အမေရိကန်နိုင်ငံ၊ အင်ဒီယားနားပြည်နယ်မှာ အခုအပတ်ထဲ တိုက်ခတ်ခဲ့တဲ့ အားကောင်းတဲ့ မုန်တိုင်းတွေနဲ့ ရေကြီးတာတွေကြောင့် လူ ၆ ယောက်ထက်မနည်း သေဆုံးခဲ့တယ်လို့ အရေးပေါ်အရာရှိတွေက သြဂုတ် ၁၅ ရက်မှာ အတည်ပြု ပြောပါတယ်။

သေဆုံးသူတွေထဲမှာ အသက် ၄ နှစ်အရွယ် ယောက်ျားလေးတယောက် အပါအဝင် အမျိုးသမီး ၃ ယောက်နဲ့ အမျိုးသား ၃ ယောက် ပါတယ်လို့ အရာရှိတွေက ထပ်ပြောပါတယ်။

သေဆုံးသူတွေရဲ့ အချိန်ဇယားနဲ့ အခြေအနေတွေအကြောင်း အသေးစိတ် အချက်အလက်တွေကို အတည်ပြုနေဆဲပဲလို့ အရေးပေါ်လုပ်ငန်း လည်ပတ်ရေးဌာနက ပြောပါတယ်။

ရီပတ်ဘလီကန် ပြည်နယ်အုပ်ချုပ်ရေးမှူး မိုက်ဘရောင်းက စနေနေ့မှာ သမ္မတ ဒေါ်နယ်ထရမ့်ပ်နဲ့ စကားပြောခဲ့ပြီး ဖယ်ဒရယ်ရဲ့ အကူအညီအတွက် သမ္မတရဲ့ အရေးပေါ်အခြေအနေကို ကြေညာဖို့ ပြည်နယ်ရဲ့ တောင်းဆိုချက်ကို အတည်ပြုမယ်လို့ ထရမ့်ပ်က သူ့ကို အကြောင်းကြားခဲ့တယ်လို့ ပြောပါတယ်။

အခုအပတ်မှာ အမေရိကန် အနောက်အလယ်ပိုင်းကို အားကောင်းတဲ့ မုန်တိုင်းတွေ ဖြတ်သန်း တိုက်ခတ်ခဲ့ပြီး အင်္ဂါနေ့မှာ အီလီနွိုက်၊ အင်ဒီယားနား၊ အိုဟိုင်းယိုးနဲ့ ကင်တပ်ကီပြည်နယ်က လူ ၁ သန်းနီးပါး လျှပ်စစ်မီး ပြတ်တောက်ခဲ့ပါတယ်။

Source: Reuters