မွန်ပြည်နယ်၊ သထုံမြို့နယ်ရှိ ကျေးရွာတွေကို စစ်ကောင်စီက လက်နက်ကြီးနဲ့ ပစ်ခတ်တာကြောင့် ကလေးနှစ်ဦး အပါအဝင် ခြောက်ဦး ဒဏ်ရာရရှိခဲ့ပြီး နေအိမ်တလုံးလည်း ပျက်စီးခဲ့တယ်လို့ ကရင်အမျိုးသားအစည်းအရုံး (KNU) က ဧပြီ ၃ ရက်မှာ ထုတ်ပြန်ခဲ့ပါတယ်။

သထုံမြို့နယ်ရှိ ကျေးရွာတွေထဲကို မတ် ၃၀ ရက်က စစ်ကောင်စီ ခြေမြန်တပ်ရင်း ခမရ ၉ တပ်က လက်နက်ကြီးသုံးလုံး ပစ်ခတ်ခဲ့ရာ ချောင်းစောင့်ကျေးရွာထဲကို နှစ်လုံး ကျရောက်ပေါက်ကွဲခဲ့ပါတယ်။

လက်နက်ကြီးပေါက်ကွဲမှုကြောင့် လက်နက်ကြီးစမှန်ကာ အသက် ၁၆ နှစ်အရွယ် စောနေလင်း ကျောကုန်းဒဏ်ရာ၊ အသက် ၁၃ နှစ်အရွယ် စောဖြိုးဖြိုးက ညာဘက်ပေါင်ဒဏ်ရာ၊ အသက် ၅၆ နှစ်အရွယ် ဦးမောင်ထွေးက ညာဘက်တင်ပါး ရှပ်ထိဒဏ်ရာ ရရှိခဲ့ပြီး သူ့အိမ်လည်း ပျက်စီးခဲ့ပါတယ်။

စစ်ကောင်စီ ခြေမြန်တပ်ရင်း ခမရ ၉ က မတ် ၂၈ ရက် မနက် ၁၀ နာရီခွဲက ပစ်ခတ်လိုက်တဲ့ လက်နက်ကြီးခြောက်လုံးဟာ ထုံးဘိုလေးရွာကို ကျရောက်ပေါက်ကွဲတာကြောင့် အသက် ၅၇ နှစ်အရွယ် တီးပန်းစိန် ဘယ်ခြေချင်းဝတ်နဲ့ နောက်ကျောဒဏ်ရာ၊ အသက် ၂၃ နှစ်အရွယ် နော်ချောတခုက ဘယ်ဘက်ခြေသလုံးနဲ့ ဘယ်ဒူးခေါင်းဒဏ်ရာတွေ ရရှိခဲ့ပါတယ်။

အလားတူ မတ် ၂၇ ရက် မွန်းလွဲ ၂ နာရီကလည်း အဆိုပါတပ်ရင်းက ပစ်ခတ်လိုက်တဲ့ လက်နက်ကြီးငါးလုံးထဲက တလုံးဟာ ထိုး‌ကို့ကော်ရွာထဲ ကျရောက်ပြီး အသက် ၅၆ နှစ်အရွယ် နော်နောရီ ညာဘက်နောက်ကျော လက်နက်ကြီးစ ထိမှန်ဒဏ်ရာ ရရှိခဲ့ပါတယ်။

သထုံမြို့နယ် ကျေးရွာတွေထဲမှာရှိတဲ့ အရပ်သားပြည်သူရှိရာ နေရာတွေကို စစ်ကောင်စီက ရည်ရွယ်ချက်ရှိရှိ လက်နက်ကြီးနဲ့ ပစ်ခတ်မှုတွေကြောင့် ဒေသခံပြည်သူတွေ စိုးရိမ်ကြောက်လန့်ပြီး မကြာခဏ တိမ်းရှောင်နေရတယ်လို့ KNU-သထုံ သတင်းတာဝန်ခံက ပြောပါတယ်။