မကွေးတိုင်း၊ ပခုက္ကူမြို့နယ်မှာ စစ်ကောင်စီတပ်သားတွေ တပ်စွဲထားတဲ့နေရာနဲ့ စစ်ဆေးရေးဂိတ်ကို ဒရုန်းနဲ့ ဗုံးကြဲတိုက်ခိုက်ခံရလို့ စစ်ကောင်စီတပ်သားနဲ့ ပျူစောထီး ၃ ယောက် သေဆုံးပြီး ဒဏ်ရာရသူတွေလည်းရှိနိုင်တယ်လို့ မြိုင် ပကဖ ဆီကနေ သိရပါတယ်။
မြိုင် ပကဖ တာ၀န်ခံတယောက်က “ပြီးခဲ့တဲ့ ဧပြီလ ၅ ရက်နေ့၊ ညနေ ၆ နာရီလောက်မှာ ပြည်သူတွေကို သူတို့စိတ်မထင်ရင်မထင်သလို ဖမ်းဆီးရိုက်နှက် ညှင်းပန်းနှိပ်စက်တာ၊ ပြည်သူတွေရဲ့ကားတွေဆီကနေ ဆက်ကြေးတောင်း ပစ္စည်းလုယူနေတဲ့ ကန်တော်ကျေးရွာက သူတို့ ယာယီတပ်စခန်းကို ဒရုန်းနဲ့အီနာဂါဗုံး ၈ လုံး ကြဲချတိုက်ခိုက်ခဲ့တာပါ” လို့ အတည်ပြုပြောပြပါတယ်။
အဲဒီတိုက်ခိုက်မှုအတွင်း စစ်ကောင်စီနဲ့ပျူစောထီးတွေဘက်က အသေအပျောက်စာရင်းကို မသိရသေးဘူးလို့ သူက ဆိုပါတယ်။
ဧပြီ ၆ ရက်နေ့ မနက်ပိုင်းမှာတော့ ဂိတ်စခန်း ၂ ခုကို ထပ်ပြီးတိုက်ခိုက်တာကြောင့် စစ်သားနဲ့ ပျူစောထီး ၃ ယောက်သေဆုံးတယ်လို့ သိရပါတယ်။
Black Cobra အဖွဲ့တာဝန်ရှိသူက “ဧပြီလ ၆ ရက်နေ့ မနက် ၇ နာရီလောက်မှာ ညောင်ပင်လှလမ်းခွဲက သူတို့ဂိတ်စခန်း ၂ ခုကို အီနာဂါဗုံး ၈ လုံးစီ ၂ ရက်ဆက်တိုက် ကြဲချတိုက်ခိုက်ခဲ့လို့ စခနဲ့ပျူ ၃ ကောင် ငရဲရောက်သွားတယ်။ ဒဏ်ရာရတဲ့သူတွေလည်းရှိတယ်” လို့ ဒီဗွီဘီကို ပြောပါတယ်။
အဲဒီ တိုက်ခိုက်မှုတွေကို မြိုင်-ပကဖ၊ PKU Thurain၊ Young Force (UG)၊ Kamma Defence Force (KMDF)၊ ဓားမင်းကြီးတပ်ဖွဲ့ (DMG) နဲ့ ကမ္မတပ်ပေါင်းစုတို့ ပူးပေါင်းတိုက် ခိုက်ခဲ့တာလို့ သိရပါတယ်။
