ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ အနောက်ကယန်းဒေသက စစ်ရှောင်နဲ့ ဒေသခံတွေဟာ ရေရှားပါးလို့ ဒုက္ခကြုံနေကြတယ်လို့ စစ်ရှောင်တွေသိရပါတယ်။
အနောက်ကယန်းဒေသမှာ ရေချောင်းမရှိသလို ရေထွက်ပေါက်လည်း ရှားပါးတာကြောင့် အရင်ကတည်းက ရေရှားပါးတဲ့ဒေသလည်းဖြစ်လို့ အခုတော့ သောက်သုံးရေအတွက် ပိုပြီး အခက်ကြုံနေရတယ်လို့ ပြောပါတယ်။
စစ်ရှောင်တယောက်က “ဒီမှာက နဂိုကတည်းက ရေရှားတယ်လေ။ အခုကျ တိုက်ပွဲတွေကြောင့် ရေလာလှူတဲ့ အလှူရှင်နည်းတယ်။ နှစ်စဉ် ဒီလို ၁ လပိုင်းကနေ ၅ လပိုင်းအထိ ရေရှားတယ်။ သောက်တာတောင် ချွေတာပြီးသောက်နေရတယ်” လို့ ပြောပါတယ်။
ရေကားအသေး တစီးကို ကျပ် ၄ သောင်းနဲ့ ဝယ်ယူနေရပြီး ဂါလန် ၁၀၀၀ ဆံ့ ရေကားအကြီးကို ၈ သောင်းနဲ့ ဝယ်ယူနေရတယ်လို့ ပြောပါတယ်။
သောက်သုံးရေ ရှားပါးတဲ့အပြင် ကုန်စည်စီးဆင်းမှုလမ်းကြောင်းကိုလည်း စစ်ကောင်စီက ပိတ်ထားတာကြောင့် ရိက္ခာပြတ်လပ်တာ၊ ဆေးဝါးဝယ်လို့မရတာ၊ အခြေခံလူသုံးကုန်တွေ ပြတ်လပ်တာလည်း တချို့နေရာမှာ ကြုံတွေ့တယ်လို့ ပြောပါတယ်။
စစ်ရှောင်အများစုဟာ ဖယ်ခုံမြို့၊ ပင်လောင်းမြို့တောင်ဘက်က ဒေသခံတွေနဲ့ လွိုင်ကော်၊ ဒီးမော့ဆိုက ဒေသခံတွေဖြစ်ပြီး လူဦးရေ ၁၀,၀၀၀ လောက်ရှိတယ်လို့ သိရပါတယ်။
