် (YGF) ဒေါနတပ်ခွဲ - (၃)၊ Ye Air Force(YAF) ၊ Saw Dragon Drone Force(အထူးဒရုန်းတပ်ဖွဲ့ ) တို့က ပူးပေါင်းတိုက်ခိုက်ခဲ့ပါတယ်။
ရေး-ထားဝယ် အမှတ် ၈ ပြည်ထောင်စုလမ်းပိုင်းပိုင်းကို ဧပြီ ၁ ရက်ကစပြီး ည ၆ နာရီမှ မနက် ၆ နာရီအတွင်း ဖြတ်သန်းသွားလာခွင့်ကို တော်လှန်ရေးပူးပေါင်းတပ်တွေက ပိတ်ခဲ့ပြီး အရေးပေါ်ဖြတ်သန်းဖို့ လိုအပ်ပါက အကြောင်းကြားပြီးဖြတ်သန်းဖို့ ထုတ်ပြန်ထားပါတယ်။
