ကိုလံဘီယာနိုင်ငံမှာ ပြင်းအား ပမာဏ ၇ ဒသမ ၄ ရှိတဲ့ ငလျင်တခု ပြီးခဲ့တဲ့သီတင်းပတ် တနင်္လာနေ့က လှုပ်ခတ်ခဲ့လို့ သေဆုံးသူ ဦးရေဟာ ၂၉၄ ယောက်အထိ မြင့်တက်လာပြီး ၃,၉၃၅ ယောက် ဒဏ်ရာရခဲ့တယ်လို့ အမျိုးသားသဘာဝဘေးအန္တရာယ် စီမံခန့်ခွဲမှုဌာန (UNGRD) က ပြောပါတယ်။
ဩဂုတ် ၁၅ ရက် မနက် ၆ နာရီခွဲအထိ ငလျင်ကြောင့် လူ ၃၂၀ ပျောက်ဆုံးနေဆဲဖြစ်ပြီး ၃၅၃ ယောက်ကို ကယ်တင်နိုင်ခဲ့တယ်လို့ UNGRD ရဲ့ အချက်အလက်တွေက ဆိုပါတယ်။
ကိုလံဘီယာနိုင်ငံမှာ ဩဂုတ် ၁၀ ရက် မနက်က ပြင်းအား ပမာဏ ၇ ဒသမ ၅ ရှိတဲ့ ငလျင်တခု မြေအောက်အနက် ၈၀ ကီလိုမီတာကို ဗဟိုပြု လှုပ်ခတ်ခဲ့တယ်လို့ တရုတ်ငလျင်ကွန်ရက်စင်တာ (CENC) က ပြောပါတယ်။
ငလျင်ကြောင့် ကိုလံဘီယာနိုင်ငံတဝန်း မြို့ပေါင်း ၃၂ မြို့ အပြင်းအထန် ထိခိုက်ခဲ့ပါတယ်။ ငလျင်ကြောင့် အဆောက်အအုံ ၆၆ လုံးနဲ့ အိမ်ခြေ ၁၄,၄၉၃ လုံး လုံးဝပျက်စီးခဲ့ပြီး တခြားလူနေအိမ် ၈၁,၅၀၆ လုံး ပျက်စီးခဲ့လို့ မိသားစု ၅၄,၀၀၈ စုက လူပေါင်း ၁၁၅,၄၆၁ ယောက် ထိခိုက်ခဲ့ရတယ်လို့ UNGRD ကို ကိုးကားပြီး မီဒီယာတွေက သတင်းထုတ်ပါတယ်။
ကိုလံဘီယာအစိုးရက နိုင်ငံတကာအကူအညီတွေ ပေးအပ်တာကို အတည်ပြုခဲ့တယ်လို့ UNGRD က X လူမှုကွန်ရက်မှာ ရေးပါတယ်။
ငလျင်ဘေးတုံ့ပြန်မှုရဲ့ တစိတ်တပိုင်းအနေနဲ့ အမေရိကန်၊ အီကွေဒေါနဲ့ အစ္စရေးတို့က ကုလသမဂ္ဂ အသိအမှတ်ပြု ရှာဖွေရေးနဲ့ ကယ်ဆယ်ရေးအဖွဲ့တွေကို ကိုလံဘီယာနိုင်ငံဆီ စေလွှတ်ခဲ့ပါတယ်။
